Azken Portua

HELBIDE BERRIA DU BLOG HONEK

2005-12-13T19:28:00.000+01:00

Kamarada:

Badakizue: eusko blogariak gara, eta blogerretik blogarira pasatzeko bidea egin dute lagun batzuek.
Blog kontuetan euskaraz aritzen garenok, bada, topaleku berria dugu orain, eta blog hau ere helbide berrira aldatzea erabaki dugu.
Laster, gainera, blog honen eduki osoa izango duzue ikusgai helbide berrian.

Mila esker!

Ikusten ez duguna

2005-12-12T11:08:00.000+01:00

Antza denez, Goenkaleren 12. denboraldian, telesaila sortu zenetik lehen aldiz, ekoizleek arazoak dituzte Orioko Udalarekin.
Izan ere, eta orain arte Orioko udal agintariak gustura agertu badira ere fikzioan Arralden gertatzen dena herriko kaleetan filmatzeagatik, orain, oriotarrei ez die grazia askorik egin Arralden ere eraikuntza enpresa handien ustelkeria kontuak agertzea, eta zeharka bada ere Orio kontu horiek zipriztindu ez dezaten, zenbait tirabira izaten ari dira Goenkale ekoizten duen produktorarekin.
Izan ere, errealitatean, Orio ez da zehazki ustelkeria susmoetatik garbien dagoen herria. EAJko azken bi alkateek, kargua uzterakoan, eraikuntza enpresekin lotutako ustelkeria kontuen inguruko zurrumurru askoren artean utzi behar izan dute kargua. Orioko hondartzaren inguruan porlanak etengabe egin du aurrera azken urteotan, eta eraikuntza enpresen eta zenbait udal agintariren arteko harreman estuaren mamua etengabe ibili da herrian zehar, beti ere ustezko kontu horietan zipriztindutako udal agintariek beraiek kargua uzterakoan erabat gezurtatu baldin badute ere horrelakorik.
Kontuak kontu, orain, Arralden ere horrelakoak agertzen hasi direnean, Orioko udal agintariei ez die graziarik egin lehendik ere zurrumurruek ukituta zuten agintarien izen ona zalantzan jartzea, eta Goenkalen gertatzen dena fikzioa izan arren, herriaren irudiarentzat kaltegarria delakoan, kezka agertu diete telesaila ekoizten dutenei.
Hainbat konturen aurrean isilik egon direnek, orain ez dute askorik behar izan urduri jarri eta zerbait esateko…

Uharte habitatua

2005-12-02T13:16:00.000+01:00

Uharte habitatua da orain oihal fabrika zaharra.
Euriaren gordinak itsaso bihurtu ditu putzuak,
eta elkarrekin eraiki ditugun portuetan babestu gara.
Taupadak entzun daitezke ekaitzaren erdian.
Bizirik gaude.
Behin eta berriro hiltzen gaituzten arren.
Ametsak defendatuko ditugu, lubaki bat bezala.
Zerbait ekarri digu udazkenak,
zulatutako hostoak agertu zaizkigu begietan,
biluzik zeuden zuhaitzak besarkatu ditugu
eta bihotz bat idatzi dugu libertatearentzat.
Elurra ez da iritsi oraindik,
baina neguak ez gaitu bakarrik harrapatuko.
Uharte habitatuak dira orain gure ametsak.

Gure gaztetxea [Xabier Euzkitze]

2005-11-24T09:59:00.000+01:00

Noticias de Gipuzkoa egunkariak lehen alea plazaratu du gaur.
Azken orrian, Xabier Euzkitze izan da iritzien leihoa zabaltzearen arduraduna, eta Zarauzko Gaztetxea izan du hizpide.
Hauek dira bere hitzak:

GURE GAZTETXEA

Ofizialki gazte nintzen garaian, bazten gaztetxe bat gu bizi ginen herrian, Azkoitian. Sekula ez gintuen erakarri, eta ez dut uste euren kideko ez zenik erakarri nahi zutenik ere. Behin besterik ez ginen sartu.
Orain bizi garen herrian, Zarautzen, duela bizpahiru aste ireki zuten gaztetxea, hutsik zegoen lokal bat okupaturik. Ez naiz oraindik izan, baina erakarri egin nau. Interes handiz jarraitu nuen ireki aurretik egin zuten kanpaina, irudimen eta sentsibilitatez betea. Denentzat izan nahi duen gaztetxe ireki, sinpatiko, anitz eta goxoa eskaini digute, adin, kolore eta pentsamolde guztien gainetik. Ametsen fabrika izan nahi duela esan digute, eta erakarri egin nau. Zorionak kanpainaren diseinatzaileei! Gure etxeko bat izan da Zarauzko ametsen fabrikan. 3 urteko mutikoa, Amona Papik, haurrei kroketa bana baino zerbait gehiago eskaintzen dien auzokideak eraman zuen gaztetxera, bere bilobekin batera. Ondo hartu izango zituzten, gure ttikia noiz itzuli behar dugun galdezka ari da behintzat.
Zarauzko udalak badu Gazteleku bat. Guk inoiz izan genuena baino askoz gehiago da, ez dut dudarik, baina ez du herriko hainbat gazte eta ez hain gazteren gogorik asetzen. Negoziazioak bide estua izango du, hori da nire susmoa, eta ez deritzot bidezko. Gatazka orok, handi nahiz txiki, elkarrizketa du irtenbide. Ez beti laburrena, bai ordea bidezkoena. Eta udalak, elkarrizketarako borondatea ezik, adimena ere erabili behar luke, hain adimentsu agertu zaizkigun gazteokin solasteko eta negoziatzeko. Ofizialki gaztaroa pasatutako bati gaztetxera joateko irrika piztu dion proiektuak begirunea merezi du, eta arreta. Denentzat ateak zabalik izan nahi dituen gune batek, itxuraz eta arimaz kolore askotarikoa izan nahi duenak, hain aste gutxian herrian hainbeste festa, hitzaldi, kalejira, kontzertu eta haur jolas eskaini dizkigunak, kontutan hartzea merezi du. Ez dut lagunik haien artean, ezagunak gutxi, ez nator inoren mandatari, baina herri hau gehiago gustatzen zait gaztetxea duenetik.

Xabier Euzkitze
Noticias de Gipuzkoa, 2005-11-24

Duintasun ikasgaia

2005-11-21T15:29:00.000+01:00

Ramona Africa entzutetsuak MOVE mugimenduari eta giza eskubideei buruzko hitzaldia eman zuen ostegunean Zarautzen

[Argazkia eta testua: Urola Kostako HITZA]

Ostegun arratsaldea, eta Zarauzko Gaztetxeko ekitaldi aretoa jendez beteta. Atetik kanpo ere jendea, sartu ezinik. Guztiak Ramona Africa entzuteko asmoz. 1985ean AEBetako poliziak MOVE mugimenduko kideen etxea bonbardatu zuen, eta helduak zein haurrak hil ziren sarraski hartatik bizirik atera zen heldu bakarra da Africa. Eraso hura gogor salatu zuten nazioarteko erakundeek, eta Ramona Africa ezaguna egin zen munduan zehar.
MOVE mugimendua AEBetan sortu zen, 70eko hamarkadan, zapaldutako beltzen artean, eta beltzen eskubideen alde eta bidegabekerien aurka antolatu ziren berehala. Africa abizena hartu zuten kideek, sustrietara jotzeko eta bereien arteko batasuna berreskuratzeko asmoz. Ordudanik, gaur egun arte, beltzen eta zapalduen eskubideen aldeko nazioarteko mugimendu entzutetsuenetakoa izan da.
Ramona Africak, Zarautzen, MOVEren historia errepasatu, eta bidegabekerien aurka antolatzearen beharra nabarmendu zuen, ordu eta erdiko hitzaldian.
«Legezkoa izateak ez du ezer esan nahi MOVE jendearentzat. Legezkotasunaren kontzeptua gure etsaiek asmatu zuten, jendeari nahi zuten guztia egin ahal izateko, eta gainera hori onartu egin behar izateko. Jendea engainatzen dute, legezkoa dena zuzena eta ona dela sinetsaraziz. Eta legez kanpokoa okerra eta baztertu beharrekoa dela esanez. Baina iruzurra da hori. Ez da egia inondik inora ere. Eta erraza da hori erakustea. Holokaustoa legezkoa izan zen. Esklabotza legezkoa izan zen AEBetan. Apartheida legezkoa izan zen. Baina hauetako bat bera ere ez zen zuzena edota ona. Eta hauei aurre egitea, berriz, legez kanpokoa izan zen. Horrelako bidegabekerien aurka antolatzea da zuzena. Beraz, legezkoa izateak ez du zerikusirik zuzena edota ona izatearekin. Gauza oker asko egin daitezke legearen barruan, baina ezin daiteke zuzena dena egin eta oker egon aldi berean. Zuzentasunak ez du zerikusirik legezkotasunarekin» adierazi zuen, besteak beste.

Galizia ispiluan barrena

2005-11-15T11:06:00.000+01:00

BERRIA egunkarian irakurri dut gaur AMI alde independentistako 11 kide atxilotu dituztela Galizan, Espainiako Auzitegi Nazionalak agindutako operazioaren baitan. Atxilotu gehienek 20 eta 25 urte artean omen dituzte, eta abar. Galizia ispiluan barrena, berriro ere.
Ez dut Assembleia da Mocidade Independentista (Gazteria Independentistaren Asanblea) delakoa ezagutzen, eta haien webgunera jo dut. "Intervenido Guardia Civil" mezua agertu zait, eta sarean bilaka jarraitu dut.

Gaurkoan, bada, isildu nahi izan dituztenen ahotsa bihurtu nahi dugu azken portu hau.

"Ser moç@ independentista neste País é ir contracorrente, é dizer, ser independentista na Galiza é nom ir ao fácil. Nós nom nos apontamos ao carro vencedor, nós acreditamos nas nossas
ideias e ninguém por nemgum meio poderá com elas; a repressom a qualquer nível nom poderá silenciar as nossas vozes.

Somos conscientes de que a Galiza tem uns traços muito definidos que a caraterizam como Naçom e a direrenciam do resto do Estado Espanhol (umha língua já em processo
de desapariçom -por nom falar da nossa ortografia-, umha cultura diferente, um território definido, umha comunidade estável, um carácter e uns rasgos que nos som próprios,...). Mas também vemos na independência nacional umha saída a muitos dos nossos problemas económicos e ao melhor uso dos nossos abundantes recursos.

Mas nom por isto se nos pode alcumar de xenófobos ou de simples frustrados que decidem botar a culpa dos seus problemas a terceiros. Nós nada temos em contra d@s espanhóis/las -@s nossos vizinh@s-, mas si o temos contra as "espanholeiras" e "espanholeiros" (aqueles dispostos a defender os seus próprios interesses mesmo pola violência e repressom, defendendo o indefendível -narcotraficantes, corruptos, G.A.L.-). Por todo isto, berramos ISTO NOM É ESPANHA porque gostariamos de regir por nós próprios e de poder escolher as nossas relaçons com outros povos, livremente.
Convem aclarar que independência nom quer dizer desuniom, senom convivência sobre a base do mútuo respeito à livre vontade. Independência opôm-se a injerencia e domínio, e rima à perfeiçom com convivência como se a história
souber de poesia, e tratando-se da história galega, o nosso futuro nom nos pode recursar essa rima.

Assim, independência nom é separatismo, independência é um mundo solidário: o melhor internacionalismo acha-se na liberdade dos Povos.
Também sabemos que o caminho para acadar o nosso objectivo é longo e cheio de dificultades. Mas, amenizado por pequenas grandes conquistas, que fam da nossa luita umha luita múltipla e variada. Assim; ecologia, insubmissom, feminismo, anti-fascismo,.. e outros, som paragem obrigatória no caminho da independência. Se bem, todas estas pretensons só ficarám num feixe de verbas se ti nom fas nada por mudar todo o que nos imponhem!

Somos abertos pois nom somos "politiqueiros", para nós o independentismo é máis que política, é o querer viver livre e que todos os que fam das nossas vidas um pesadelo nos deixem em paz. Nom temos definiçom estritamente política (marxista-leninista, maoista, autónoma,...), cremos que qualquer pessoa de esquerdas pode chegar a ser consciente de que ele/a também pode luitar por umha Galiza Ceive.

O nosso povo será livre algum dia graças à luita, nom nos enganemos: as cousas que tenhem um verdadeiro valor nom as regala ninguém, a liberdade do nosso Povo bem merece o esforço de cada um de nós".

Putzua handituz eta zabalduz

2005-11-11T09:32:00.000+01:00

Zenbat eta euri gehiago egin, zenbat eta ekaitz handiagoa jasan, gaztelu beltzaren inguruko putzua handitzen ari da.
Gainera, gero eta xakel gehiago ageri da uretan, putzua eta gaztelua kolorez betetzeko gogotsu.
Igande honetan, esaterako, skate aretoa inauguratuko dute Zarauzko Gaztetxean, eta horren harira zirkoa ere antolatu dute bertan.
Hau da Xakela Gaztetxe Asanbladak atzo iluntzean hedabideetara bidali zuen idatzia:

"Zarauzko Gaztetxea ametsen fabrika dela esaten ari gara egunotan, eta horrela dirudi. Egunak joan, egunak etorri, asanblea bakoitzean ideia asmo eta kolore berriak agertzen zaizkigu.
Horren harira, honakoa antolatu dute skate aretoaz arduratzen diren surflariek eta gainerako kirolariek:
Igande honetan, azaroaren 13an, arratsaldeko 16:00etatik aurrera, Zarauzko Gaztetxean, SKATE ZIRKOA.
Zer da hori? Skate aretoaren inaugurazio ekitaldiarekin bat eginez, Zarauzko haur, guraso, gazte eta herritar guztientzako ikuskizun berezia antolatu dugu.
—Malabarak ikusteko eta malabaretan aritzeko aukera.
—Magia emanaldia.
—Pailazoak.
—Haurrentzako txokolatada, dohainik.
—Pailazoak skate egiten.
Eta beste hainbat sorpresa.
Gurasoei, haurrekin batera bizkotxoren bat edo beste egin eta ekartzeko gonbidapena ere egiten diegu hemendik.
Aurreko asteburuan ia mila lagun elkartu genituen skate, BMX eta mountain board ikuskizunean, bereziki gazteak.
Orain, igande honetan, haurrentzako ekitaldia antolatu dugu: SKATE ZIRKOA.
Skate aretoa Gaztetxeko txiki park berezia bihurtuko dugu, inauguratzeko,
eta giro ederra izango dugu".

"Ahalegin handiagoa"

2005-11-09T11:20:00.000+01:00

Lagun batek, poetak, eta biok ohatzea partekatu dugu gaur. Lo gutxi eginda gaude, baina ez zirriak egiten aritu garelako. Zarauzko Gaztetxean eman dugu gaua, goardia egiten. Gaztetxea okupatu zenetik eta ateak zabaldu zirenetik hamaikagarren eguna da gaurkoa, eta gazteek urte askoan hautsa hartzen eta erabat hilda zegoen eraikinari bizitza eman dioten arren, husteko arriskua gainean du Gaztetxeak.
Horregatik, goardiak egin eta erresistentzia antolatzen hainbat lagun geratzen da gauero. Haizeak, euriak eta hotzak ez dute batere samurra egiten egonaldia. Ez da erraza lo egitea, eta zaratarik hutsalenari adi, etengabeko tentsioan igarotzen da gaua. Beti ere leihoetatik sartzen den euriak edota ituteek erdian harrapatu ezean.
Horrela hainbat gazte, gauero. Gaur, esaterako, hogeita bost bat bildu gara. 2005. urtean, Zarautz bezalako postaletako herri turistiko eta orbanik gabekoan, hogei lagun, gauero, gaua etxetik kanpo igaro beharrean. Konpromisoa, sinesten duten egitasmo herrikoia defendatzeko. Ahalegina, ametsak ezin direla debekatu erakusteko. Gogoa, denen artean koloretako oihal handia egiteko.
Eta egiten ari diren horretan sinetsita, denontzat den bilgune zabala defendatzeko, gazteak lanera, eskolara eta dagokien lekura, lo askorik egin gabe, begizuloekin, hoztuta, asko dagoeneko katarroarekin, baina gustura, egunez egun ametsen fabrikaren ateek zabalik daudela ikusita.
Eta horren aurrean, gazte hauei “ahalegin negoziatzaile handiagoa” eskatu die Udalak. Hauei, duten ia dena herritar guztientzako den egitasmo baten alde ematen ari direnei, “ahalegin” handiagoa eskatzen diete. Nork, eta herriko gazteen alde inoiz gaur igaro dugun gaua bezalako bat emango ez luketenek.
Iazko datuetara joz, herriko alkateak, hilean 4.484 euro jasotzen ditu herritar denen arduradun izateagatik. Gazteria, Hezkuntza, Prestakuntza eta Enplegu zinegotziak, hilean 1.716 euro jasotzen ditu kargu hori izateagatik. Turismo zinegotziak, hilean 2.145 jasotzen ditu. Kultura eta kirol zinegotziek, bakoitzak 460 euro. Eta hauen guztien politika eskasagatik, 1.400 herritarrek bat egin dute Zarauzko Gaztetxearekin, eta dagoeneko amets fabrika bihurtu duten eraikina defendatzeko prest daude, egin beharreko ahalegin guztia eginez, orain arte bezala.
Gezurrak hitz politekin jantzi nahi izan arren, agerikoa da batzuen eta besteen arteko aldea.

Oñatiko Gaztetxea bota dute

2005-11-08T14:36:00.000+01:00

www.berria.info webgunetik:

Oñatiko gaztetxea bota dute

Gaur goizean goiz Oñatiko Gaztetxea bota dute hondeamakinekin, udaltzain eta ertzainek babestuta. Gazte asanbladako kideek salatu dute "ez abisatu eta ez ezer" ez dietela egin. Eguerdian elkarretaratzea egingo dute udaletxe aurrean, eta arratsaldean ere mobilizazioak egingo dituztela jakinarazi dute. Udalak, berriz, azalpenak arratsaldean emango dituela esan du.

Goizeko 7:00ak aldera hasi dira gaztetxea botatzeko lanak eta 12:00etarako ia amaituta zeuden. Eraikina botatzen ari ziren bitartean, bi udaltzain egon dira ingurunea zaintzen, eta bertara gerturatzea galarazi dute Ertzaintzaren laguntzarekin. Izan ere, ertzain batzuk ere lanak zaintzen egon dira, baina pixka bat urrunagotik.

Gaztetxea botatzen ari zirela eguerdian jakin dute gazteek. Ordura arte ez die inork abisurik eman. Jakin bezain pronto bertaratu arren, ordurako eraikina botata zegoela adierazi dute. Udaletxe aurrean elkarretaratzea egitekotan ziren 13:30 aldera.

"Bihar jakingo zara"

2005-11-03T11:47:00.000+01:00

Azken Portu, 2005-11-04, gaueko 02:07.

Herri puta maite honetako istorio bat.
Patxi Gaztelumendiren hitzaldia izan zen atzo ilunabarrean Zarauzko Gaztetxean: “Ez gorrotatu komunikabideak: sortu komunikabideak! Euskal Herria eta informazioaren gizartea. Eredu praktikoak”. 80 lagun inguru IMC kontzeptuak, blogek eta internet sareak eskaintzen dituen aukerei buruz solasean, hitzaldi eder eta interesgarrian.

Hura bukatu, asanblea egin, eta afaltzera. Atzo, ohi baino gutxiago ginen hileroko hitzorduan, baina Patxi gonbidatu genuenez, ezin hutsik egin. Afaldu, eta zerbait hartzera, kalera.
Tarin tabernako eserlekuetan gaudela, 01:30ak aldera, eztanda antzeko burrunba handia. Trumoia zela pentsatu, eta ez ginen gehiegi aztoratu. Laster, ordea, Ertzaintzaren autoak hasi ziren Nafarroa kalean, atzera eta aurrera, argi urdinak piztuta, kontrako norabidean. Zerbait arraroa.
02:00ak aldera, etxeratzea erabakita, Patxirekin autoan sartu eta Zarauzko Gaztetxetik pasatzea erabaki genuen, “badaezpada”.
Autoan Gaztetxe aurretik igaro, eta dena lasai, barruan oraindik argiak piztuta ikusi arren. Bizkaia kalean metro batzuk gehiago egin, Altzola kalerantz sartzen hasi, eta ezin, bidea itxita. Igerain errekaren petrilean, berriz, bi ertzain eserita, linternekin…

“Ostia! Desalojorako prestatzen ari ote dira?”. Urduritasuna. Autoan aurrera segi, eta beste bide batetik Altzola kalera iritsi, autoa aparkatu, eta AEK aldera hartzea erabaki dugu, ea Zelai Ondo ingurura iristen garen, eta atzealdetik zerbait ikusten dugun, ea desalojorako prestatzen ari diren eta telefonoak dantzatzen hasteko aukera dugun. Zinta azpitik igaro, eta han goaz biak, lasai arraio. Berehala, ordea, txistua jo digute. Atzera begiratu, eta han datoz bi ertzainak korrika guregana, linternak eskuan. Ea nora goazen, oihuka, gazteleraz. Guk euskaraz, hortik goazela, ea zer dagoen, inguruan bizi garela, afaltzetik gatozela, eta abar. Ea ez ote dugun ikusten itxita dagoela, eta identifikatzeko. Kazetariak garela. Karnetak ateratzeko, eta EHNA ez ateratzeko oharraraziz, “NANak ez du balio, e?!” esan digu euskaraz dakien bakarrak. Bestea, oso serioa, gure karnetak hartu eta han doa, deiak egitera. Auskalo zein datu basetan beste behin gure izenak sartzera. Gu, bitartean, bestearekin. Ea nongoak garen, ea zer egiten dugun, ea non bizi garen. Gurasoen etxearen atarian gaudenez, ni bertan bizi naizela esan diot. Eta Patxi? Patxi Larrabetzukoa dela. Ea zer egiten duen hemen. “Aibalaostia. Lagunekin afaldu, eta buelta bat eman. Ezin da, ala? Hau ez da Zarautz?”. Bestea haserre, errespetuz hitz egiteko mesedez. Ea zerbait gertatu den galdetu diot nik, Gaztetxea husteko prestatzen ari baldin badira ezer ez digula esango jakin arren: “Bihar jakingo zara”. Erantzun digu. Bestea iritsi da gure karnetekin, eta handik ospa egiteko: “Ale! Fuera de aquí”. Eta bidali egin gaitu, etxe ataritik, gure kaletik, gure auzotik.
Autoa hartu, eta Gurmendi kaletik Araba kalera egin dugu. Hura ere itxita, eta 02:23 izan arren, telebista kamerak bertan, eta Ertzaintzaren patrol bat aurrerago. Orduan berretsi dugu susmoa: zerbait gertatu da. Irudiak hartzen ari diren langileei galdetu diegu, eta bi lehergailu jarri dituztela: bat INEMen bulegoan, eta bestea Bake Epaitegian.
Argazkiak atera, eta etxera.

2005-11-04, goizeko 08:37.
Lanera etorri, eta INEMen bulegoa oso hurbil dagoenez, argazki batzuk egitera hurbildu naiz. Ingurua itxita zuten eta oraintxe iritsi dira Arkauteko CSIkoak, eskularruekin, pintzekin, frogak biltzera, eta ingurua itxita dute. Argazki batzuk egin ditut, eta atzo gaueko bietako bat ezagutu dut, euskaraz ez zekiena. Berak ere ezagutu nau, jakina, eta honek zer ostia egiten du hemen berriro irakurri diot kopetan. Berdin zait. Ea argazki batzuk egin ditzakedan galdetu diet. Ezetz erantzun didate. Eta lanean hasi aurretik, blogean idazteari ekin diot. Eta argazkiak artxibatzeari.

Mila eta bat koloreko oihal handi bat

2005-11-02T15:00:00.000+01:00

Igandean Zarauzko Gaztetxea bihurtu den eraikina okupatu zuten dozenaka gaztek.
Gauean, besteak beste, garai bateko Vladimir Brigadak literatura taldeko lagunen irakurraldia izan zen Gaztetxean bertan. Manuela hustu zuten gauean talde horretako kideek poema irakurraldia zuten bertan, eta herenegun gauean ere, gaztetxe berriaren lehen gauean, vladimirtarrak gonbidatu zituzten. Batzuentzat berezia izan zen Zarauzko Gaztetxearen lehen gau hura, besteak beste, haurtzaroa igaro dugun baserriaren ondoan dagoelako.
Anaiak, esaterako, bihotz-bihotzez idatzi zuen gauean irakurri zuen testuetako bat.
Honakoa da.

«Ondoko baserrian jaio zen ama.
Eraikina bertan omen zen munduratu zenerako.
Garai batean beraiena zela lur sail hau, kontatu dio amonak anaiari goizean. Textil Guipuzcoana izango zenaren nagusiak, duela 60 urte inguru ez dakit zenbat mila pezetaren truke erosi zuen arte.
Gerora ehun langiletik gora ibiltzen omen zen hemen, eta gaueko txanda amaitzen zutenei, goizaldean, esnea ematen ziela ere kontatu dio.
Aitak ere iraganera egin du Gaztetxea amonaren baserri ondoko fabrika dela esan diodanean: oihalak kanpoan egoten zirela sikatzen, Axelen etxe pareraino ere Xalbardineko lurrak zirela, «hor galduko zeate behintzat!» eta txukun margotzeko ere esan dit.
Umetako oroitzapenetan murgildu naiz ni ere: bi lehengusuek futbolera jolastu nahi ez eta zenbatetan ibili ote naiz baloiari ostikoka gaur margotzen nabilen horma hauetan. Antonio osabaz ere gogoratu naiz, hor kanpoan eserita egoten zen, erreka ondotik pasatzen ziren neska gazteei kasu egiteko prest. Zer esango luke gaur, bizirik balego, hemen hainbeste neska gazte ikusita?!
Jolastu dezagun berriro. Egin dezagun mila eta bat kolore izango dituen oihal handi bat. Josi dezagun harremanen sarea, eta izan dadila gaurtik aurrera eraikin hau munduko ametsen fabrikarik handiena.
Ametsak, eta amets-eneak bizirik.
Zorionak, mila musu, eta eskerrik asko».

Halloween: beldurrezko ipuin eta istorioen gaua

2005-10-29T18:59:00.000+02:00

Halloween gaua da gaur.
Beti izan dut gustukoa "gezurretazko beldurra", beldurra beti benetakoa dela jakin arren.
Beldurrezko filmen eta istorioen jarraitzaile sutsua naiz, eta areago kateatzen nauten beldurrarekin batera misterioa ere baduten istorio lazgarri horiek.
Asko eta asko, Halloween gauaren inguruan ematen dituzte telebistan, eta Donostiako Beldurrezko eta Fantasiazko Zinemaren Astea ere data honen inguruan izaten da urtero.
Gringoen eraginak zabaldu du ziurrenik Halloween gauaren kontu hau mundura, nahiz eta gurean oraindik erabat kutsatu gabeak gaudela dirudien. Miarritzen, Baionan... eta, oro har, Iparraldean errotuagoa dute Halloween gaua ospatzea, baina Hego Euskal Herrira ez da hainbeste zabaldu sukarra.
Dena dela, izaten da antzeko ekitaldirik. Mutrikun, esaterako, Gaba Beltza gaua ospatuko dute, baina ez Halloween gauaren itzalpean, "bertako ohiturak berritzeko" baizik, "Xesperoen kontra, arima erratuen alde". Hasieran egun bakarreko jaia zena handitu egin zuten, eta gaur egun asteburu luzea hartzen du. Gaztetxea izango da bilgune nagusia.
Zarautzen, berriz, Xakela Gaztetxe Asanbladak "beldurrezko ipuinen eta istorioen gaua" antolatu du gaurko.
Musika Plazan bilduko dira gazteak gaur.
Bihar, berriz...
Bihar beste kontu bat izango da.
Ehunka herritarrei kutsatu digute gazteek amets egiteko gogoa.
Amets egin, sortu, ikasi, antolatu eta bizitzari elkarrekin begiratzeko leku fisiko baten beharra aldarrikatzen ari dira azken asteotan, eta eredu parte-hartzaile, asanbleario eta autogestionatua bultzatzen dute horretarako.
Udalak, jakina, ez du ezer jakin nahi horretaz.
Eta gazteak oso urrun daude, gaude, udalen kultura subentzionatu horretatik. Patetikotasuna eta duintasuna zailak dira uztartzen.
Horregatik, azken urteotan ez bezala, lanerako, laguntzeko, zutitzeko gogotsu gabiltza.
Borroka galduetatik gatoz, eta traidoreen gezurrezko bakea baino ez dugu ezagutu.
Ametsak debekatu nahi dizkigutenen aurrean, ametseneak eraitsi nahi dizkigutenen begietan, ez dugu zalantza izpirik egingo.
Bihar ere argituko du egunak.
Eta izugarria izango da.
Ikusiko duzue. Edo kontatuko dizuegu.

Beste lurrikara bat Itoitz inguruan

2005-10-27T08:47:00.000+02:00

Gaurko BERRIAk dakar albistea:

"Azken egunotan hiru lurrikara gertatu dira Itoizko urtegiaren inguruan. Hirurak, urtegia berriz betetzen hasi ondoren. Azken mugimendua atzo gertatu zen, Nagore herritik kilometro batera, urtegian bertan. Hau da, ura pilatzen ari den eremuan izan du azken lurrikara horrek epizentroa, Itoizko Koordinakundeak ezagutarazi duenez.
Espainiako Geografia Institutuak jaso du mugimendu horren berri. 0,7 gradukoa izan da. 2,8koa izan da azken egunotako lurrikararik handiena. Erron gertatu zen, joan den astelehenean.Udan hamaika lurrikara gertatu dira Itoizko urtegian. Ekainaz geroztik nabarmen areagotu direla azpimarratu du Itoizko Koordinakundeak behin eta berriz. Urtegiko ura 561 metroko mailatik 536kora jaisten hasi ziren orduan, eta mugimenduen kopuruak gora egin zuen.Orain, berriz, 561 metroko mailara igotzen hasi da ura Itoitzen, urtegia betetzeko lanetan hala aurreikusten baitute. Urtegia berriz betetzen hasi direnetik lurrikarak ez dira eten, eta joan den igandetik jada hiru gertatu dira. Azkenak urtegian bertan izan du epizentroa".

Ametsak ezin dira hustu!!!

2005-10-26T09:26:00.000+02:00

Egiako Ametsenea gaztetxea hustu dute gaur goizean, eta hondeamakinek eraikina botatzeari ekin diote.
Berriro ere irudi ezagunak: Itoitz, Artozki, Nagore, Orbaitz, Muniain, Euskal Jai, Kukutza edota Sorgintxulon bezala, kolore bateko edo besteko amets zapaltzaileek, indarra erabiliz ameslekuak hustu, eta hondeamakinei bidea egin diete.
Palestinan bezala. Berdin zaie lotsaren harresiak eraikitzea. Lotsarik izango al dute, ordea? Lasai egingo al dute lo gaur gauean? Bikotea laztantzeko samurtasunik izango dute? Nola begiratuko diete haurrei begietara? Gizakiak al dira?
Betiko galderak, eta amorrua.
Sua barruan.
Bihotza taupaka.
Eta ezin ezer egin.
Berriro ere malkoei eutsi eta amets egiteko gogoa.
Badakigu.
Ezingo dute amets egitea debekatu.
Ezingo dituzte putzu guztiak hustu.
Eta isildu eta desagerrarazi nahi bagaituzte ere, putzuetan beti izango dira xakelak.
Beste nonbait izango da, baina bihar ere argituko du egunak.

Amets egin

2005-10-25T10:48:00.000+02:00

[Argazkia: gazteak Iruñeko Euskal Jai gaztetxearen teilatuan, 2004ko abuztuan].

Azkoitiko Matadeixeko kideen gutuna dakar gaur Urola Kostako HITZAk, Azkoitiko Udalari erantzunez: “Ez dakigu konturatzen zareten, baina garai batean Matadeixen gisako lekuak husteko eta botatzeko goitik erabiltzen ziren arrazoiak ziren: droga, zikinkeria, gazteak alferrik galtzea, zarata… Hau da, ustez gauza txarrak jartzen ziren arrazoitzat”.
Orain, ordea, bizitokiak egiteko arrazoiarekin husten eta bidaltzen dituzte eraikin zehatzei bizia ematen dioten gazteak eraikin horietatik. Arrazoi dute Matadeixeko lagunek: udalek, orain, ez dute droga, zikinkeria edota zarata aipatzen. Zarauzko gazteei, herritar guztientzat igandero herriko frontoi batean zine foruma antolatzeagatik isunekin egin diete mehatxu. Ez omen dute baimenik eskatzen, eta argindarra denok ordaintzen dugun farola publiko batetik hartzen omen dute. Hori delitua! Beste inork antolatzen ez duena antolatzea, denontzat. Zalantzarik gabe, Matadeixeko kideek dioten moduan, “honek ez dauka zerikusirik zuen kultura aseptiko horrekin, dirua mugitzen duen espektakuluaren mundu horrekin”.
Hau beste zerbait da. Oraindik ere, bada amets egin, sortu, ikasi eta antolatzeko gogoa duen lagunik.
Eta Itoitz, Artozki, Euskal Jai, Kukutza, Sorgintxulo eta gainerako bihotz guztiak gogoan, taupaka jarraitzeko gogotsu gabiltza gainera.

Leiho irekia komisioarentzat [3]:

2005-10-24T12:34:00.000+02:00

Hau da SKAPAko komisioko kide batek bidali duen mezua...
"Zabaldu komisiokoentzako leiho bat. Gai asko daude: banderitak kentzeke,
bertsolariak ordaintzeke, herri kiroletako taldeak antolatzeko deialdia eta
beste kontu batzuk... Bakoitzak lekarkeena".

Beraz, egin beharko da bileraren bat... edota hemendik kontu batzuk argitu.

Besarkadak denoi!

Auzoen arteko herri kirol erronka antolatu nahi du Xakelak

2005-10-19T11:00:00.000+02:00

XAKELA Gaztetxe Asanbladatik jakinarazi dutenez, udazken honetarako hainbat ekitaldi antolatzen ari dira, eta datorren astean emango dute horien guztien berri.
Tartean, besteak beste, azaroaren 5erako antolatu nahi duten herri kirol erronka berezia dago.
Izan ere, Zarauzko auzoen arteko erronka izatea nahi dute: SKAPA, Vista Alegre, Santa Marina, Mutil Ardo...
Batzuekin eta besteekin hitz egin eta hitzordua finkatzea falta da, baina ideia aurrera doa, eta Zarautzen inoiz ikusi gabeko auzoen arteko erronka polita izango da azaroaren 5ekoa.

[Argazkia: herri kirol jaialdia Iñurritzan, aurtengo sanpelaioetan]

Sukaldaritza: maria bizkotxoa

2005-10-18T14:30:00.000+02:00

Aurtengo uzta jasota eta lehortuta izango duzue dagoeneko gehienok.
Bada, belarrari probetxu ederra ateratzeko errezeta bat doakizue gaurkoan...

Osagaiak (6-8 lagunentzat):
Marihuana (6-8 porro egiteko adina), 3 arrautza, jogurt 1 (limoizkoa, kokozkoa, marrubizkoa... gustuaren arabera), jogurt potoa bete azukre, jogurt potoa bete irin, jogurt poto erdia oliba-olio, legamia, azukrea eta txokolatea egiteko kakaoa edota cola-cao antzeko zerbait.

Ontzi batean, belar guztia xehetu behar da lehenik, txiki-txiki eginda geratu arte. Ondoren, ontzira gehitu hiru arrautza, jogurta, azukrea, irina, olioa, legamia eta kakaoa, limoi-azal tira batekin batera, eta guztia oso ongi nahastu ontzian.
Prestatu molde bat gurinarekin, eta bertara bota otzian prestatu dugun orea. Sartu labean 160-170 gradutara, 25-30 minutuz, eta tarteka begiratu ea eginda dagoen, beti ere erre ez dadin zainduz.

Atera, hozten utzi, eta KONTUZ JAN!!!!
Izan ere, oso goxoa da, baina katu ederra harrapa daiteke kontuz ibili ezean!

Zarauzko Gaztetxearen alde

2005-10-17T12:51:00.000+02:00

Xakela Gaztetxe Asanbladak batzar irekia egin zuen larunbat arratsaldean, eta 60 lagun inguru elkartu ziren batzarrean.
Orain, Gaztetxearen aldeko atxikimendu bilketa zabaltzeari ekin dio, eta hau da ezagutarazi duten testua.

Atxikimenduak: xakela@gaztesarea.net

ZARAUTZ GAZTELU BELTZA

"Oskola balitz bezala inguratzen zuen putzuak gaztelua, alderik alde.
Enperadoreak eta haren menekoek harro erakusten zizkieten bisitariei harresi handien barnean sortu eta antolatu zituzten eraikinak eta ikuskizunak, harresien handitasunak, nolabait, denborarekin gaztelua kartzela bihurtu zuela ohartu gabe.
Baimenik gabe ezin zen ezer egin gaztelu handi bezain eder hartan. Baimenik gabe iristen ziren bisitariengandik eta mundu arrotzetik babesteko agindu zuen enperadoreak gaztelua inguratuko zuen putzu handia sortzea, eta zazpi ilargi eta zazpi gau eman zituzten langileek egiteko hartan, harik eta gaztelua erabat besarkatzen zuten beso urtsuak agerraraztea lortu zuten arte.
Gaztelu ederra arrotzen eta etsaien eskuetatik urrunduko zuen putzu ilun eta zabala sortu zuten langileek, eta enperadoreak, gustura, debekatu egin zuen putzua baimenik gabe zeharkatu eta edonor gaztelura sartzea.
Ilargiak joan eta ilargiak etorri, ordea, putzua bizitza hartzen hasi zen. Egonean egon behar horretan, denborak, adiskideak deitzen deitu egunak eta gauak alaiagoak izan daitezen, eta ohartzerako bete zen putzua arrain gorriekin, tximeleta alaiekin eta xakel kantariekin. Eta ilargi berri asko iritsi aurretik bihurtu ziren putzuaren inguruan sortutako kontuak eta xakelen kantuak gaztelu hartako taupada koloretsuenak.
Kantu eta taupada haiek, gainera, etenik gabe entzuten ziren gazteluan, gau eta egun, eta gela altuenetaraino iritsita, enperadorearen loa ere galarazten zuten. Eta bisitariek eta arrotzek gustura ikusi eta entzuten zutena madarikatzen zuen enperadoreak, behin eta berriz, ibili ere baimendutako lekuetatik egin behar zen gaztelu hartan hura baitzen bere baimenik gabe egiten zen bakarra. Gaztelu barruan, urrearekin ordaintzen zituen bufoien, magoen, ipuin kontalarien eta dantzarien emanaldiak, baina herritarrek nahiago zituzten putzuan sortutako ekimenak eta xakelen kantuak. Askatasunak sortutakoak ziren, eta ez zen kolore haien bizitasuna ordaintzeko urrerik.
Horregatik, haserre, putzua hustea erabaki zuen, eta bertan bizi zirenak makilatzea. Zaldi gainean Armada Beltza bidali zuen lan hura egitera, eta soldaduak gogotsu aritu ziren egiteko hartan. Behin putzua hustuta, arrain gorriak hil zituzten, tximeletak ihesera behartu, eta xakelak makiladaka hartu zituzten. Bertan akabatu zituzten batzuk, asko betiko isildu ziren, zigorraren beldurrez, eta beste asko, makilekin behin eta berriro egurtu ondoren, apo bihurtu ziren, korroka beldurgarrian, gero eta mingotsago ahotsa aldatzeraino. Eta enperadorearen zaldirik onenek ere negar egin omen zuten.
Baina hurrengo ilargiak lasai eman zituen enperadoreak, gonbidatuei gaztelua erakutsiz eta urrearekin ordaindutako ekitaldi arranditsuak antolatuz. Gaztelua, ordea, putzutik iristen zen bizitasunik eta xakelen kanturik gabe, gero eta hutsagoa eta ilunagoa ageri zen, kolorerik gabe. Isiltasunak hartu zituen inguruak, eta gauero loak lasai hartzen zuen enperadorea.
Ilargiak pasatzen ziren, eta bazirudien ez zela ezer pasatzen, baina denbora aspertuta zegoen isiltasun harekin, eta hainbat ilgora eta gero, euriaren laguntzarekin, berriro bete zuen putzua. Euriak eta denborak arrainak, tximeletak eta xakelak ekarri zituzten berriro uretara, eta koloreek eta kantuek inguratu zuten berriro ere gainontzean gero eta ilunagoa ageri zen gaztelua.
Abesti, kolore eta alaitasun eztanda hark kutsatuta, gazteluan bizi ziren bufoiek, magoek, ipuin kontalariek, dantzariek, zaldiek eta gorteko beste hainbat herritarrek, oraingoan putzua eta bertako lagunak bakean uzteko eskatu zioten enperadoreari. Izan ere, baimenik gabeak izan arren, kolore haiek guztiak eta xakelen kantuak ziren benetan gazteluaren taupada aske bakarrak.
Guk ere, gazteluen ate zabalak edonorentzat zubi bihurtuta ikusi nahi ditugunok, harresietan sinesten ez dugunok, honen bidez, putzuak bakean uzteko eskatzen diogu enperadoreari, eta erasoen aurrean xakelak defendatzeko konpromisoa hartzen dugu, putzu, gaztelu eta erresuma guztietan kolore guztiek lekua izan dezaten".

ATXIKIMENDUAK: xakela@gaztesarea.net

Zarauzko musika taldeen idatzia, Gaztetxearen alde

2005-10-14T15:21:00.000+02:00

Denontzat jakina da, Zarautzen hainbat eta hainbat musika talde daudela. Baina ba al daki inork kontzertuak emateko aretorik edo entsegu lokalik dagoen? Zarauzko herrian, denok edo ia denok dakigu udaletxeak kulturarekiko duen jarrera eta politika. Uda partean, gure “herriarentzat” hainbat ekitaldi antolatzen dituzte. Esaterako, abuztu partean ospatzen den Jazz mintegia edo aurten malekoian egon diren kontzertuak. Baina iraila amaitzen denean eta herri hau bixitaririk gabe geratzen denean, ekintza hauek ezerezean geratzen dira edo ospakizun berezietan bakarrik suertatzen dira(kuadrila eguna, ihauteriak, herriko festak eta nola ez, igandero Musika Plazan egoten diren taldeak). Modu honetan, Zarauztarrak garen taldeei ia ezinezkoa egiten zaigu gure herrian, gure lagun eta ezagunen artean jotzea.

Berdin gertatzen da entsegu lokalekin. Ez dakienarentzat esan beharra dugu Vistalegreko auzoan, Udaletxeak alikilatutako 3 entsegu lokaletan 20 taldek entsaiatzen dugula. Konturatuko zarete zer arazo ekar ditzakeen 20 talde ezberdinek m2 gutxiko 3 lokaletan entsaiatzeak: Leku eza, materiala gordetzeko arazoak, ordutegi bat finkatzeko arazoak etab. Talde asko gainera, leku hau erabili ezinean geratzen dira talde gehiegi daudelako eta beste batzuk lokal pribatuak alokatu behar izaten dituzte honek ekartzen dituen diru galerak kontuan hartuz.

Gainera, Zarauzko udalak lokal hauekiko eduki duen ardura desegokia ere salatu beharrean aurkitzen gara. Azken aldian, entsegu lokal hauetan arazo ugari izan ditugu lokaletik kanpora irteten den soinuaren ondorioz eta egia esan Zarauzko udaletxeak ahalegin handiegirik ez du egin arazo hau konpontzeko. Eginiko “konponketa” bakarra, bertako leihoa ixtea izan da. Honek lokal barruan egoten den hezetasuna areagotzea ekarri du eta ondorioz, musika materiala izorratzea. Honen ostean bigarren ate bat jarri dute. Lokal barruan toki pila bat kendu digute bigarren ate hau dela eta, gainera arazoa ez da bigarren atea, lehenengoa ondo jartzea baizik. Kanpoko atea hori ondo zegoen garaian gauez ensaiatzen genuen talde askok eta ez zegoen bizilagunekin arazorik. Orain bigarren atea jarrita ere soinua ateratzen da eta ezin dugu 22etatik aurrera ensaiatu beraz talde askok lan kontuak direla beste lokal bat aurkitzera behartuta daude.

Azken egun hauetan, zenbait gaztek Zarauzko kaleak berdez apaintzen ibili dira lokal autogestionatu baten eske. Etxe askotako buzoietan ere, testu bat banatzen ibili dira beraien proiektua azalduz eta herria informatuz. Gu, musika talde garen ikuspuntutik eta lerro hauetan aipatu ditugun arazoengatik, Zarauzko gazte hauekin eta Xakela Gaztetxe Asanbladarekin bat egiten dugu eta etxe autogestionatu bat eskatzera behartuta aurkitzen gara. Etxe honen bitartez, herri honek dituen gabezi asko beteko dituelako, bai entsegu lokalen aldetik eta baita kontzertu areto baten beharraren aldetik. Horrela Zarauzko musika talde guztiok, gure musika gure herrian bertan aurkezteko aukera izango dugu eta kondizio egokietan dagoen gune físiko bat eduki ahal izango dugu gure musika aurrera eramateko.

Honekin batera herriko beste hainbat kultur, kirol,... talderi animatzen diogu gu bezala mugimendu honekin bat egitera. honela idatzi baten bidez edo beste edozein bide erabiliz behar hau kaleratzeko! Denok behar dugulako eta denontzat izango delako.

Zarautzen gaztetxea orain!!!

Idatzia sinatu duten musika taldeak:
ANESTESIA
TANTRA
NEU
KALANBRAZO
ZULO
ERASO
ERANTZUN
STOCKHOLM S
FOLKCORE
MANTISA
METRALLETA
INOR EZ
BURKINA FASO
INERCIA
SUSPIKAZIA
TXIXAPARRAZTA
SENEKA
SEKUENTZIA
KUKIS BAND

Batzar irekia deitu du biharko Xakela Asanbladak

2005-10-14T10:24:00.000+02:00

[Argazkia: Hodei Esteban].

Gaztetxeaz, okupazioaz eta Zarauzko gazteen beharrez hitz egiteko batzar irekia deitu du biharko Xakela Asanbladak. Deialdia Euskadiko Kutxaren aretoan izango da [hau da hau: okupazioaz eta gaztetxeaz solasean banku bati eskatutako aretoan!], arratsaldeko 15:30ean.
Azken asteotan, Xakela Asanbladak gazteen aldarrikapenari buruzko informazioa zabaldu du postontzietan, eta egunotan atxikimenduak jasotzeko kanpaina dute abian. 18:00etatik 20:00etara, esaterako, Musika Plazan eta Kale Nagusian atxikimenduak jasotzen aritzen dira.
Euskal Asteko herri bazkarian asanblada herritarren aurrean aurkeztu zutenetik, hainbat ekitaldi ere antolatu ditu. Besteak beste, Okupazioaren Aldeko Festa edota Gaztetxe Eguna.

Manuel Lasarteri buruzko dokumentala ETBn

2005-10-13T11:12:00.000+02:00

Aspaldiko partez, luxuzko zerbait ikusteko aukera izan genuen atzo iluntzean ETB1en. Antza denez, Guardia Zibilaren eta Hispanitatearen egunean jai egiten dute oraindik ere, eta atzo, astegunetako ohiko programazioa aldatu eta Bertatik Bertara saioaren ordez, aurrez grabatutako zerbait ikusarazi ziguten.
Atzokoa, ordea, luxuzkoa izan zen.
Askotan hitz egin, idatzi eta aipatu izan dugu iraingarria dela ETBren ildoa, eta gogoeta sakona behar duela. Atzo, salbuespen moduan, harribitxia eskaini ziguten: Manuel Lasarte bertsolariari buruzko dokumentala. Lasarteren bertsoak, bere gogoetak eta hitzak, eta hura ezagutu dutenen iritziak ere bildu zituzten dokumentalean. Tarteka, altxor ederrak ikusi ahal izan genituen. Basarriri 1985eko maiatzean Zarautzen egindako omenaldia, besteak beste [Joxe Lizasok Azken Portun kantatzen ari zirela ere bota zuen bertso batean].
Telebistaren aurrean eseri, eta aspaldian gertatu ez zitzaiguna gertatu zitzaigun atzo: dokumentalaren aurretik ezin mugitu, ezin afaria prestatzera sukalderatu. Baina merezi izan zuen ohi baino beranduago afaltzeak. Lasarteren bizitza eta lana hobeto ezagutzeko aukera izan genuen askok eta askok. Dagoeneko galduta dagoen bertsolaritza molde batean oihartzun ederra.
Atzo zer ospaturik ez zegoela-eta goizean lanera eta klasera joateko deia egin zuen euskal gizartearen ordezkaritza batek. Eta eskoletan ohiki erakusten ez den historia eta kontuak ikasteko aukera izan zuten klasera joan zirenek. ETBn ere, segur aski nahi gabe egin zuten arren, aspaldian eman diguten ikasgai ederrena eman ziguten.

Kuba eta Venezuelari, esker onez

2005-10-11T19:22:00.000+02:00

Munduaren alde honetan amets egitea ahazten ari zaigun garai hauetan, oraindik ere kolore guztiek lekua izango duten mundu batean sinesten dugunok inoiz baino beharrezkoagoa dugu betiko ameslariei harrera egin eta eskerrak ematea.
Koherentzia zer den erakutsi digute urtez urte kubatarrek, eta kapitalismoaren sudurren aurrean zutik irauten jakin dute, duintasunez, zaila baita egia blokeatzea.
Venezuelan, berriz, iraultza isilaren taupadak isilarazteko ahalegina etengabea da oraindik ere. Aberatsek ezin dute onartu herriak aukeratu eta herriarentzat bidea egiten duen lagun bat egotea agintean.
Horregatik, asteburu honetan, hainbat lagun elkartuko da Salamancan, Espainian, Kuba eta Venezuelari elkartasuna adieraztera. Fidel Castro eta Hugo Chavez bertan izango dira, Iberiar penintsulako eta Hego Ameriketako agintarien goi bileran.
Haiei harrera egin, eta amets egin daitekeela erakusteagatik eskerrak emateko aukera ederra da. Eta oraindik badago lekua autobusetan joateko.
[Informazio gehiago: http://www.euskalherria.indymedia.org/eu/2005/10/22755.shtml].

Lurrikara berria Itoitz inguruan: gaurkoa 2,2 gradukoa Richter eskalan

2005-10-10T19:40:00.000+02:00

Itoizko Koordinakundeak gaur adierazi duenez, bertako urtegia ekainean husten hasi zirenetik dagoeneko 24 lurrikara izan dira urtegiaren inguruetan ditu. Azkenekoa gaur bertan erregistratu du Estrasburgeko Unibertsitateak 01:45ak aldera, eta epizentroa Abaurrea Gainean izan du.
Koordinadoraren arabera, Estrasburgo Unibertsitateak aurrera daraman azterketa sismologikoak mugimendu berri bat jaso du gaur gauean, Itoizko urtegitik 8 bat kilometrora.
Bestalde, lekukoen arabera, aurreko larunbatean ere zarata handi bat entzun zen inguruetan, 18:45ak aldera.

[Argazkia: www.sositoiz.com].

Bizilagunek eta hainbat talde, elkarte eta erakundek behin eta berriro salatu dute arrisku larria bizi dutela Itoizko urtegiaren behealdeko herriek, lurrikara handi baten arriskua oso litekeena baita.
Urtegia baino gorago zeuden 11 herrik dagoeneko ez dute arriskurik.
Hondeamakinek eraitsi zituzten bere garaian.

ITOITZ EZ ITO!!!
ITOITZ, ARTOZKI, BIZIRIK!!!

FNAC Donostian

2005-10-10T13:16:00.000+02:00

FNAC Donostian izan naiz gaur, lehen aldiz.
Etxe frantziarrak oraintsu ireki du lehen egoitza Euskal Herrian, eta ezagutzeko gogoa nuen.
Donostian, orain arte, Bilintx Megadenda genuen liburuak eta diskoak erosteko bilgune nagusia. Ez zuen monopolioa, jakina, baina zerbaitek bultzatzen gintuen bertara.
Nahiz eta askotan haserretu megadenden politika komertzialarekin eta euskal irakurleak tratatzeko moduarekin, hala ere, han erosten genituen eta erosten ditugu liburuak edota diskoak, beste lekuetako eskaintzei ere uko egiten ez diegun arren, jakina.

Orain beste aukera bat dugu: FNAC Donostia. Ez da Bartzelona edota Pariskoaren parekoa, baina ez dago batere gaizki.
Liburuetan, diskoetan eta DVDetan soilik aritu naiz begira gaur goizean, eta ezbairik gabe, dagoeneko, Donostiak duen liburu, disko eta DVD denda onena dela esan dezaket. Beti ere nire iritziz.

Nobedadeez gain, liburu zaharragoak, disko zaharragoak eta film zaharragoak ere aurki daitezke. Asko, gainera, prezioz oso ondo.

Ni behintzat, konbentzitu egin nau eskaintzak. Egundoko denda iruditu zait FNAC Donostia.
Hasteko, gainera, Federico Fellini oinarrian duen 40 argazkiren erakusketa paratu dute, zinema eta argazkilaritza uztartuz eta Gideon Bachmann argazkilariaren lana erakutsiz.

Kapitalismo basatian bizi gara.
Saltzea da kontua.
Eta guk erostea.
Loreak ere saltzeko haziarazten dituzte hemen.
Zilegia izango dugu, bada, eskaintza onena hautatzea, erabat lelotu eta adimena baztertu gabe, noski.

Gazte Kontseilua aurkeztuko dute bihar Zarautzen

2005-10-07T09:54:00.000+02:00

"Hitza eta erabakia” bideratzeko tresna modura, Gazte Bilgunea aurkeztu zuten hainbat gaztek hedabideen aurrean, Euskal Herriko Gazte Kontseilua aurkezteko bitarteko bezala.
Euskal gazteen eskubideen agiria osatu, eremu ezberdinetan lan egiten duten elkarte, mugimendu eta norbanakoekin diagnosia egin, ekarpenak jaso eta lehenengo biltzarra egin ondoren, kontseilua abiaraztea zuten helburu. Bada, bidea eta lanak eginda, bihar arratsaldean aurkeztuko dute Euskal Herriko Gazte Kontseilua, Zarautzen egingo den Nazio Eztabaidaren ekitaldien baitan.

Honakoa da GAZTEOK GEUREA: GAZTE KONTSEILUA izenburupean hainbat gazte erakundek ezagutarazi duten oharra:

“Denok dakigu gazteok kolektibo zapalduenetakoa garela, eskubide urrienak ditugula eta geure etorkizuna bermatzeko ez dugula ahalbiderik. Urteen iraganak erakutsi digu geure indarrez antolatu eta borrokatuz soilik lor ditzakegula geure helburuak. Bada, ordea, zorionez, etorkizunera begira sortu den proiektu berri bat: Gazte Kontseilua.
Euskal Herriko gazteoi egun ezarriak zaizkigun hiru erakunde arrotzetatik inork ez du gazteriari buruzko politika eraginkorrik garatzen. EAE, Nafarroa edota Iparraldeko erakundeek gazteen alienazioa, sistemarekiko esklabutza eta etsipena besterik ez digute eskaintzen. Ondorioz, ez da harritzekoa gazteok udaletxe edota diputazioengan sinesgarritasun falta ikaragarria izatea.
Horma hauek erausteko sortu da Gazte Kontseilua, herritarren sortu duten instituzio nazionala, bere helburua gazte problematika osatzen duten alor guztietara iristea delarik. Horretarako, egoeraren azterketa sakon bat egiteaz gain, ze eskubide eta betebehar ditugun zehaztu eta hauen defentsa egingo du.
Bada garai gazteoi entzun eta erantzungo digun instituzio bat izateko! Nazio Eztabaidaguneak larunbat honetarako antolatu duen Nazio Eztabaidaren barruan, arratsaldeko 16:00etatik aurrera Gazte Kontseiluaren aurkezpena egingo da Salbatore Mitxelena ikastolako bigarren solairuan.
Gutun honen bitartez, Zarauzko gazte guztiak bertara joatera gonbidatzen ditugu. Gure ahotsa entzun eta etorkizuna eraikitzeko tresna eraginkorra izango dena ezagutu eta guregatik egin dezakeenaz ohartzeko, gazte antolakuntzaz gazte boterea osatzeko”.

Bizigune programa [edo espekulazioa nola elikatu diru publikoarekin]

2005-10-06T11:40:00.000+02:00

Gaur eguerdian Bizigune programa bultzatzeko hitzarmena sinatuko dute Zarautzen bertako alkatesak eta Javier Madrazok, Eusko Jaurlaritzako Etxebizitza eta Gizarte Gaietako sailburuak.
Hasiera batean, itxura ona du Bizigune programak.
Azken batean, hutsik dauden etxebizitzak alokairu “merke” batean etxebizitza behar duten herritarren eskura uztea da asmoa. Horretarako, udalek etxebizitza hutsen errolda egin, eta Eusko Jaurlaritzak etxe horien jabeei 18.000 euroko laguntza ematen die, etxea berritu eta bost urtez etxebizitza Eusko Jaurlaritzaren esku uzteko.
Ondoren, Eusko Jaurlaritzak etxebizitza alokairuan jartzen du, merkatuko prezioan baino merkeago, eta hori da hautaketa prozesu baten ostean (eta ez zozketa bidez) aukeratu duten maizterrak Eusko Jaurlaritzari ordaintzen dion kopurua.
Kopuru horren eta merkatuko prezioaren arteko ezberdintasuna, ordea, Eusko Jaurlaritzak ordaintzen dio etxearen jabeari. Horrela, espekulazioari eusten eta ordaintzen dio Eusko Jaurlaritzako, Etxebizitza eta Gizarte Gaietako sailak, guztiok ordaindutako diru publikoarekin, jakina.
Intentzioak itxura ona duen arren, errealitatea bestelakoa da. Azken batean, praktikan, politika honekin espekulazioa elikatzen du Eusko Jaurlaritzak. Ez du ezer egiten arazoa konpondu eta alokairuzko etxebizitzen prezioak behera egiteko. Are gehiago, elikatu egiten ditu prezio horiek, espekulatzaileei diru publikoarekin ordainduz.

Egiak

2005-10-05T14:45:00.000+02:00

[Testua: Jon Benito].

Mozorroa da hipokresiaren lehen seinalea. Eta Euskal Jaiek ere badute hipokresiatik. Eta ez gutxi.
—Vascoagoa haiz orain? –esaten dit Mariak, abarkak eta milrayasak jantzita lepoko zapia lotzen ikusten nauenean ispiluari begira.
—…
—Nola sentitzen haiz mozorroaren azpian? –esaten dit.
—Ni ohitua nago gutxienez urtean behin janztera.
Irten gara lagunekin gosaltzera kalera, mozkortu gara, hitz egin dugu honekin eta bestearekin: urtean zehar hitz egingo ez genukeen jende pilarekin. Politikaz eta gure arazo eta aber(r)iez, baina lagunak bezala, nola ez!. Horretan ere oinarritzen baita jaia.
—Euskal jendea!, giro jatorra! –esaten dit Mariak, inguruko jendeari begira. Baina, nago, ez ote den estereotipoez gehiegi fida, ez duen kanpoko mozorroak txunditu. Euskal Herrikoa baino, Euskadi autonomikokoa dela herri hau oraindik, abisu nik.
Mundu bat abarkak jantzita, mundu bat zapiekin, mundu bat txapelarekin: baina txapela buruan eta norbera bere munduan.
Guk ere atera ditugu argazkiak, foto-album digitaletarako, ez ahanzteko, egun batez gu ere izan ginela basko mozorrotuak.
—Ez esan ez denik estanpa ederra! Begira ze itxura ematen dugun!
Gutxienez oinetan babak aterako balitzaizkigu abarkengatik… baina ez.
Eta deabruaren egia bat hortik, oihu betean:
—Ni baserritarra nauk eta zuek ez duzue nire antzik!
Gure azken diseinuko baserritar trajeekin ikusten gaituela, garbi eta orbanik gabe, okasiorako jantzita.
Eta gu lotsatu ez. Zer da ba euskalduntasuna, egun bateko mozorroa ez bada?
—Folklorea da! –esaten dit Mariak.
—Nahiago dinat folklorea baino Folkcore –esaten diot.
Folklorea heriotzaren aurrekaria baita: museizazioa. Eta horretan gaude. Tabernetan sartu eta musika vascoa jartzen badute, urtean behin, gupidagatik:
—Quita esta puta musica! –oihu jendeak, eta arrazoi dute: Zertarako alferrikako mozorroak eta egun bakarreko gupidak!
Ez gaitezen engaina, fiestaren vascoa, jaiaren euskalduntasuna egun bateko mozorroa besterik ez da, abertzaletasunaren paradisua den zuen herri arazorik gabe horretan.
Eta euskalduntasuna ere ez da arazo bat: jaia da. Nola izango da ba arazo mozorro bat?
—Gaur antolatu behar zuten manifestazioa?
—…
—Festak politizatzen dituzue!
—Noski! –nik.
Marmarka entzuten nau Mariak, kontu hauekin nabilela. Kezkatu egiten da.
—Gehiegi tematzen haiz!
Marmarka jarraitzen dudala ikusten du, baina beste lagunak ohituak dauzkat, eta apenas egiten didaten kasurik.
Baina gaztigu hartzen diet, mozkorrek, umeek eta inozoek bakarrik ikusten ditugula egiak. Eta egia horiek ajea uzten dute.
Nazkatu ditut Maria eta ingurukoak letaniarekin: zuzenegia, txepelegia, txoroegia, zuriegia, dela hau. Faltsuegia, hipokritegia. Eta buruan borborka ditudan –egia gehiago. Beranduegi da ezertarako baina.
Horrela ibili ginen ni eta nire kontuak, Fiesta Vascak amaitu, nekeak jo eta etxera erretiratu arte.

Aupa Etxebeste! eta Obaba

2005-10-05T14:31:00.000+02:00

Zineman bi film ikusi ditut azken lau egunotan: Asier Altuna eta Telmo Esnalen lehen luzemetraia, “Aupa Etxebeste!” eta Montxo Armendariz nafarraren “Obaba”.

Biak ikusteko gogoa nuen, arrazoi ezberdinengatik.
Azken ez dakit zenbat urteotan euskaraz filmatu den luzemetrai bakarra da “Aupa Etxebeste!”, eta horrek, dagoeneko, ikusmina sortu dit niri behintzat. Telmo, gainera, dantza irakaslea izan genuen sasoi batean, zenbait urtez, Iratzarri dantza taldean aritzen ginenean. Aspaldiko kontuak dira, baina ordudanik Telmoren lana eta umorea konplizitate apur batekin jarraitu dugu.
Telmo zarauztarra izateaz gain, lau aktore nagusietatik bi eskualdekoak dira: Iban Garate azkoitiarra eta Elena Irureta zumaiarra. Javi Aguirre argazki zuzendaria, eta Alazne Ameztoi soinu laguntzailea, berriz, koadrilakoak ditugu. Arrazoiak soberan, bada, “Aupa Etxebeste!” ikusteko.
Filma gustatu zait. Itxurakeria hutsa den gizarte kapitalista honetaz irribarre egiteko komedia polita iruditu zait, eta filmaren garapena egokia iruditu zitzaidan. Alberto Irazuk “Berria” egunkarian idatzi zuen moduan, akaso etxebestetarren etxe barruko kontuei punta gehiago atera ziezaioketen zuzendariek, baina bere horretan ere, ahalegin eta emaitza txalogarria iruditu zait filma.

Obabari dagokionez, aurreritziekin sartu nintzen atzo zinemara. Batetik, zinemaz asko dakien idazle batek batere ez zitzaiola gustatu esan zidan, eta bestetik, Atxagak “Obabakoak” liburuan bildutako giro berezia nola islatuta zegoen jakiteko gogoa nuen.
Filma ikusita, Armendarizek Atxagaren unibertso literarioa islatzen asmatu duela iruditu zait. Ez du batere erraza izan behar “Obabakoak” liburua hartu eta film bat egitea. Halabeharrez, istorioak aukeratu behar dira, eta horietako hiru aukeratu ditu Armendarizek. Aukeratu dituen hirurak ederrak dira, politak, baina geldoak. Eta filmaren erritmoa ere oso geldoa da. Dena dela, gustura ikusten da filma, eta amaieran gora eta gora egiten duela esango nuke. Ni behintzat sentsazio horrekin atera nintzen zinematik. Ederki harilkatuta daude hiru istorioak, eta hirurak lotzeko Obabara doan zinema ikasle gaztearen inguruko istorioa ere ederra da, eta asko irabazten du amaiera aldera.

Bi filmak oso ezberdinak dira. Bi mundu biltzen dituzte. Bi ikuskera. Bi estilo. Nik biak gustura ikusi ditut.

Vista Alegren entseatzen duten musika taldeen bilera

2005-10-04T11:34:00.000+02:00

Zarauzko Vista Alegre auzoan Udalak utzitako lokaletan entseatzen duten musika taldeek bilera deitu dute ostegun honetarako. Bilera entseatzeko lokaletan bertan izango da, 20:00etan.
Antza denez, Udalak zenbait lan egin ditu eraikinean, are gehiago intsonorizatzeko, eta taldeek leku gutxiago dute orain. Gainera, diotenez, 22:00etatik aurrera ez dute entseatzeko baimenik, eta hori arazoa da hainbat talderentzat. Horrez gain, hainbat musika talde berri omen daude entseatzeko lokaletan aritzeko baimenaren zain, eskaera eginda.
Hau guztia ikusita, taldeek lokal gehiago behar direla diote, eta Vista Alegre auzoan entseatzen duten taldeen eta bertan entseatu ahal izateko eskaera eginda dute taldeen bilera deitu dute ostegunean, arazoaz hitz egin eta zerbait erabakitzeko.

En cada barrio, Revolución!

2005-10-03T12:00:00.000+02:00

"Etxera itzultzea, batzuetan, daitekeen gauzarik zailena da".

Joseba Sarrionandia

Etxera itzultzea, batzuetan, asko kostatzen da, batez ere bi asterako oporretara joanez gero.
Hala ere, gehiago kostatzen zaie urteetan zehar etxera itzuli ezinik dauden herritarrei.

Gu herrialde komunista batean izan gara.
Duintasuna zer den egunez egun erakusten duen herrialde gorri eta errebelde batean.
Luze idatziko genuke Kubari buruz, bertako jendeari buruz, eguneroko bizimoduari buruz, eta abar.
Baina gaur laneko lehen eguna ere bada, eta ez dugu denbora askorik izango...

Lanarekin batera, egunero ordenadorearen aurrean aritzeko aukera izango dugu, eta ea Azken Portu hau berriro ere bizitzen dugun, denon artean.
Bada zer kontatua behintzat.
Gaurtik aurrera, berriro, ametsak biltzen ahaleginduko gara.

Amelie oporretan

2005-09-14T11:47:00.000+02:00

Aupa lagun!
Oporraldia baliatuz, lorategiko gnomoak hartu, eta Amelie eta lagunak itsasoaren beste aldera joan dira, atseden hartzera.
Urriaren hasieran itzuliko gara, kontu berriekin, azken portua berriro ere ametsez betetzera.

Ordura arte, gaiztoak izan!

Ispiluekin zirika

2005-09-14T09:21:00.000+02:00

Gazte denboran lehen aldiz irakurri nuenetik, beti izan dut gustukoa merkatari aberatsaren morroiaren ipuina. Bagdadeko azokan Heriotza ikusi, eta izututa egin zuen ihes Ispahanera, Heriotzak amenazuzko keinu bat egin ziolakoan. Heriotzarena, ordea, harridurazko keinua omen zen, eta ez amenazuzkoa, harritu egin baitzen merkatari aberatsaren morroia Bagdadeko azokan ikusteaz, Ispahandik hain urrun, gau hartan Ispahanen hartu behar zuelako morroia.
Henry Bengoaren koadernoko laugarren orrialdean ipuin horri buruz irakurritako komentarioa ere ipuina bera bezain zorrotza da, eta fatalitatearen aurka borroka gaitezkeela dio. Ispahango kaleetan, ezkutatu ahal izateko bateko eta besteko ateak joka ibili ondoren, Kalbum Dahabin izeneko ispilu egileak zabaldu zion atea morroiari. Haren dendara iritsi zenean, Heriotzak aukeratu behar izan zuen, morroi bakar bat beharrean, bost, zazpi, hamar morroi berdin ikusten zituelako, benetakoa zein zen jakin gabe.
Antzera irudikatu dut azken egunotan izeko. Heriotzari aurre egin eta fatalitatearen aurka borroka egin zuen behin, oraindik haurrak ginenean. Adore berarekin jardun zuen gazteagoak ginenean, eta orain ere, hirugarren aldiz, ispiluekin zirika aritu zaio Heriotzari, alaba ezkondu eta eztei-bidaiatik itzuli den arte. Orduan soilik utzi dio nahi duena egiten, eta honek, errukirik gabe, atzo goizaldean eraman zuen izeko. Baina atzo eta gaur beilatokian haren aurpegi zurbilari begira jarrita, zehatz kalkulatutakoa lortu duenaren irribarre egoskorra sumatzen diot oraindik.

Adiorik ez, izeko. Maite zaitugu!

Euskal Jai eguna, bihar

2005-09-08T18:18:00.000+02:00

Bihar da Euskal Jai Eguna. Zarauztarrek eta kanpotik etortzen direnek, aurten ere, festarako eta aldarrikapenerako hainbat aukera izango dute bihar.

Ondo pasatu!!!

IRAILAK 9, BIHAR, EUSKAL JAI EGUNA

Zarauzko Udalak —Turismo bulegoaren eskutik— eta Gurekin Jai Batzordeak hainbat ekitaldi antolatu dituzte aurten ere Euskal Jai egunerako. Goizean goizetik hasi eta bihar goizaldera arte, nahi duenak, izango du festarako aukerarik.
Hauek dira egitarauak:

GUREKIN JAI BATZORDEA:
· 11:00. Txosnak irekiko dituzte.
· 13:00. Sagardoari nork txinparta hobea atera,
II. Lehiaketa Txosnetan eta Txapel Jaurtiketako I. Txapelketa.
· 18:30. Dantza eta Irrintzi Txapelketa txosna gunean.
· 20:00. Manifestazioa abiatuko da Musika Plazatik: Orain herria, orain bakea lelopean.
· 20:30. Trikitake eta The Solano’s taldeekin goizaldera arte parranda txosna gunean.

ZARAUZKO UDALA, TURISMO BULEGOA:
· 07:00. Goiz eresia.
Aldi berean. Goiztarrak taldearen irteera.
· 08:30. Txistulariak, trikitilariak, dultzaineroak
eta Iturengo ttuntturroak irtengo dira.
· 10:30. Herri meza izango da frantziskotarren elizan.
Ondoren. Frontoi txikian, Goiztarrak taldearen eskutik, pilota partidak, herri kirolak
eta bertsolariak.
· 11:30. Alproja taldearen irteera. Azpeiti bidean, Kale Nagusian, Musika Plazan, Azara Kalean, Nafarroa Kalean ibiliko dira Munoan amaitzeko.
· 12:00. Munoan, Alproja taldearen antzezlana: Kupidoren gezi eroa.
· 12:30. Parrokiatik karrozak aterako dira, Kale Nagusian barrena ibili eta Torre Luzearen parean geldituko dira.
· Eguerdian. Musika Plazan erromeria trikitilariekin, dultzaineroekin eta txistulariekin.
· 14:00. Musika Plazan Larraindantza herrikoia dultzaineroekin.
· 17:30. Musika Plazatik Iñurritzara kalejira, karroza, trikitilari, dultzainero eta txistulariekin.
· Ondoren. Iñurritzako zelaian erromeria.
· 19:15. Iñurritzan Larraindantza herrikoia dultzaineroekin.
· 20:30. Kalejira Iñurritzatik Musika Plazara.
· 23:00. Musika Plazan erromeria izango da trikitilariekin.
· Gauean. Txosna gunean dantzaldia izango da Trikitake
eta The Solano’s taldeekin.

Ogra Shinn Fein

2005-09-07T11:46:00.000+02:00

Gaurko Urola Kostako HITZAn irakur daitekeenez, Irlandako Sinn Fein alderdi errepublikarreko gazte erakundeko kideen hitzaldia izango da gaur Zarautzen. Honakoa da HITZAk dakarren berria:

"Euskal Herritik mundura, mundutik Euskal Herrira" lelopean, Ógra Shinn Fein erakundeko kideek hitzaldia emango dute gaur arratsaldeko 19:30ean, Antoniano aretoan. Segi gazte erakundeak antolatu du Irlandako Sinn Fein alderdi errepublikarraren gazteak biltzen dituen erakundeko kideen hitzaldia. Hizlariek, besteak beste, Irlandako bake prozesua izango dute hizpide, ingelesez, eta itzultzailea ere izango da entzuleentzat.

Leihoa debekuen gainean

2005-09-06T18:33:00.000+02:00

"Preso politiko uruguaitarrek ezin dute baimenik gabe hitz egin, txistua jo, irribarre egin, abestu, azkar ibili eta beste preso bat agurtu. Ezin dituzte margotu, ezta jaso ere, emakume haurdunen, bikoteen, tximeleten, izarren eta txorien marrazkiak.
       Didasko Perezek, eskolako maisuak, torturatua eta ideia ideologikoak izateagatik preso dagoenak, igande batean bost urteko Milay bere alabaren bisita du. Alabak txorien marrazki bat dakarkio. Zentsoreek kartzelaren sarreran hausten diote.
        Hurrengo igandean, Milayk zuhaitzen marrazki bat dakarkio. Zuhaitzak ez daude debekatuak eta marrazkiak aurrera egiten du. Didaskok lana goraipatzen dio eta zuhaitzen hostoetan agertzen diren koloretako zirkuluetaz galdegiten, arramen arteko zirkulu txiki ugari horietaz:
        —Laranjak al dira? Zer fruta dira?
        Haurrak isilarazi egiten du.
        —Ssssshhhh.
        Eta sekretuan azaltzen dio:
        —Babua, Ez al duzu ikusten begiak direla? Izkutaturik ekarri dizkizudan txorien begiak".

[Testua: Eduardo Galeano. Itzulpena: Vladimir, 6. alea. 1998ko apirila].

XAKELA ASANBLADA sortu eta aurkeztu dute

2005-09-04T18:06:00.000+02:00

Atzo arratsaldean, Herri Bazkariaren osteko ekitaldian, zenbait gaztek, txotxongiloen bidez, Musika Plazan XAKELA ASANBLADA berria aurkeztu zuten plazan bildutako ehunka eta ehunka lagunen aurrean.
Gazteek, gaztetxe baten beharra nabarmendu, eta horren alde lan egin beharra aipatu zuten.
Gauean ere, Tapia eta Leturiaren kontzertuan, oholtzara igo eta musikariek lagunduta, gaztetxearen aldeko abestia kantatu zuten hainbat lagunen artean.

[Argazkia, larunbat gauekoa: txosna gunean, Tapia eta Leturiarekin batera, Xakela Asanblada aurkeztu gaztetxearen alde abestu zuten gazteek. Honako hau, berriz, Herri Bazkarian mahaietan banatu zuten aurkezpen testua da]:

"Aupa lagun!

Aspaldian kalean ibili bazara, konturatuko zinen gazteok mugimendu eder bat osatu dugula; kaleko giroa berotu egin dela. Antzerkiak direla, parodiak ikusten direla, zineak, denborapasa eta jokoak, kartelak, pankartak… Presentzia nabarmena izan da, gure beharra ere halakoxea delako; espazio fisiko bat behar dugu, geure erara gestionatutako leku bat, non gure kezka eta aldarrikapenak aurrera eramango ditugun.

Gu kalean egotearen eta kalean gauzak egin beharraren erantzule nagusia Udala eta gazteokiko duen politika izan dira. Zarauzko gazteak garen heinean, bertako agintariak dira arazo honi irtenbidea eman beharko lioketenak. Baina Udal honen pasibitatearen aurrean ez gara geldirik egon, eta ez gara egongo. Honela, gaurko honetan gazteontzako eta Zarauzko herriarentzat leku fisiko bat aldarrikatzera gatoz, eta honekin batera espazio hori lortu nahi duen XAKELA ASANBLADA aurkeztera.

XAKELA gaztetxe baten bila dabil, gure herriak ere espazio fisiko libre eta autogestionatu bat behar duelako; non bertan bilduko garenon artean harremanak sakonduko ditugun, pertsona bezala formatuko garen, aisialdia geure erara antolatuko dugularik, sistema honek inposatzen dizkigun balore kapitalistei gure erantzuna emanez.

XAKELA ASANBLADAk bilatu eta proposatzen duen zarauztarron elkargune hori asanblearioa eta parte hartzailea izango litzateke, guztiok hitza izango genukeelarik eta guztion hitza errespetatuz. Inongo bazterketarik egin gabe sexu, arraza eta adin “ezberdinekoen” artean.

Beraz, ematen ez digutena denon artean lor dezagun, parte hartzera animatzen zaituztegu, bai egingo diren ekimenetan bai asanbladan ere. Herriak behar duelako, gaztetxea aurrera!!!

Xakela Asanblada".

Okupazioaren Aldeko Festa antolatu dute irailaren 10erako

2005-09-01T12:32:00.000+02:00

[Oharrarekin batera honako kartela ere helarazi dute hedabideetara eta beste hainbat lekutara.

Orain arte Zarautzen ezezaguna zen Xakela Asanbladak jakinarazi duenez, Okupaziaren Aldeko Festa izango da irailaren 10ean Zarautzen.
Hedabideei helarazitako oharraren arabera, abian da "ZAGA 10 urtez" cd bilduma, "bertan zarautz herriko hainbat taldek parte hartu degu gurea ez den estilo bateko kantak joz!!! Irailaren 10ean munoa plaza okupatuko degu disko honen aurkezpena egiteko. Bertan OKUPAZIOAREN ALDEKO FESTA egingo dugu, eta cd bilduman parte hartu duten taldeen kontzertua egongo da, eta honez gain sekulako jai giroa, malabarak, musika, txupito festa, zerbeza, ura, eta kiston festa!!! hasi prestatzen, egun horretan erakutsi behar diogu udalari nor garen!!! Mesedez animatu danok etortzera!!!!
*ASKO ESKERTUKO GENUKE HEMEN DAUKAZUEN KARTEL HAU ZUEN HERRI ETA INGURUETAN PEGATU ETA ZABALTZEN LAGUNDUKO BAZENIGUKETE!! MILA ESKER".

Badator

2005-09-01T09:22:00.000+02:00

www.gaztesarea.net webgunean irakur daitekeenez, "Zarauzko gazteek gaztetxea badatorrela iragarri dute".

[Abuztuan Bizikleta Martxa Berdea egin zuten gazteek, BADATOR iragartzeko].

Gaztesarearen arabera, "Zarauzko gazteak martxan dira dagoeneko gaztetxe berria lortzeko bidean. Azpeitiko gazteen eredua hartuta gune liberatua eta autogestionatua lortzeko dutela eman dute jakitera".
Hori osatze aldera, "Zarauzko gazteen oharra" delakoa ere irakur daiteke:
"Guztiok poztu gara Azpeitiko gazteek duela gutxi, urteetako borrokaren ondorioz, ederki merezitako Gaztetxea lortu dutela jakin dugunean. Izan ere, gazteok elkartu, gure arazoez hitz egin, konponbideak gauzatu eta ekimenak egiteko espazio fisiko baten beharra logikoa da edozein talde edo kolektiborentzat.
Zarautzen, ordea, ez dugu horrelako lekurik eta behar larria ikusten dugu.
Beraz esan Zarauzko eta inguruko gazteei zarautzen ere badatorrela!!!
Adi beraz gazteok eta esnatu!".

Do The Croket blogean (www.fotolog.net/erantzun) atzo agertutako testuan irakur daitekeenez, bestalde, girorik ez da faltako Euskal Jai hauetan Zarautzen: "Bueno ba zarautzen ya txosnak eta jartzen ai dia eta cd rekopilatoyua ere martxan dijua!!! Hasi prestatzen egun hauetan Zarautzek sua hartuko du eta!! Preparatzen hasi 9 eta 10eako!!!".
Herenegun ere, antzekorik irakur zitekeen blog berean: "Bueno ta pixkanaka gogoratzen hasten naiz irailak 10ian Zarautzen kiston festa eongo dala. Herriko plaza bat okupatuko deu eta kontzertuak eta mila sorpresa izango dia!!! Asi planak iten!!!".

Zehazki, irailaren 10erako Munoan gazteek antolatu duten Okupazioaren Aldeko Festa dute hizpide hitz horietan.
Herriko hainbat tabernetan ikus daitezkeen kartelek iragartzen dutenez, larunbatean, irailaren 10ean, gauean, Okupazioaren Aldeko Festa antolatu dute, eta herriko hainbat talde entzuteko eta ikusteko aukera izango da.

Saiatuko gara kontu honi buruzko informazio ahalik eta zehatzena ematen hurrengo egunotan.

Espekulazioak ez du etenik

2005-08-31T12:33:00.000+02:00

[Aurreko astean, etxean, logelako leihoa zabaldu eta aspaldian itxita eta hutsik zegoen pareko etxebizitzan iragarki hau agertu zen: SALGAI. Telefonora galdezka deitu, eta 49 milioi pezeta, eta berritzeko beharra. Iragarkiak ez du astebete ere iraun. Aste honetan kendu dute, dagoeneko etxea salduta].

Parisen hogeita lau hildako eragin ditu espekulazioak astebetean. Atzo, Frantziako 50 gizarte erakundek, langilek eta etxebizitza sozialen aldeko elkarteek bizileku duin bat edukitzeko nazioarteko eskubidea onartzeko eskatu zioten Gobernuari. Suak erretakoak eta suari ihes eginez leihotik salto egin ondoren odol putzuen erdiak geratutako haurren irudiak ikusi behar izan ditugu horretarako. Bitartean, hainbat elkarte etengabe lanean eta egoera salatuz jardun arren, arazoa ezkutatu egin digute espekulatzaileek, agintariek eta hedabideek. Hiltzeko modu ugari dagoela abesten genuen gazteagoak ginenean, badakigu. Hiltzeko modu ugari dago gaur egun ere.

Gurean ere, espekulazioak ez du etenik. Azken Portun eta Zarautzen 3.389 etxebizitza huts daudela salatu dute asteburuan gazteek. Hemen ere, ordea, datua ezkutatu egin digute espekulatzaileek, agintariek eta hedabideek. Inon ez da ageri soldataren erdia joaten zaigula alokairua ordaintzen. Inon ez da ageri koadrila erdiak inguruko herrietan exiliatu behar izan duela. Inon ez da ageri hirigintza zinegotzi izandakoek non eta zergatik erosten dituzten lokalak eta etxeak. Inon ez da ageri espekulazioak alfonbra gorria zabalik duela gurean. Inon ez da ageri denon eskubidea batzuen negozioa bihurtu dela hemen, eskupekoen isiltasunak lagunduta.

Gurekin Jai Batzordearen prentsaurreko agerraldia

2005-08-30T19:41:00.000+02:00

Gaur arratsaldean prentsaurrekoa eman dute Gurekin Jai Batzordeko kideek, Azken Portuko txosna gunean.
Hau da bertan esan dutena.

"Aurten ere iritsi zaigu Udararen amaiera, eta horrekin batera Euskal Jaiak. Gurekin Jai Batzordetik lan mardula egin dugu aurtengo Euskal Jaietarako programa osatzerakoan.

Egitaraua osatu eta festak antolatzerakoan, ondoko irizpideen arabera aritu gara:

— Herritar guztientzako festa egitaraua osatu: Zarauztar gazte zein helduentzako egitaraua osatu dugu, erromeria eta trikitixarekin batera perkusioa eta afari bereberea bezalakoak jarri ditugu. Ez da izango beraz, soilik gazteei zuzendutako festa, herri osoarentzako festa baizik.

— Festa parte hartzaileak bultzatu: euskal jaien inguruan txosnetan antolatu ditugun jaiak parte hartzaileak izan daitezen ahalegindu gara. Horrela, ostiralean nahi duen guztiak perkusio afrikarreko ikastaroa egin ahal izango du. Euskal Jai egunean bertan ere, hainbat txapelketa antolatu ditugu, txapel jaurtiketa, irrintzi lehiaketa, e.a.

— Kultur aniztasuna bultzatu: euskal jai hauetan, lehenengo aldiz Munduko Herriekin elkartasun eguna antolatu nahi izan dugu. Euskal Jaietan argi utzi nahi dugu, Euskal Kultura aberatsa dela, eta munduko gainerako kulturak ere presente daudela. Gaur egun, gure herrian etorkinak gero eta ugariagoak dira, eta sarritan esaten da haien integrazioa bultzatu behar dugula. Gutxitan saiatzen gara, ordea, beraien kultura ezagutzen, eta gure egiten, beraiek pertsona bezala errekonozituak izan daitezen. Horrela, aurten afrikari begira jarri gara eta egitarau xume bat osatu dugu, perkusio ikastaroa, bere-bere afaria, Saharari buruzko bideo emanaldia eta kontzertuarekin. Gure aldetik, gonbite berezia egin nahi diegu herrian eta eskualdean bizi diren etorkinei, guregana hurbildu daitezen eta beraien herrietako kultura eta bizimodua erakuts dezaten. Horrez gain, aurten egindako saiakera hau bide baten hasiera baino ez dela azpimarratu nahi dugu eta hurrengo urteetan bide honetan urrats gehiago emateko konpromisoa hartzen dugu. Izan ere, gure herriko jaietan herritar guztiak, zarauztarrak zein munduko edozein bazterretatik etorritako zarauztarrak nahi ditugu.

—Aldarrikapenei dagokien tokia egin: jaiak izanagatik ere, ezin ditugu gure herrian diren arazoak bazterrean utzi. Euskarararen ofizialtasuna, preso politikoen egoera larria eta herri bezala jasaten ari garen zapalkuntza, gazteok jasaten dugun bazterketa, emakumeen aurkako erasoak, e.a. guzti horiek presente izango dira txosna gunean.

— Emakumeen kontrako erasori ez: jakingo duzuenez, Zarautzen azken aldian emakumeen kontrako hainbat eraso larri izan dira. Eraso hauen aurrean, Gurekin Jaik hainbat konpromiso zehatz hartu ditu erasoak gerta ez daitezen, erasotzaileak baztertuak sentitu daitezen eta emakumeak era erosoan festaren parte izan daitezen. Hauek dira aurten aurrera eramango ditugun konpromisoak:
· Txosnetan jarriko den musikan emakume abeslarien presentzia ziurtatuko dugu.
· San Pelaioetarako grabatu dugun musika udan errepasatzea ea osagai sexistak dituzten abestiak ote dauden ala ez. Abesti ez-sexistez osaturiko bildumatxoa egin Euskal Jaietan erabiltzeko.
· Gune ilun eta arriskutsuak identifikatuko ditugu, txosna gunean zein inguruetan.
· Txosnetan jartzeko erasoen inguruko kuñak egin ditugu.
a. Erasoak gaitzesteko eta jendea kontzientziatzeko kuña.
b. Erasoa gertatu bada, sirena hotsa duen kuña.
· Gunearen sarreran pankarta jarriko dugu: “Askatasun sexualeko gunea; hemen ez dugu erasotzailerik onartzen”.
· Erasoen aurkako esku-orria banatuko da.
· Erasoaren salaketa eta asistentzia lanetarako puntu bat jarriko da, Bilgune Feministaren txosnan. Bertan arbel bat jarriko dugu erasoak jasotzeko.
· Erasoen aurrean hartuko dugun jarreraren inguruko protokolo bat idatzi dugu. Protokolo hori txosnetan lanean ari diren guztiei banatuko zaie, erasoen aurrean prest egon daitezen. Era berean, beste protokolo bat banatuko da emakumeen artean, erasotuak izanez gero zer egin behar duten jakin dezaten.

Bukatzeko, egitarauaren berri eman nahi dizuegu:

—Irailak 2, ostirala, MUNDUKO HERRIEKIN I. ELKARTASUN EGUNA:

Arratsaldeko 8etan hasita Txosnetan:
· Perkusio afrikarreko ikastaroa.
· Afari bere-berea.
· Sahara Maraton dokumentalaren emanaldia.
- Ikastaroan ikasitakoarekin eta Safara taldearekin kontzertu-ikuskizuna.

— Irailak 3, larunbata, EUSKARAREN OFIZIALTASUN EGUNA

· Goizeko 9'30etan: euskararen aldeko lasterketa
· Eguerdian: Herri bazkaria, eta bazkalondoan, txistulariak, koroa,
abestiak....
· Arratsaldeko 18:00etan manifestazioa Musika Plazatik hasita, Estatus politikoa orain, konponbidea orain! lelopean.
· Gaueko 23:00etan hasita, txosnetan: Tapia eta Leturia eta Amaiur taldeekin
goizalderarteko parranda.

— Irailak 9, ostirala, EUSKAL JAI EGUNA

· 11:00etarako txosnen irekiera
· 13:00etan, sagardoari nork txinparta hobea atera, II. Lehiaketa Txosnetan eta Txapel Jaurtiketako I. txapelketa.
· Arratsaldeko 18:30ean dantza eta irrintzi txapelketa Txosnetan.
· Arratsaldeko 20:00etan manifestazioa, plazatik “Orain herria, orain bakea” lelopean
· Arratsaldeko 20:30ean hasita, Trikitake eta The Solanos taldeekin
goizalderarteko parranda!, txosnetan".

22:03 dira Parisen

2005-08-30T17:02:00.000+02:00

22:03 dira Parisen. Turista portugaldar bat Lisboako familiarekin barrena igaro da Lepic kalearen amaieratik, ezkerrera egin, eta begi zeharka begiratzen ditu orain sex shopen atariak. Kale horretan, Judith Andrade brasildarraren senarrak duen dendan, Moschi Apterus familiako eltxo bat geratu da bueltaka ari den kebab haragiari itsatsita. Karrika berean, bi turista euskal herritarrek raï musikaren bilduma bat erosi dute saltoki txinatar baten antza duen aljeriar baten dendan, emakume italiar batek zeelanda berriko lau kiwi erosi ditu alboko supermerkatuan, eta jendetza bildu da ilara egiten Rue de Rochechuart horretan, Moulin Rougera sartu eta etxera itzultzean tea hartzen ari diren bitartean lagunei han izan zirela esan ahal izateko. Handik hurbil, maiteminduta dirudien bikote batek argazkiak ateratzen ditu Amelie filmatu zuten Les 2 Moulins kafetegiko barnealdeko mahaietan, garagardo bat eta ebaki bat 5,40 euro ordaindu ondoren. Ordu berean, Parisko beste barruti batean, Marais auzoan eta Roi-Doré karrikako 8. zenbakian, haur batek laugarren solairutik jauzi egin eta espaloian geratu da odol putzu baten erdian, 48 segundoz, heriotza bila etortzen zaion arte. Kea eta sua ikusten da haurrak jauzi egin duen bost solairuko eraikinean, eta suteak zazpi afrikar hil dituela zabalduko dute geroago hedabideek. Horietarik lau haurrak dira. Parisko alkatea saminduta agertuko da gertaera lazgarriarekin, eta etxebizitzen arazoaz hitz egingo du geroago. Ordu horretan, Montmartreko jatetxe batean, Marais auzoan norbaitek erre duen eraikinean zer-nolako etxebizitzak eraikiko dituzten erabakitzen ari dira espekulatzaileak, Parisko beste barruti bateko hirigintza zinegotzia eta inmobiliaria ezagun bateko ordezkaria. 27 minutu geroago, telefonoak joko du Jamusukron, Boli Kostako hiriburuan, ezbeharraren berri senideei nola eman erabaki ezinik dagoen etorkinak milaka kilometrora telefono txartela kabina batean sartu ondoren. Hiru egun igaro arte inork ez du hartuko telefonoa.

Espekulazioa salatu dute Euromar eraikinean

2005-08-29T14:44:00.000+02:00

Atzoko Urola Kostako HITZA egunkariak zekarrenez, larunbatean espekulazioa salatzeko ekintza ikusgarria egin zuen Segi gazte erakundeak Zarauzko Euromar eraikinean.

Honakoa da atzo HITZAk zekarren berria eta argazkia:

"Segi gazte erakundeak «Zarautz turistifikazioaren eta espekulazioaren herria» dela salatuz pankarta handia zintzilikatu zuen atzo Euromar eraikinean. Segiren prentsa oharraren arabera, 3.389 etxe huts daude Zarautzen, eta «inmobiliariak, konstruktorak, aisialdi pribatuko enpresak, aurrezki kutxak, bankuak... eta hau guztia onartzen duen Udala» dira egoeraren arduradunak. Hori salatzeko «politika neoliberal honen erakusle den eraikina» aukeratu zuten".

Euskal Astearen egitaraua ezagutarazi du Turismo Bulegoak

2005-08-29T11:35:00.000+02:00

Zarauzko Turismo Bulegoak ere ezagutarazi du aste honetan bertan hasiko den Euskal Astearen egitaraua.
Honakoa da hedabideei helarazi dietena:

EUSKAL ASTEA 2005
Irailak 1 – 9

[Aurten ere hainbat ekitaldi izango da Euskal Jai egunean eta Euskal Astearen baitan].

—IRAILAK 1, OSTEGUNA:
· Gaueko 22:00etan, Zinema pilotalekuan, Herriko taldeen jaialdia, “Datorrena, datorrela...”.
Parte-hartzaileak: Iratzarri eta Mollarri Dantza Taldeak, Montetxio Abesbatza, Etxebeltz Bertso Eskola, Imuntzo Trikitixa Eskola, Gorputz espresio taldea, Imanol Epelderen bertso-rock taldea eta herriko laguntzaile bereziak.

—IRAILAK 2, OSTIRALA:
· Arratsaldeko 19:00etan, Musika Plazan, “Bikote Gazteen Dantza Txapelketa”.
· Gaueko 22:00etan, Zinema pilotalekuan. “Bertsolari Gazteen XXIX. Txapelketa - Lizardi Saria”.
Txapelketa barnean “XXI. Basarri Saria” Bertso Paper Lehiaketaren sari banaketa. Aurten Xabier Etxeberria izan da irabazlea.
· Txosnen irekiera eta ekitaldi ezberdinak.

—IRAILAK 3, LARUNBATA:
· Goizeko 10:00etan, Musika Plazatik irtenda “Euskararen aldeko X. lasterketa”. (Izen-ematea 09:30ean)
· Goizeko 11:30ean, Musika Plazan, “Zarauzko XIX. Aurresku Txapelketa”.
· Eguerdiko 12:00etan, Lege Zaharren enparantzan, “Ardoa eta gazta Dastaketa-Salmenta”.
· Arratsaldeko 14:30ean, Musika Plazan, “Bazkari Herrikoia”.
· Arratsaldeko 19:30ean, Musika Plazan, “Binakako Dantza Txapelketa”.
· Gauean, Txosna gunean, dantzaldia TAPIA ETA LETURIA eta NEKIN taldeekin.

—IRAILAK 4, IGANDEA: Haurren Euskal Jai Eguna
· Goizeko 10:30ean, Munoan, dantzarien bilkura.
· Goizeko 11:30ean, Munoan, Alkate Txikiaren ongietorria.
· Ondoren, Dantzariak Kalez Kale.
· Eguerdiko 12:00etan, trikitilarien kalejira (Bailarako eskolak).
· Aldi berean, Lege Zaharren enparantzan haurrentzat Gorritiren pottokak.
· Arratsaldeko 13:00etan, Musika Plazan, Bailarako trikitilari eskolen emanaldia.
· Arratsaldeko 14:00etan, Munoan, haurren banaketa bazkarirako: dantzariak zuen familia artean bazkaltzera eraman nahi badituzue, izena eman Mendizabal kinkiladendan edo San Pelaioko estankoan.
· Arratsaldeko 17:30ean, Musika Plazatik Iñurritzara kalejira, buruhaundi, erraldoi, Sama Siku txaranga eta Bailarako trikitilari eskolekin.
· Arratsadeko 18:00etan, Iñurritzan, Dantzari txikien saioa.
· Ondoren, Iñurritzan, haur ikuskizuna: “Barbantxo eta Txanogorritxo”.
· Arratsaldeko 20:30ean, Kalejira Iñurritzatik Musika Plazara.

—IRAILAK 5, ASTELEHENA:
· Gaueko 22:00etan, Zinema pilotalekuan, KUKAI-TANTTAKA taldearen eskutik “OTEhITZAri BIRAKA" ikuskizuna.

—IRAILAK 6, ASTEARTEA:
· Gaueko 22:00etan, Zinema pilotalekuan, KORRONTZI taldearen jaialdia.

—IRAILAK 7, ASTEAZKENA:
· Gaueko 22:00etan, Zinema pilotalekuan “Trikitilari Gazteen XXV. Txapelketa”.

—IRAILAK 9, OSTIRALA: Euskal Jai Eguna.
· Goizeko 07:00etan, Goiz eresia.
· Aldi berean, “Goiztarrak” taldearen irteera. Aintzinako ohitura berreskuratuz, goizean kalez kale garai hartako pertsonaiak irudikatuko dituzte.
· Goizeko 08:30ean, Kalez kale txistulariak, trikitilariak, dultzaineroak, eta Iturengo tunturroak.
· Goizeko 10:30ean, Frantziskotarren elizan, “Herri Meza”.
· Meza ondoren: Frontoi Txikian, “Goiztarrak” taldearen eskutik pilota partiduak, herri kirolak eta bertsolariak.
· Goizeko 11:30ean, “Alproja” taldearen irteera. Azpeiti bidea, Kale Nagusia, Musika Plaza (geldialdia), Azara kalea, Nafarroa kalea eta Munoa.
· Jarraian, eguerdiko 12:00etan Munoan, antzezlana: “Kupidoren gezi eroa”.
· Eguerdiko 12:30ean, Parrokiatik karrozak aterako dira, jarraian Kale Nagusitik barrena pasako dira Torre Luzea parean geldituz.
· Eguerdian, Musika Plazan erromeria trikitilariekin, txistulariekin, eta dultzaineroekin.
· Arratsaldeko 14:00etan, Musika Plazan, Larraindantza herrikoia dultzaineroekin.
· Arratsaldeko 17:30ean, Musika Plazatik Iñurritzara kalejira, karroza, trikitilari, dultzainero eta txistulariekin.
· Ondoren Iñurritza zelaian erromeria.
· Arratsaldeko 19:15ean, Iñurritzan, Larraindantza herrikoia dultzaineroekin.
· Arratsaldeko 20:30ean, Kalejira Iñurritzatik Musika Plazara.
· Gaueko 23:00etatik aurrera, Musika Plazan, erromeria trikitilariekin.
· Gauean, Txosna gunean, dantzaldia TRIKITAKE eta THE SOLANO’S taldeekin

Euskal Jaietan ohitura zaharrak mantentzeko ahaleginean herritar guztioi zuen janzkera zaintzera gonbidatzen zaituztegu.
Ondo pasatu jaiak!

· Antolatzaileak:
Zarauzko Udala - Turismo Bulegoa

· Laguntzaileak:
AEK - Alproja Taldea - Etxebeltz Bertso Eskola – Euskal Herrian Euskaraz - Euskara Batzordea – Goiztarrak -
Herriko Gastronomia Elkarteak - Imuntzo Trikitilari Eskola - Iratzarri Dantza Taldea - Mollarri Dantza Taldea -
Motxian Bertso Eskola - Ondaurtz Kultur Taldea – Txosna Batzordea.

Euskal Jaietako egitarauaren kartela

2005-08-26T10:11:00.000+02:00

Gurekin Jai Batzordeak antolatu duen egitarauaren inguruko kartela da honakoa.
Aitor Larrañaga PELI izan da aurten ere kartelaren egilea.

Bestalde, eta herenegun aurreratu genuen modura, Gurekin Jai Batzordeak Udalaren jarrera salatu du.

Astelehenean prentsaurrekoa emango badute ere, oraingoz, honako mezua zabaldu du batzordeak:

"Badatoz aurten ere zarautzko Euskal Jaiak! Datorren irailak 2, 3 eta 9an festa eta aldarrikapenak bat egingo dute.
Beste behin ere Gurekin Jai festa batzordetik egitarau dotorea osatu dugu aurtengorako. Adierazi behar dugu oraingoan Udalak txosna bakoitzari 1.500 euroko fidantza eskatu diola (sanpelaioetan 300 ziren bitartean) inolako arrazoirik eman gabe.
Oztopoak oztopo, festa herrikoi, parte hatzaile eta parekideetaz gozatzeko aukera ezin hobeagoa egongo dela
ziurtatzen dugu.
Besterik gabe, denak gonbidatuak gelditzen zarete zarauzko txosnetara!".

Leiho irekia komisioarentzat [3]:

2005-08-25T12:02:00.000+02:00

[Argazkia: Gorka Rubio. Azken Portu, 2005-08-11, Plaza Gorrira begira].

LARUNBAT HONETAN, ABUZTUAK 27, 12:00etan, FESTETAKO BANDERATXOAK KENTZEKO geratu dira komisioko kideak.
Lokalean izango da hitzordua eta, gero, bertatik abiatuko dira taldeka kale batzuetara edo besteetara.

Ahal duena, bada, azaldu dadila, eta pasatu dezala mezua.

Euskal Jaietarako egitaraua prestatu du GUREKIN JAI BATZORDEAk

2005-08-24T10:36:00.000+02:00

Uda atzean lagatzeak pena pixka bat ematen dizula? Bada, Zarautzen bada penak
ahazteko aukera polita hurrengo egunotan!
Euskal Jaietarako GUREKIN JAI BATZORDEAk prestatu duen egitaraua
da honakoa:

—Irailak 2, ostirala: MUNDUKO HERRIEKIN ELKARTASUN EGUNA:
· 20:00etatik aurrera, txosna gunean:
· Dantza eta perkusio afroamerikarraren ikastaroa.
· Afari bere-berea.
· Saharari buruzko bideo emanaldia.
· Ikastaroan ikasitakoarekin eta Safara taldearekin kontzertu-ikuskizuna.

— Irailak 3, larunbata: EUSKARAREN OFIZIALTASUN EGUNA
· Goizeko 09:30ean, euskararen aldeko lasterketa.
· Eguerdian: herri bazkaria, eta bazkalondoan, txistulariak, koroa,
abestiak, antzerkia...
· Gaueko 23:00etan hasita, txosnetan: Tapia eta Leturia eta Amaiur taldeekin
goizaldera arteko parranda.

[Herri bazkaria izango da aurten ere Musika Plazan, iraileko lehen larunbatean].

—Irailak 9, ostirala: EUSKAL JAI EGUNA
· 11:00etarako, txosnak irekita.
· Eguerdian, herri antzerkia Munoan.
· 13:00etan, sagardoari nork txinparta hobea atera, txosnetan.
· Arratsaldeko 18:30ean, dantza txapelketa txosnetan.
· Arratsaldeko 20:30ean, hasita, Triki ta Ke eta The Solanos taldeekin
goizalderarteko parranda, txosnetan.

Gurekin Jai Batzordeak egitaraua prestatu baldin badu ere, dena dela, oztopo handiak ari da aurkitzen aurten Zarauzko Udalaren aldetik. Izan ere, aurten, lehen aldiz, txosna bakoitzeko 1.500 euroko fidantza eskatu du lehen aldiz Udalak, eta ordutegi aldetik, berriz, esaterako, irailaren 3an musika gaueko 02:00etan bukatu eta txosnak 03:00etan itxi behar direla jarri du baldintza bezala Udalak.
Gurekin Jai Batzordea gaur bilduko da gaia aztertzeko, baina ez dirudi irtenbide samurra topatuko dutenik.

JAI HERRIKOI ETA PARTE HARTZAILEEN ALDE, FESTEI OZTOPORIK EZ!

Itoizko urtegiaren aurkako mendi martxa

2005-08-23T13:36:00.000+02:00

Itoitzekin Elkartasuna taldeko solidarioek deituta, Itoizko urtegiaren aurkako mendi martxa izango da asteburu honetan, abuztuaren 26an, 27an eta 28an.
GURE IBAI EDERRAK ASKATU, ITOIZKO URTEGIA GELDITU da mendi martxaren leloa.

[Iturriak: www.sositoiz.net eta www.gaztesarea.net].

· G U R E I B A I E D E R R A K A S K A T U ·
· I T O I Z K O U R T E G I A G E L D I T U ! ·

"Lurra dardaka eta orroaka ari den bitartean Ebroko ur Konfederazioak eta Nafarroako Gobernuak temati segitzen dute Itoizko munstroarekin mehatxuka, eta betetze proben 3. fasearekin batera Irati eta Urrobi bailarak suntsitzen jarraitzen dute.

Proiektuaren gaur egungo egoera bertatik bertara ezagutzeko, betetze proben zein behin betiko gelditzea eskatzeko eta gure taldekidea den Ibai Ederraren askatasuna galdegiteko abuztuaren 26tik 28ra burutuko den mendi martxara deitzen zaituztegu".

EGITARAUA

—Ostirala, abuztuak 26:
Hitzaldia - Bideo emanaldia: Vajont-Itoitz.
Itoizko urtegiak mehatxaturiko Herritarren Batzordearen eskutik. 20:00etan Agoizko Kultur Etxean.
Ekai-ko elkartean afaldu eta lo eginen dugu.

—Larunbata, abuztuak 27:
Mendi martxa: Nagore - Osa - Lakabe.
Irteera Nagoren 09:00etan. Osa ondoan bazkaldu. Lakaben afaldu... eta ondoren musika emanaldia.

—Igandea, abuztuak 28:
Mendi martxa: Lakabe - Elke mendia.
Irteera 09:00etan. Bazkaria Lakaben.
Arratsaldeko 17:30etan: Giza katea: Lakabe - Iñarbeko zintzurra - Nagore.

Oharrak:
· Ekartzeko materiala: lo-zakua, isolagailua, mendi martxarako motxila ttipia, ur botila, eskuargia... eta mendira joaterakoan eraman ohi duzuna.
· Laguntza furgoneta izanen da.
· Autoak Nagoren utzi, ez igo Lakabera.
· Saiatu txakurrik ez ekartzen, hazienda dagoelako eta lotuta egon beharko dutelako.
· Iruñea - Agoitz autobusa: arratsaldeko 19:00etan.

Fotomatoia

2005-08-23T11:43:00.000+02:00

Amelie eta lagunak argazki bila gabiltza...

[Banda Batxoki eta Tuboskapi musika taldeetako lagunak, festen lehen egunean,
Toki Onan egin zuten afarian, umore eta giro ederrean].

Izan ere, Santa Klara, Azken Portu eta Aritzbataldeko jaien inguruko zenbait proiektu ditugu buruan, eta horiek gauzatze aldera, festak guztion artean antolatzen eta gauzatzen ahalegindu garen moduan, argazkien inguruko kontu horiek ere guztion lanarekin eta laguntzarekin gauzatzea errazagoa eta aberatsagoa izango da.

Kontua da, SKAPA 2005 jaien inguruko argazkiak bildu eta horiekin bi asmo ditugula.
—Batetik, argazki emanaldia egin egun batean Plaza Gorrian, proiektore bat erabiliz. Irailean edo urrian egin daiteke, larunbat arratsalde batean, eta hartara egun horretan ere jendea elkartu eta auzoari hauspoa emateko aukera izango genuke.
—Bestetik, eta horretarako nahikoa argazki eder bilduz gero, eta aurrekontuak aztertu ondoren, SKAPA 2005 jaiei buruzko argazki liburu bat argitaratzeko asmoa buruan bueltaka dabilkigu.

Horretarako, Patxik abuztuaren 10ean suziriak bota zituenetik abuztuaren 13ko goizaldean Donibane okindegian gosaldu zenuen arteko argazkirik baldin baduzu... eskertuko genuke horiek pasatzea.
Harremanetarako (argazkiak non utzi zehazteko), azkenportu@gaztesarea.net helbidera idatz dezakezue, edota argazki bakarren bat edo beste izanez gero bidali beharrekoak, zuzenean helbide horretara ere bidal ditzakezue, beti ere zuen
izen-abizenak jarrita, liburua argitaratuz gero, argazki bakoitza bere egilearen sinadurarekin joango bailitzateke.

Euskararik gabeko Erdi Aroa...

2005-08-22T11:41:00.000+02:00

[Erriberrin Erdi Aroko Festak ospatu dituzte asteburu honetan].

Itsasaldeko Nafarroan eguraldi petrala zegoen iragarrita egunotan, eta euriari ihesi, Nafarroa Garaira alde egin dugu asteburuan. Tafallako eta Erriberriko jaietan izan gara, eta bietan, festa giroan, berriro ere herria mutu utzi nahian goitik antolatutako jaiek dituzten itzalak ikusi ditugu.

Tafallan, aurten ere, txosna gunea da, nolabait, beste modu bateko festak nahi dituztenen bilgune. Herrian giroa gaiztotu egin dute eskuin muturrekoek azken asteotan, oraintsu, Miguel Indurain Kirol Hiriaren inaugurazio ekitaldian, dantzariak ikurrinarekin atera zirelako. Ordudanik haserre dabiltza eskuindarrenak, eta zirika ari dira batera eta bestera, behin eta berriro. Larunbat gauean, zirikatzearekin nahikoa ez, eta Foru Polizia borrak eskuan eta modu txarrean sartu zen txosna gunera, mehatxuka, jendeari identifikatzeko eskatu, pankartak kendu, eta jarrera harroa erakutsiz. Beste behin ere, batzuen gustukoa ez dena indarra eta boterea erabiliz isilarazi nahi izan zuten.

Tafallatik kilometro batzuetara, berriz, ondoko herrian, Erriberrin, azken urteotan egin izan duten bezala Erdi Aroko Festak ospatu dituzte asteburu honetan. Gurean gero eta ohikoagoa da Erdi Aroko festak, azokak eta antzeko ekitaldiak ikustea bateko eta besteko herrietan. Egun horiek antolatzen dituen enpresak sortu dira inguruetan, eta dena antolatuta iristen zaie udalei: postuak, ekitaldiak, dekorazioa, jantziak, eta abar. Itxura berezia hartzen dute herriek, eta sasoi bateko ofizioak, artisauak, jokoak eta gastronomia ezagutzeko parada izaten da. Eta herriak Erriberri bezalakoak baldin badira, horrelako azoka edo festarik gabe ere bisitariari Erdi Aroan dagoela sentiarazteko modukoak, benetan ederra izan daiteke ekimena.
Erdi Aroa herrira ekartzea enpresa pribatu baten eskuetan utziz gero, ordea, herrietako festetan gertatzen denaren gauza bera gertatzen da: errealitatea bestelakoa dela, eta herria mutu gera daitekeela ekitaldiak daitezkeen handienak eta ikusgarrienak izanda ere. Atzo hori sentitu genuen Erriberrin, eta antzeko zerbait sentitzen dugu euskal herrietan Erdi Aroko azokak ikusten ditugunean ere. Izan ere, hemen, Erdi Aroan euskaraz hitz egiten zuen herriak, baita Erriberrin ere. Eta enpresa pribatu arrotzak Erdi Aroa antolatzeaz arduratzen direnean, hori ahantzi egiten dute. Batzuetan nahi gabe, eta besteetan nahita.
Guri behintzat arrotza, susmagarria eta faltsua iruditzen zaigu Euskal Herrian euskararik gabeko Erdi Aroko azokak eta festak ikustea…

Erasotzailea aske utzi izana salatu dute emakume elkarteek

2005-08-19T20:28:00.000+02:00

Euskal Herriko Bilgune Feministak eta Zarauzko Sorginak emakume taldeak deituta, dozenaka lagun bildu dira euripean gaur arratsaldean Zarautzen, manifestazioan. 20:00etan abiatuta, bikotea jipoitu eta mehatxatzeagatik atzo Ertzaintzak atxilotutako laguna aske utzi izana salatu dute. Ez da udal ordezkaririk izan emakume elkarteek deitutako manifestazioan.

Biharko Giri Eguna bertan behera utzi du ZAGAk

2005-08-19T15:48:00.000+02:00

Zarauzko Gazte Asanbladak Giri Eguna antolatu zuen hasiera batean biharko, eta bertan parte hartzeko deia egin zien herriko gazteei.
Goizeko 09:00etan finkatu zuten hitzordua, Gurutze Gorriaren parean.

Hala ere, eguraldi txarra iragarrita dagoenez, Giri Eguna atzeratzea erabaki dute.
Laster batean egingo dute, eta aldez aurretik jakinaraziko dute data.

Epailearen aurretik igaro, eta erasotzailea berriro etxera

2005-08-19T11:13:00.000+02:00

Atzo epailearen aurrean deklaratu ondoren, aske utzi zuten ordu batzuk lehenago Ertzaintzak Zarautzen atxilotutako M.A.C.S. 37 urteko gizonezkoa. Emaztea jipoitzeagatik eta labanaz mehatxatzeagatik atxilotu zuten. Azpeitian epailearen aurrean deklaratu ondoren, ordea, aske utzi zuten, aurrekari penalik ez zuelako.
Zarauzko Sorginak emakume taldeak eta Bilgune Feministak salatu egin dute horrelako gertaera larrien aurrean erasotzailea dagoeneko berriro ere herriko kaleetan aske uztea, eta "erasotzaileen bazterketa soziala" eskatu dute.
Atzo arratsaldean, bilkura isila egin zuten Zarautzen, Musika Plazan, eta idatzi bat zabaldu eta irakurri zuten bertan.

Gaur, berriz, gertaera hauen harira, manifestazioa deitu dute Bilgune Feministak eta Zarauzko Sorginek, 20:00etan, Musika Plazatik abiatuta.

Honako hau da atzo zabaldu eta irakurri zuten agiria, hitzez hitz:

"Atzo, Zarautzen, gaueko lehenengo orduan gizonezko bat atxilotua izan zen, bere bikotea jipoitu eta labanaz mehatxatzeagatik. Beste emakume baten bizitza arriskuan jarri duen erasotzailea kalean da dagoeneko.
Gertaera beldurgarri hau ez da kasu isolatua. Emakumeontzat eraso hauek eguneroko ogi dira. Emakumeonganako indarkeriak Zarauzko etxe batean izan du oraingoan isla eta oihartzuna, baina beste milaka kasu dira isilduak. Berdintasunaren garaia deritzoten honetan, gauzak aldatu diren ustea zabaldua dagoenean, berriz ere emakumea zapaldua denaren froga garbia azaldu zaigu.
Berdintasun faltsu hau sinetsarazi diguten berberak dira, emakumeonganako indarkeriaren konplize eta berau mantentzearen erantzule. Eraso bortitz eta erailketa arriskuen aurrean erasotzailea baztertu eta emakumea babestu beharrean, gutxieneko neurriak hartzen dituzte. Bestela, nola azaldu azken gertakari krudel honen aurrean, erasotzailea kalean egotea? Horregatik diogu hartzen diren neurri judizialak ez direla nahikoa, ez eta arazo honekiko politikari eta instituzioek duten konpromiso maila ere. Zurikeria eta hitz politak nagusitzen dira oraindik ere, baina emakumeonganako indarkeriarekin amaitzeko intentziorik eta borondaterik gabe.
Egoera larri honen aurrean dei egiten diegu herritar guztiei, batez ere emakumeei, eraso hauen salaketa ozena egitera. Atzo gauean gertatua edonori gerta dakioke, eta bada garaia erasoei aurre egitekoa. Erasotzailearentzat, berriz: bazterketa soziala. Ez ditugu gure artean nahi.
Hemendik animatzen zaituztegu emakumeok, edozein eraso mota salatzera eta ahal den neurrian Zarauzko emakume taldeekin harremanetan jartzera. Erasotua, zanpatua eta kolpeka isildua izan den emakumeari, berriz, gure babes guztia adierazi nahi diogu
Erasorik ez erantzunik gabe! Erasotzaileen bazterketa soziala!!!".

Zuena da hitza...

2005-08-17T12:49:00.000+02:00

Festak amaituta, SKAPA 2005en balorazioa egiteko ordua da, nolabait.
Horretarako, eta festak ahalik eta herrikoienak eta parte hartzaileenak izan daitezen ahalegintzen denez urtero komisioa, festak antolatzeko bilerak irekiak izaten diren moduan, orain ere, festei buruzko edozein iritzi, proposamen, kritika edota ekarpen jaso nahiko genuke, hurrengo urtekoei begira jartzerakoan horiek ere kontuan har ditzagun.

Zabalik dituzue mikroak.
Zuena da hitza...

Konbo Kilonbo taldearekin Txatxarro magalean

2005-08-17T11:15:00.000+02:00

Asier Bastarrikari egindako elkarrizketa dakar gaur Urola Kostako HITZAk.
Honako hau, berriz, elkarrizketaren bertsio "luzeagoa" da.
Izan ere, Txatxarro mendiaren magalean duten etxean, lagunartean elikagai ekologikoak jateko aukera eskaintzen hasi dira. Gaur, gainera, musika emanaldia ere antolatu dute lagunartea girotzeko, eta Konbo Kilonbo taldea ariko da, 21:00etatik aurrera. Bertan izateko, 943 580832 telefonora deitu eta lekua hartu besterik ez da egin behar.

"Elikadura ohiturak aldatuz soilik, mundua alda dezakegu"

Iaz, Euskal Herriko Garapen Agentzien elkarteak enpresak sustatzeko antolatutako lehiaketan saria jaso zuen Leire Albisuk eta Asier Bastarrikak sortutako Bastalbiri enpresak. Aiako enpresa honek, Goiabe Sukaldea izenarekin, nekazaritza ekologikotik lortutako lehengaiekin elikagai ekologikoak ekoizten eta saltzen ditu. Udan zehar, bateko eta besteko azoketan barrena dabiltza, eta, nahi izanez gero, Txatxarro mendiaren magalean duten etxean lehengai ekologikoekin egindako pizzak, otartekoak, entsaladak eta gainerakoak dastatzeko aukera eskaintzen dute.

—Elikadura ohiturak aldatuz mundua alda daitekeela sinesten dutenen artekoa al zara?
Bai. Nik baietz uste dut. Azken mendea ideia handien mendea izan da. Aldaketa handiak izan dira, baina egunerokotasuna baztertu egin dugu. Gure ideien eta eguneroko ekintzen artean egundoko amildegia dago, eta gauza txikiei begiratzeko ordua da. Elikadura da naturarekin dugun harreman zuzenena, eta eguneroko kontuekin hasita, elikadura ohiturak aldatuz soilik, asko egin dezakegu mundua aldatzeko.

—Lurra, atmosfera eta ingurua dagoen moduan egonda, zenbaterainoko bermea du nekazaritza ekologikoak?
Nekazaritza ekologikoa deitzen dena araudi bat da. Horrek ez du esan nahi ekologikoa denik. Baina eskatu dezakegun gutxienekoa dela esan daiteke, nolabait, elikadura sano bat edukitzeko eta ingurua errespetatzeko. Hortik pentsatzea erabat ekologikoa dela eta abar, salto handia dago, baina ez badugu salto txiki hori egiten, ezingo dugu handiagorik egin.

—Nonbait irakurri dugu, zure hitzetan, laster gosez amaituko dugula guztiok.
Bai. Janariz inguratuta gaude, eta gero eta gehiago jaten dugu, baina gero eta gutxiago elikatzen gara. Janaria gero eta merkeagoa da, baina gero eta kalitate okerragokoa. Ez dakigu nondik datorren eta zer daraman ere. Jendeak osasuntsu jatea izan beharko luke garrantzitsua, eta ez dirua nola edo hala irabaztea. Bestalde, elikagaiak ekoizteko ahalmen guztia galtzen ari gara, abiada bizian. Euskal Herri heze honetan ekosistemak ematen du elikagaiak soberan ekoizteko, baina dena berdintzen eta porlanezko desertu bihurtzen ari gara. Adibide bat besterik ez da, baina lehengoan, Oteiza Lizeoaren lanak direla eta, 50 urtetik gora izango zituzten limoiondoak bota zituzten, eta hemen limoia ematen den leku oso gutxi geratzen da. Daukagun apurra batere begirunerik gabe desagerrarazten ari gara.

—Eta zein da horri guztiari aurre egiteko bidea?
Ez da erraza. Guk permakultura eta ideia horiekin bat egiten dugu. Inguruan daukagunarekin ahalik eta autosufizienteenak izaten saiatu behar dugula iruditzen zaigu, baina ez da erraza. Azken batean, janariarekin, prezioari bakarrik begiratzen ohitu gara. Auto bat edota arropa erosterakoan, onartzen da garestia, nolabait, hobea dela. Berdina gertatzen da ardoarekin: Errioxa botila bat edota tetrabrik ontzi bateko ardoa ez da berdina, baina biak ondoan jarrita ez zaigu okurritzen Errioxakoa zein garestia den esatea, bestea baino askoz hobea dela baizik. Elikadurarekin, berriz, badirudi prezioak bakarrik duela garrantzia.

—Horri aurre eginez, etxean lagunarteko otorduak eman eta kontzertuak ere antolatzen hasi zarete...
Bai. Gaur, 21:00etan, Konbo Kilonbo taldeak joko du. Hemen inguruko musikariak dira, saltsa taldeetan-eta aritutakoak. Azken batean, gure elikagaiak merkaturatzeko bideak erabat itxiak eta zailak direnez, etxean bertan eskaintzea otu zaigu. Ez dugu leku askorik ere, baina elikagai ekologikoak dastatzeko eta paisaiaz gozatzeko aukera ederra denez, pizzak, otartekoak, entsaladak, ekoizten ditugun jakiak, eta antzekoak jateko aukera eman nahi diogu jendeari. Lagunartean osasuntsu jateko aukera ezberdina da. 943 580832 telefonora deitu eta lekua hartu besterik ez da egin behar.

Isildu da musika

2005-08-16T15:15:00.000+02:00

Isildu da musika. Trenbidearen beste aldeko su artifizialak ikusten ditugu orain etxetik. Hileroko alokairua 500 euro ordainduta, suak balkoitik ikustea erabaki dugu. Koloretsu lehertu da gaua, baina hiri turistikoan su horiekin bota duten dirua gure herriko festak antolatzeko eman digutenaren bikoitza dela otu zaigu. Eta koloreek, dagoeneko, ez dute distira bera.
Kaleak ere ez dizkigute garbitu. Kiratsa dario txosna guneari. Urtero bezala, ezin dute eraman hogei gazteren artean gero eta herrikoiagoak, parte hartzaileagoak eta jendetsuagoak diren festak antolatu izana. Hemendik aspaldian ez da ageri kaleak garbitzeko tramankulurik. Zauri mingotsa zaie gure arrakasta.
Milaka lagun bildu da egunotan gurera. Ez da zaila kopuru nahikoa zehatza ateratzea. Egitaraua hartu, eta ekitaldi bakoitzean izan den jendetza kalkulatu besterik ez dago. 4.400 lagun inguru hiru egunetan. 40 bikote musean. Festetako 600 elastiko salduta. 250 lagun herri bazkarian. Ehunka eta ehunka haurrentzako ekitaldietan, herri kirolen erakustaldian, gaueroko kontzertuetan…

Bagenekien lehendik ere, eta berriro erakutsi diguzue aurten: ez dago azken porturik zuek txalupan baldin bazaudete…

Bizikleta Martxa Berdea egin dute gazteek

2005-08-15T19:45:00.000+02:00

Zarauzko gazteek, Azken Portuko jaietan antzerkia egin zuten bezala, Bizikleta Martxa Berdea egin dute gaur arratsaldean, lokal autogestionatu baten beharra aldarrikatzeko asmoz. Herriko gazte talde ezberdinek, bakoitzak antolatzeko leku bat behar duela iritzita, bat egin dute Bizikleta Martxa Berdearekin, eta dozenaka lagun elkartu da arratsaldean herriko kaleetan barrena, bizikletan. Musika Plazan elkartu dira, 17:00etan, eta herrian zehar, udaletxean eta beste hainbat lekutan, pankartak jarri dituzte, "badatorrela, badatorrela..." leloarekin. Txilibituekin eta oihuka, herrian zehar ere lelo hori zabaldu dute.

Giro ederrean eta jende askorekin amaitu zen ostirala ere

2005-08-14T12:07:00.000+02:00

Atzo ez ginen gauza izan ostiraleko kontuak eta argazkiak blogean jartzeko...
Gaur, lasaiago, ostiraleko zenbait argazki aukeratu ditugu.
Ez dira asko, baina, nolabait, ostiralean auzoan bizitako giroa islatzen dutelakoan gaude.
Ostegunean bezala, egundoko jendetza ibili zen ostiralean ere: bai herri bazkarian, bai bertsolariak entzuten, eta baita gauean txosna gunean dantzan eta parrandan ere.
Zalantzarik gabe, azken urteotako festa jendetsuenak izan dira aurtengoak.

Hona hemen ostiraleko zenbait argazki...

[Azken Portuko Txaranga: argazki mitikoa, txaranga bera bezala...].

[Herri Bazkariaren aurretik, Azken Portuko mendate berria inauguratu zuten: Konkorra].
[Argazkia: Lore Agirrezabal - Urola Kostako HITZA].

[Bazkarian 260 lagun inguru elkartu ziren Plaza Gorrian].

[Herriko mendate berriaren malda adierazten duen seinalea? Izan daiteke... baina beste aldapa baten neurria adierazten du komisioko kideek jarritako ikur honek: aurtengo festak antolatzeko, %4,6ko laguntza eman du Zarauzko Udalak].

[Belarrio, gustura, txarangaren zuzendari lanetan... Goizean beste argazkilari batek atera zion argazkia darama lepoan zintzilik].

[Bazkalostean, ZAGAko kideek ederki landutako antzerkia ere egin zuten Plaza Gorrian. Txalo sorta handia jaso zuten].

[Auzokideen xarmak ere egiten dute Azken Portu berezia...].

[Fafai, bidegorrian eskean. No comment].

[Nekin taldeak egundoko giroa jarri zuen, festetako azken gauean. Dantzaldia amaitu ostean, jendez bete-bete eginda zegoen txosna gunea].

Abuztuak 12, gaur, Lurraldetasun Eguna: EGITARAUA

2005-08-12T11:22:00.000+02:00

ABUZTUAK 12, OSTIRALA

10:30 Txistulariak, trikitixa eta suziriak.
Goizean zehar auzoko txaranga kaleak alaituz ibiliko da.
11:00 Umeentzako jokoak
11:45 Balkoi dotoreena (Artelan dendak emandako saria)
Tortilla txapelketa (Arantxa loradendak emandako saria)
12:00 Toka txapelketa (Aranburu kristaldegiak emandako garaikurra)
12:30 Triku poteoa, trikitixarekin eta batukadarekin alaiturik.
Tartean, Azken Portuko mendate berria inauguratuko da: Konkorra.
14:30 XIII. Auzoko bazkari herrikoia: txartelak abuztuaren 8a baino lehen hartu beharko dira.
Bazkalostean piropo eta argazki lehiaketaren sari banaketa.
Piropo lehiaketaren sariak, AEKren eskutik.
Argazki lehiaketaren saria: afaria bi lagunentzat Toki Ona tabernan.
22:00 Punta-puntako bertsolarien entrenamendu saioa Euskal Herriko Txapelketarako: Jon Maia, Aitor Mendiluze, Jokin Sorozabal, Sustrai Colina, Jexuxmai Irazu eta Aritz Aranburu. Gai jartzailea: Felix Zubia.
Ondoren, dantzaldia Nekin taldearekin.

Atzo arratsaldean eta gauean, egundoko giroa eta jendetza

2005-08-12T11:02:00.000+02:00

Azken urteotan Santa Klara, Azken Portu eta Aritzbataldeko jaiek ezagutu duten jendetzarik handiena bildu zen atzoko ekitaldietan.
Goizean, dagoeneko, haurrentzako marrazki lehiaketan 217 haurrek hartu zuen parte, eta antolatzaileak gustura zeuden deialdiak izan zuen erantzunarekin.
Arratsaldekoak, ordea, marka guztiak hautsi zituen.
Gorri, Xalto eta Brinko pailazoen emanaldian ehunka haur eta guraso bildu zen Plaza Gorrian, eta antolatzaileak horiei guztiei txokolatea ematen hasi zirenean, egundoko ilarak sortu ziren.
Herri kirol erakustaldiak ere markak hautsi zituen. Peñagarikano eta Txapartegi aizkoran eta Izeta II.a harria jasotzen ikustera egundoko jendetza bildu zen, eta horiek guztiak aho zabalik utzi zituzten Galdames eta Hondarribiko harrizulatzaileek.
Gauean, berriz, berriro ere egundoko jendetza elkartu zen txosna gunean, eta Jauko Barik eta Sexty Sexer's taldeen ondoren, Bartzelonako Pirats Sound Sistema taldeak Katalunia ttipi bat bihurtu zuen atzo Azken Portu. Txosna gunean zeuden ehunka eta ehunka lagunen artean, asko, zalantzarik gabe, kataluniarrak zirela ikusi, nabaritu eta entzun zitekeen. Dudarik gabe, izenak dioen bezala, Nazio Elkartasun Kontzertua izan zen atzo gauekoa...

Hona hemen atzo arratsaldeko eta gaueko zenbait argazki...

[Gorri, Xalto eta Brinko pailazoek ehunka haur bildu zituzten Plaza Gorrian].

[Haurrak aizkolariei laguntzen, hauen erakustaldia hasi aurretik].

[Txokolatea eman zuten antolatzaileek Plaza Gorrian, eta egundoko ilarak sortu ziren].

[Parrandaren erdian, maitasunarentzat ere bada lekurik. Lagun kataluniar hauen begiradek dena esaten zuten atzo arratsaldean, txosna gunean...].

[Patxi Iruretagoiena, jo eta fuego, arratsaldeko erakustaldietarako lanean].

[Aizkolariak eta harri jasotzaileak ikustera egundoko jendetza bildu zen Plaza Gorrian].

[Jaiek irudi bereziak uzten dizkigute: amona hau patxada ederrean eserita zegoen atzo arratsaldean...].

[Galdames eta Hondarribiako harrizulatzaileek egundoko ikuskizuna eman zuten Plaza Gorrian. Ikusle gehienek ez zuten ezagutzen meatzaldean sortutako herri kirol hau, eta harrituta ikusi zuten erakustaldia. Festa hauetako ekimen berezienetakoa izan zen atzokoa].

[Jauko Barik eta Sexty Sexer's taldeen kontzertuen erdian, ZAGAk antzerkia ere egin zuen: Gaur kalian, bihar Gaztetxian!].

[Pirats Souns Sistema, Bartzelonatik: beste behin ere, zoramena, musika ona, eta egundoko giroa txosna gunean. Atzo, gainera, Kataluniako herri bat zirudien Azken Portuk].

Santa Klara eguna ere, arrakastatsua

2005-08-11T14:14:00.000+02:00

Festetako bigarren egunean eguraldia ere laguntzen ari da.
"Sarbori" dago giroa, eta eguraldi onak lagunduta, ehunka haur elkartu da goizean Plaza Gorrian marrazki lehiaketan.
Geroago, Urpekoak elkartean auzoko jubilatuek hamaiketakoa izan dute, eta dozenaka lagun elkartu da bertan ere.
13:00ak aldera, berriz, Marrazki Lehiaketako sari banaketa egin dute komisioko kideek, eta orduan iritsi da zoramena...

Arratsaldean, besteak beste, herri kirolen erakustaldia izango da, eta harrizulatzaileak ikusteko aukera ere egongo da.
Lehenago, ordea, txokolatada izango da, eta segur aski goizean bezala ehunka haur elkartuko da.

Gauean, berriz, kontzertuak.
Eutsi goiari!!!

[Marrazki lehiaketaren sari banaketan haur, gazte eta guraso asko elkartu da].

[Auzoko jubilatuek hamaiketakoa egin dute Urpekoak elkartean].

[Sariak jasotzerako orduan, zoramena...]

[Komisioko kideek, gero, Sagasti Plazako hormetan, muralaren ondoan, marrazki lehiaketako marrazki guztiak jarri dituzte bata bestearen ondoan: 217 marrazki].

200 haur inguru ari da marrazki lehiaketan parte hartzen

2005-08-11T11:14:00.000+02:00

Egundoko haur piloa elkartu da 10:30ak aldera Plaza Gorrian, Marrazki Lehiaketan.
Antolatzaileek zehaztu dutenez, "200 haur inguru" dira guztira.
Bakoitzari zenbakitutako orria eman, eta hor ari dira guztiak lanean...

[Argazkia: Lore Agirrezabal - Urola Kostako HITZA].

Abuztuak 11, gaur, Santa Klara Eguna: EGITARAUA

2005-08-11T11:11:00.000+02:00

ABUZTUAK 11, OSTEGUNA: SANTA KLARA EGUNA

09:00 Txistulariak, trikitixa eta suziriak.
10:00 Buruhandiak
10:30 Marrazki lehiaketa auzoko haurrentzat
(bi maila izango dira: 7-10 eta 11-14 urte bitartekoak)
Etxetik, margoez gain, orripean jartzeko euskarriren bat ere ekarri beharko da.
11:00 Meza Nagusia
12:00 Auzoko jubilatuentzat hamaiketakoa.
16:00 Buruhandiak
16:30 Gorri, Xalto ta Brinko pailazoen ikuskizun berria: Olinpiadak.
18:30 Mollari dantza taldearen erakustaldia.
19:00 Txokolatada gozozale guztientzat,
19:00 Triduoa Santa Klara elizan
19:30 Herri kirol jaialdia:
Aizkolariak: Txapartegi eta Peñagarikano.
Harri jasotzaileak: Izeta II.aren erakustaldia harri ezberdinekin.
Gero, harri zulatzaileen erakustaldi ikusgarria: Bizkaia eta Gipuzkoa
nor baino nor gehiago. Meatzaldeko Harrizulatzaileak Elkartearen laguntzarekin.
22:30 V. Nazio Elkartasun Kontzertua:
Jauko Barik (Oiartzun) + Sexty Sexers (Bera) + Pirats Sound Sistema (Bartzelona). Tartean Zarauzko Gazte Asanbladaren antzerkia (Gaur kalian bihar gaztetxian).

Giro ederrean igaro da lehen eguna

2005-08-11T10:55:00.000+02:00

Giro ederrean igaro zen atzo Santa Klara, Azken Portu eta Aritzbataldeko jaien lehen eguna.
Euriak ere agertu nahi izan zuen festara, eta arratsaldean haurren jolasak Udal Kiroldegian egin behar izan ziren.
19:00etarako, ordea, atertu zuen, eta Mamarro taldeak Plaza Gorrian bertan egin ahal izan zituen malabarak.
Gauean, jende asko bildu zen Gaueko Txirrindularitza Kriteriuma ikustera eta, ondoren, Banda Batxokik eta Tuboskapik dantzan jarri zuten txosna gunean zegoen jendetza. Lehen eguna izateko, jende asko ibili zen gauean.

Hona hemen atzoko zenbait argazki:

[Mamarro taldeak malabar erakustaldia egin eta haurrei malabaretan aritzeko aukera eskaini zien atzo arratsaldean Plaza Gorrian. Haurrak gustura eta jakin-minez aritu ziren begira, eta ikasteko ahaleginak ere egin zituen haur eta gazte askok].

[Gaueko txirrindularitza kriteriuma].

[Banda Batxoki, Txantreatik... Txosna gunea dantzan jarri zuten].

[Seneka taldeak agertokira igo eta festetarako egin duten abestia jotzeko aukera izan zuen].

[Tuboskapirekin... zoramena!!!].

Hasi dira SKAPA 2005 jaiak!

2005-08-10T17:13:00.000+02:00

Arratsaldeko 16:00ak aldera, eta eguraldiak batere lagundu ez badu ere, Patxi Iruretagoienak bota ditu jaien hasiera iragarri duten suziriak. Patxik berak goizean komentatu duen moduan, dagoeneko ia hogeita bost bat urte daramatza jaien hasiera iragartzen duten suziriak botaz, pare bat urtean "kale" egin badu ere.

Eguraldi txarra dela-eta, Plaza Gorrian egitekoak ziren haurrentzako jokoak, berriz, Udal Kiroldegian egingo dituzte.

[Argazkia: Axel Odriozola - Komisiyua].

Arrautzak berandu... euria seguru!

2005-08-10T15:00:00.000+02:00

Komisioko kideak, urtero bezala, festen atarian Santa Klara mojengana joan dira, komentura, 13 arrautzeko dozena eramatera, Santa Klarari eguraldi ona eskatzera. Ohi bezala, Sor Frantziskok ireki die atea, beti bezain atsegin.
Aurten, ordea, nahikoa berandu joan dira gazteak arrautzak eramatera, ia eguerdiko 14:00ak aldera. Ordurako, ordea, laino ilunak ageri ziren zeruan... eta 14:30ak alderako lehertu da ekaitza, ilun...
Euria ari du uneotan, eta auskalo arratsalderako atertuko duen.
Izan ere, Santa Klara komentuko mojek otoitz egiten dute eguraldi ona eskatzeko, baina miraririk ezin egin...

[Argazkia: Lore Agirrezabal - Urola Kostako HITZA]

Txilikurekin solasean

2005-08-10T12:19:00.000+02:00

Jose Luis Aranguren, TXILIKU: "Garai bateko festarako irrika hori galdu egin da"

—Noiztik ateratzen da Azken Portuko txaranga? Datorren urtean zilarrezko ezteiak dituzuela entzun dugu…
Gehiago izango dira. Gure mutil koskorrak eta txikiak ziren, eta hogeita bost baino gehiago izango dira. Hogeita zazpi bat edo.

—Urtero?
Bai! Hasieran, gainera, barrio erdia izango ginen! Hogeita hamarren bat elkartzen ginen gutxienez. Instrumentuak ez dakit nondik azaldu ziren, baina, nola edo halakoak izan arren, osatu genituen. Eta harrezkero, poliki-poliki, gazteak sartzen direla eta hau eta beste, segitzeko asmoa dugu behintzat. Gure parrandatxo hori oso gustura egiten dugu eta…

—Nolakoa izaten da Azken Portuko txarangaren eguna?
Azken urteetan, bizpahiru hildako ere baditugu, eta goizean hasten gara, hamarrak alde horretan, haien omenezko mezarekin. Gero, hamaiketako pixka bat egin, eta orduan salida, ilunabar aldera arte.

—Ilunabar aldera arte bakarrik?
Lehen goizaldera arte jarduten ginen, baina orain ilunabarrean, alto! Lehen goizaldera arte ibiltzen ginen bazterrak nazkatuaz.

—Denek al dakizue musika tresnaren bat jotzen?
Baita zera ere! Instrumentuak jotzen dituztenak hiruzpalau bat edo dira: txistua eta horrelakoak, eta gero bonbo zaharrak, eta platilloak eta horrelakoak jotzen dituztenak daude. Lehen bai, bat edo beste, baina instrumentu naturalik jotzen duenik ez dago. Zarata ateratzen dutenak, berriz, nahi duzuen guztia.

—Zein pieza jotzen dituzue?
Lehen pare bat hilabete lehenago hasten ginen. Txistuarekin jotzen zuten txistulariek, eta besteok, nola edo hala, tankera hartu eta laguntzen genien. Azken sei-zazpi urtean, berriz, ezer ere ez. Lehen ikasitakoak jotzen ditugu, bat-batean. Hasiera hartan jendea ere gehiago ginen, eta hango txabolara edota hemengo ez dakit nora joan, eta zerbait aritzen ginen…

—Hainbeste urten, zerbait aldatu al da Azken Portuko festetan?
Lehen giro hobea izaten zen. Auzo guztietan bezala da hori. Lehen dantzan aritzen ginen erabat, eta gero iluntzean Azken Portu eta Bar Mari eta horiek lepo egoten ziren. Orain, berriz, nik ez dakit gazteek zer joera duten. Lehen dantzan jarduten ginen, saltoka eta brinkoka. Orain beste zerbait da, denak elkarri begira jarri pulamentu handirik gabe, eta… Nik uste dut galdu egin dela garai bateko festarako irrika hori. Baina auzo guztietan izaten da hori.

—Zuretzat, pertsonalki, zer dira Santa Klarako festak?
Bueno… mundialak! Gu mutil kozkorrak ginenean Kaxiano-eta etortzen ziren, jazzbanarekin-eta. Makina aldiz obretako tablero zaharrak hartu eta egiten genuen andamioa. Kamioi gainean ere bai! Lehen saiatuagoa izaten zen. Orain errezagoa ematen du. Dirua biltzen ere sei hilabete lehenago hasten ginen, ez orain bezala, azken bi egunetan! Lehen asko saiatzen ginen! Orain ere gazteak saiatzen dira, eta egoki antolatzen dituzte festak, baina beste era batera. Ez hobeagoak eta ez txarragoak, baina beste era batera.

Gaztesarea webgunean tarte zabala eman diote jaiei

2005-08-10T10:43:00.000+02:00

www.gaztesarea.org webgunean, gaur, azalean ageri da Santa Klara, Azken Portu eta Aritzbataldeko jaiei buruzko informazioa. Azalean ez ezik, barruan ere zabal jorratu dute gai hau.
Sarreran, gainera, "Azken Portu Zarautz ondoan, trenbidearen bestaldean, dagoen herri bat" dela diote. "Langile, etorkin eta nekazarien herria da. Dena ez baita postal turistikoa!" zehaztu dute Gaztesarea webgunean.

Sarrerako informazioaren ondoren, jaietako bandoa eta egitaraua jarri dute sarean, osorik. Azkenik, jaiei buruzko informazio gehiago helbide honetan lor daitekeela gaineratu eta blog honetarako esteka jarri dute.

Zehaztu dituzte ostiralean ariko diren sei bertsolariak

2005-08-10T10:32:00.000+02:00

Aitor Mendiluze, Jokin Sorozabal, Jon Maia, Jexuxmari Irazu eta Sustrai Colina ariko dira ostiral gaueko 22:00etan hasiko den bertso saioan, Azken Portuko Aritz Aranbururekin batera.
Gai jartzaile lanetan, berriz, Felix Zubia zarauztarrak jardungo du.

Hasieran batean Amets Arzallus zen etortzekoa, baina azken uneko aldaketak direla-eta, azkenean Sustrai Colina ariko da Arzallus beharrean. Oraindik lotzeko zegoen seigarren bertsolaria, berriz, Jexuxmari Irazu izango da.

Euskal Herriko txapelketarako entrenamendua ostiral gauean Azken Portun egingo duten sei bertsolariak, beraz, hauek izango dira:

—Aritz Aranburu.
—Sustrai Colina.
—Jexuxmari Irazu.
—Jon Maia.
—Aitor Mendiluze.
—Jokin Sorozabal.

Abuztuak 10, gaur, Gazteen Eguna: EGITARAUA

2005-08-10T09:46:00.000+02:00

ABUZTUAK 10, GAUR
Gazteen Eguna:
2 urtetik 100 urtera.

16:00. Suziriak auzoko jaiak iragarriz.
16:30. Buruhandiak.
17:00. Haurrentzat, ofizio zaharren inguruko jokoak
Kulki taldearekin: baserriko lanen inguruko jolasak.
18:30. Triduoa Santa Klara komentuko elizan.
19:00. Malabar erakustaldia eta malabaretan aritzeko aukera, Mamarro taldearekin.
22:00. Joxe Mari Artetxeren omenezko XVI. Gaueko Txirrindularitza Kriteriuma. Mailak: kadeteak eta gazteak.
23:30. Kontzertua: Tuboskapi (Ondarru) + Banda Batxoki (Txantrea).

Gaur hasiko dira jaiak!

2005-08-10T09:38:00.000+02:00

Iritsi da abuztuaren 10a.
Gaur arratsaldeko 16:00etan botako dituzte Santa Klara, Azken Portu eta Aritzbataldeko jaiei hasiera emango dieten suziriak, eta hiru egunez hainbat ekitaldi izango da jaiez gozatzeko.
Hedabideetan ere, lehen egunean, izan dute oihartzuna jaiek.
Gaurko HITZAk, esaterako, azala eskaini dio, eta barrualdean zazpi zutabe, lehen orrietan.
El Diario Vasco egunkariak ere, Zarauzko kronikan, lau zutabe eskaini dizkio auzoko jaiei, argazki eta guzti.

Festetan ezagutuko ditugunak [4]: MAMARRO MALABAR TALDEA

2005-08-09T14:32:00.000+02:00

Mamarro malabar taldeak ere bat egin nahi izan du Azken Portuko jaiekin eta, bihar, 19:00etatik aurrera, beraien asteazkenerako malabar saioa Azken Portun egingo dute, Plaza Gorrian.
Biltzen direnen aurrean erakustaldia egiteaz gain, haur, gazte, heldu eta gainerakoei malabarak egiten aritzeko aukera emango die Mamarrok.
Mamarro taldeko kideak zarauztarrak dira, aurten osatu dute taldea, eta uda honetan Sloveniara joango dira,
nazioarteko malabar topaketetan parte hartzera.

SENEKA musika taldea aurtengo jaietako abestia grabatzen ari da

2005-08-09T12:23:00.000+02:00

Lokala Azken Portun duen Seneka musika taldeak aurtengo jaietako abestia egin eta grabatzearen ardura hartu, eta lan horretan ari da egunotan. Mattin Epelde, Unax Nogales, Urtzi Odriozola, Gorka Garcia 'Gartxi' eta Eneko Arregi 'Konpi' dira taldeko kideak. Duela urtebete inguru sortu zuten taldea.
Taldekideek blog honi aurreratu diotenez, aurtengo kanta "Kuraiaren abestien estilokoa izango da.
Rock & Roll komertziala, nolabait".
Bi gitarra, baxua eta bateria erabiliz egin dute abestia, eta grabazioan "beste efektu batzuk" ere sartuko dituzte.
Abestiaren hitzei buruz galdetuta, letra Azken Portuko festen ingurukoa dela eta estribilloa SKAPA hitzarekin jolastuz
egin dutela adierazi dute.

Zehaztu dutenez, bihar goizerako abestia amaituta izatea espero dute.
Izan ere, "azken momentuan" ekin diote lanari. "Hasiera batean beste talde bat zen grabatzekoa, baina azkenean ez dutela grabatu jakin genuen aurreko asteburuan, eta larunbatean hasi ginen zerbait moldatzen. Korrika aritu gara, beraz". Taldekideek diotenez, Azken Portutako festetako abestia ez da "taldearen ohiko estilokoa. Jendeak gustura entzun eta dantzatzeko modukoa izatea nahi genuen, eta horren bila joan gara" diote.

Ez dago esan beharrik entzuteko desiratzen gaudela...
Eta ea laster blog honetan zintzilikatzeko aukerarik dugun.

Festetan ezagutuko ditugunak [3]: JAUKO BARIK

2005-08-08T17:55:00.000+02:00

[Iturria: azkenportu.blogspot.com (elkarrizketa argitaragabea). Egilea: Jon Benito].

—Noiz hasi zineten musikan? Nortzuk zarete?

Jauko Barik taldea duela 7 urte osatu zen, gutxi gorabehera. Haizea, Enara eta hirurok elkartu ginenetik, lokalean orduak sartzen hasi eta hilabetera eman genuen gure lehen zuzenekoa. Hortxe ohartu ginen musikak gure bizitzan duen garrantziaz. Eta handik aurrera ibilbide luze bezain ederra bizitzeko aukera izan dugu. Urte hauetan zehar, ia 200 kontzertu eman ditugu. Zuzeneko taldea garela azpimarratu beharra dago, musika sortzen dugunean, bizitzeko asmoz egiten dugu eta. Zuzenekoetan sortutako gure doinuak indarrez kaleratzen saiatzen gara.

—Bi disko atera dituzue, lehena Esan Ozenkirekin, bigarrena autoproduzituta. Nolako harrera izan zuten?
Nola ikusten dituzue orain?

Kaleratutako bi diskoak, oso bereziak izan dira, bietan helburua bera izan zen arren; egindako lana gorderik uztea, alegia. Batetik, Esan Ozenkirekin grabatu genuen lehen disko hark ate berri ugari ireki eta gauza berri asko ikasteko aukera eskaini zigun. Bestetik, gure lana geure kaxa ateratzeko irrikaz autoekoizpenaren apustuari eutsi eta bigarren CDa kaleratu genuen; BZZB...TA GOXATU izenekoa. Geure bat-batekotasunaren eta uneko indarraren isla da azken lan hauxe.

—Munduko emakumeen martxaren kantua ere idatzi zenuten. Nolako esperientzia izan zen?

Aurtengo udaberrian Euskal Herrian barrena abiaturiko Emakume Martxaren kanta egiteko aukera eskaini zigutenean,
pozez hartu genuen ardura.
Abestia sortu ez ezik, abeslariak hautatu eta proposatzeko ardura ere gure gain hartu genuen. Azkenean, honako abeslariak izan genituen laguntzaile: Keikeko Nerea, Izateko Claire, Anorexiako Itziar eta Zea Mayseko Aiora. Hainbat buru hainbat ahots, abestian bertan islatu bezala. Horixe bera izan zen asmoa, askotariko ahotsen bitartez askotariko emakume abeslariak aldarrikatzea.

—Atzerrian jotzeko aukera ere izan duzue. Zer moduz?

Bizipen berrien premian, Jauko Barik, Europan zehar abiatu ginen 2003 eta 2004eko udan; Alemania, Suitza, Holanda eta Frantziako hainbat tokitara hurbildu ginen. Izugarria izan zen!
Aurtengo udan, aldiz, Euskal Herriko txokoetara hurbiltzeko eta bertan jotzen aritzeko irrikaz abiatu dugu. Gaurko portua, Azken Portu.

—Nolakoak izaten dira zuen zuzenekoak...

Berezko nortasuna dutenak, eta apurka-apurka bizipenez eta oroitzapenez hornitzen doana.
Zuzenekoak dira gure bidea, gure giltza eta taldea bera gaur egun den horretan bilakatu duena.
Horregatik, gure gonbidapen apalena zabaltzen dugu bertara hurbildu eta musika doinuak gurekin batera goxa ditzazuen...

Santa Klara komentuan barrena

2005-08-08T11:12:00.000+02:00

Urola Kostako HITZAk Santa Klara komentuari buruzko erreportaje luze eta zabala argitaratu zuen atzo. Santa Klara egunaren atarian, azala eta bi orrialde eskaini zizkion.
Hau da, bere horretan, atzo HITZAn irakurri ahal izan genuena.

[Iturria: Urola Kostako HITZA, 2005-08-07. Egilea: Gari Berasaluze]

LAU MENDE OTOITZEAN ETA LANEAN

Zarauzko eraikin nabarmenenetakoa da Santa Klara komentua: 1610ean
sortu zuten, eta gaur egun 12 moja bizi dira bertan, otoitzean eta lanean

Zarauzko eraikin zaharrenetakoa da Santa Klara komentua. 1610ean sortu zuten, eta ordudanik bertan bizi diren klaratarrek hamaika otoitz egin dute herritarren alde. Datorren ostegunean Santa Klara eguna ospatuko dute, eta horren harira Hitza Sor Maria Nieves abadesarekin eta komentuko kanpo-harremanen ardura duen Sor Gloriarekin aritu da solasean.
Ohi bezala, Sor Frantziskok zabaldu du komentuko atea, eta behin kazetaria bisitetarako atondutako gelara eraman eta gero agertu dira beste bi mojak. Presarik gabe aritu gara solasean, luze, komentuaz, beraien bizimoduaz eta kanpoko munduaz, lasai asko.
Gaur egun hamabi lagun bizi dira Santa Klara komentuan. Gazteena abadesa bera da, eta 72 urte ditu. Galderei erantzuten hasi orduko, ordea, umoretsu, adin kontuak hainbeste ez zehazteko eskatzen dio Sor Gloriak abadesari. «80 urtetik gorakoak zortzi dira, eta gainerako laurak 70 eta 80 urte artekoak» dio.
Klaratarrak dira guztiak. Klaratarren erlijio-ordenan sartzen denak pobrezia-botoa bere egiten du, eta ez dute norberaren inolako ondasunik edo dirurik. Dutena, klaratarrentzat izaten da beti ere. «Ebanjelioan aita San Frantziskok eta ama Santa Klarak pobrezia betetzeko esan digute, eta horri eusten diogu». Horren harira, orain arte ez dute pentsiorik eta antzekorik kobratu. Azken urteotan, eta nolabait «garaiak aldatu direnez», hori ere aldatu egin da, eta orain jasotzen dute zerbait, baina beti ere dena klaratarrentzat bideratuta. «Inork ez du bere konturik: dena komunitatearentzat izaten da». Abadesak zehaztu duenez, «pentsioak onartu zirenean, bankukoek bakoitzak bere kontu korrontea izatea nahi zuten. Gotzaitegian galdetu nuen, eta argi esan ziguten ez onartzeko horrelakorik, guk ezin genuela. Beraz, kontu bakarrera joaten dira guztiak». Komentuaren gastuetarako erabiltzen dute diru hori, eta soberakinak misioetarako edota antzeko ekimenak laguntzeko bideratzen dute.
«Baratza saldu genuenean ere, horixe egin genuen, etxea konpondu: lokutorioa, sukaldea eta kapilla berritu. Sukaldea, berogailua, eta horrelako kontuak».
Eguneroko bizimoduari dagokionez, Santa Klara komentuko mojak, egunero, goizeko 06:00etan jaikitzen dira. 06:30ean kapillara sartzen dira, otoitzak eta errezuak egitera, eta 07:45ak arte egoten dira kapillan. Abadesaren hitzetan, «orduan Jauna agerian jartzen dugu, eta ordutik aurrera, orduerdiro, txandaka, hura zaintzera joaten da moja bat. Gainerakoek, lanari ekiten diote: sakristian, sukaldean, baratzean… bakoitzak bere lana dauka». Horrela eguerdira arte. 12:00etan angelusa errezatzen dute, eta gero salmo batzuk. Jauna erretiratzen dute ondoren, eta bazkaltzeko biltzen dira guztiak. Bazkalostean, denen arten biltzen dituzte ontziak, eta 14:00ak arte solasean aritzen dira, lasai. «Errekreoa» esaten dioten ordua izaten da hori. 14:00etatik aurrera, berriz, aisialdirako denbora izaten dute, bakoitzak nahi duena egiteko. 15:00etan berriro kapillara itzultzen dira, «Jauna agerian jarri, beste salmo batzuk errezatu, eta errosarioa egiten dugu. Izan ere, asko errezatzen dugu herriaren alde. Eskari asko izaten dugu, eta horien alde aritzen gara otoitzean». Gero, 18:00ak arte berriro aisialdirako denbora izaten dute. 18:00etan bildu, eta 18:30ak arte otoitz egiten dute. 18:30ean, berriz, meza izaten dute komentuko elizan, eta ateak zabalik izaten dira herritarrentzat. Meza bukatzen denean, «jauna hartu, otoitz egin, isilean egon eta bezperak errezatzen ditugu. Gero, 19:45an irten, eta 20:00etan afaltzen dugu. Afalostean berriro ontziak bildu denen artean, eta 21:00etan berriro biltzen gara». Orduan «azken otoitzak» egin, eta 22:00etatik aurrera «libre», elkarrekin hitz egin edo nahi dutenean ohera joateko.

Lanean, gustura

Bakoitzak komentu barruan dagokion lana egiteaz gain, denen artean, aparte, kanpotik ekartzen dizkieten zenbait lan ere egiten dute: kortinak josi eta antzekoak. Eguneroko bizimodu horrekin gustura ageri dira mojak. Sor Gloriak, gainera, hori nabarmentzeko ere eskatzen du: «Adinekoak gara, baina gero eta hobeto bizi gara. Izan ere, orain nahi duguna egiteko askatasuna dugu. Nahi duenak ahal duena egiten du, eta hainbeste maite garenez, bata bestearen lanak harrapatzen jarduten gara, elkar laguntzeko».
Baratzea zaintzeko, gainera, «lan zail guztiak egiteko amorratzen dagoen beste gizon bat» iritsi zaie. Mojentzat, «mirari baten antzekoa» izan da baratzeko lanetarako bigarren lagun hau iristea. «Orain, beste mirari handiagoa espero dugu, eta ea neska gazteak iristen zaizkigun gure artera!». Izan ere, 60ko hamarkadan sartu ziren azken mojak komentura, 1960an. Ordudanik, ez da beste «gazterik» iritsi. Hala ere, kanpotik borondate oneko herritarrak joaten zaizkie laguntzera, eliza garbitzera eta antzekoetara, eta mojek gustura hartzen dute laguntza hori.
Kanpoko jendearekin duten harremanari buruz galdetuta, bisitan jende askorik ere ez zaiela joaten diote. «Familiakoak eta lagunak etortzen dira batez ere. Eta, gero, bereziki, Santa Klarari laguntza eskatzera etortzen den jendea. Premia handian dagoenean etortzen da jendea, larri, kandelak ekarri eta haien alde otoitz egin dezagun eskatzera». Bisitak ez dituzte mugatuta, eta nahi duena joan daiteke bisitara. Dena dela, Garizuman eta abenduan ez dute bisitarik jasotzen, eta hilean behin ere, 21ean, «erretiroa» izaten dute. «Egun bereziak dira horiek, eta guretzat hartzen ditugu, otoitzerako».
Kanpora, berriz, orain lehen baino gehiago ateratzen direla aitortu dute. Lehen ez ziren ateratzen, eta sendagileak, dentistak eta antzekoak komentura bertara joaten ziren. Garai batean, norbait operatu behar baldin bazen ere, komentuko erietxean bertan operatzen zuten. Orain, berriz, sendagilearengana edota dentistarengana joateko, «kanpora» atera behar izaten dute. Enkargutara edota erosketak egitera joateko ere ez dute inolako arazorik. «Bokazio falta handia dago, eta horrek erraztu egin dizkigu gauzak. Elizak berak, nolabait, malguago jokatu du, eta erraztasunak eman dizkigu kanpora ateratzeko. Baimenak eskatuta, ez dugu inolako arazorik izaten».

Elikagai gehienak, etxekoak

Dena dela, ahal duten guztia beraiek ekoizten dute: komentuaren harresien barruan hainbat lur dute oraindik, eta baratzeak, fruta arbolak, ardiak, oiloak eta beste zenbait abere ere badituzte. «Lehen zerriak ere bagenituen, baina, orain, zahartu garenez eta horien haragia komeni ez zaigunez, utzi egin behar izan ditugu». Garai batean, beraien baratzetik bizi ziren hein handi batean. «Dirurik kobratzen ez genuenean, baratzean landutakoak saltzen genituen, asko, eta hura zen gure diru sarrera bakarra. Baratzea, eta jostea». Gaur egun, ordea, kanpotik ere gauza asko ekartzen dute, batez ere neguan. Hori, ordea, kalitatean nabaritu egiten dute gero. Izan ere, kanpoan, eta kalitate agiriak eskuratu arren, elikagaiak ez dira garai batekoak bezalakoak. Eguraldi ona eskatzeko ekartzen dizkieten arrautzei begiratuta soilik ohartzen dira horretaz. Etxeko arrautza freskoekin ohituta dauden mojek, zenbakiak idatzita daramatzaten arrautzak ere ikusi behar izan dituzte azkenaldian: «Gaur lehendabizi gorringoa hori-hori-horia zuen arrautza bat ikusi dut. Nazka ematen zuen. Baina zer zen hura!?» dio Sor Gloriak.

Kanpoan, «dena presaka»

Kanpoko mundua, azken batean, arrotza egiten zaie. Arrazoi bategatik edota besteagatik kanpora ateratzen direnean, «dena presaka» dabilela iruditzen zaie. «Hitz egiteko denborarik ere ez du izaten jendeak, eta bi hitz besterik ez ditu egiten» dio abadesak. «Alde ederra da hona sartu eta solasean lasai aritzea, beste lasaitasun batean». Sor Gloriak, berriz, harrituta dio: «Esaten dutenez, askotan, etxean bertan, auzokoak ere ez omen dira ezagutzen!». «Hemen, ordea, beste giro bat dago, beste lasaitasun bat. Leku guztietan bezala, izaten dira laino txiki batzuk, baina laster alde egiten dute».
Azkena sartu ziren mojek 45 urte daramatzate komentuan, eta haiek sartu zirenetik ez da moja berririk iritsi. Sor Maria Nieves abadesa bera izan zen komentura sartu zen azken mojetako bat.
Urte hartan, zehazki, 1960an, hiru moja iritsi ziren komentura. «Ordura arte, urtean bat edo bi etortzen ziren. Urte hartan, ordea, antza denez ondo itxi zituzten ateak, eta ordudanik ez da beste inor etorri» dio Sor Gloriak. «Gehienak 30 urtetik beherakoak ginen orduan, eta zarauztarrak zortzi edo hamar bat ginen».

SANTA KLARA EGUNA, OSPAKIZUN HANDIA

Santa Klara, Azken Portu eta Aritzbataldeko jaiak gainean direla ederki dakite mojek. Abuztuaren 11n ospatzen dute Santa Klara eguna, eta urteko egun handienetakoa izan ohi da klaratarrentzat. «Handitasunez ospatzen dugu gure eguna» diote. «Hirurrenak egiten ditugu, eta gero meza nagusia, Santa Klara egunean bertan. Aurten, gainera, berezia izango da meza: Parrokiko korua etorriko da abestera, eta gero hamaiketakoa emango diegu, ospatzeko».
Festa egunetan gauean «jasan» behar izaten duten kontzertuen musika «eta zarata», ordea, arrotzagoa zaie. Lo errazekoak direla diote, baina erietxeko gelak dira kanpoaldera ematen dutenak, eta han norbait suertatuz gero, festa egunetan lo egingo duenik ez dagoela diote. Hala ere, ahal izanez gero, bertsolariak entzuten gustura egoten omen dira.

1610. URTEAN SORTUTAKO KOMENTUA
Klaratarren komentua Narros jauregian bizi zen alargun
aberats batek sortu zuen, alabekin batera, XVII. mendean

Sor Gloriak ederki ezagutzen du Santa Klara komentuaren historia. Bera da liburutegiaren eta artxiboaren arduraduna, baina ez du liburuetara jo beharrik komentua noiz, nork eta nola sortu zuten esateko. Ederki asko du gogoan: «Narros jauregian bizi zen Doña Maria Ana de Zarauz, aberatsa, zumaiar baten alarguna. Alaba zaharrena Iraetako gizon batekin ezkondu zitzaion, baina alaba horren senarra ere hil egin zen. Ama, orduan, alaba alargunarekin eta beste bi alabekin geratu zen, eta mojak izatea erabaki zuten. Baina ez zekiten zein ordena aukeratu, eta txotx egin zuten. Santa Klara atera zitzaien, eta moja klaratarrak izatea erabaki zuten. Zer egin behar zuten ez zekitenez, Burgosko Lerma komentuan laguntza eskatu zuten, handik mojak etor zitezen, beraiei bizitza berria erakustera. Oso aberatsak ziren, eta zituzten baserri, lur eta gainerakoak eman egin zituzten, eta komentu hau eraikitzea erabaki zuten. Komentu hau eraiki bitartean, hogei bat urtez, Narros jauregian egon ziren bizitzen moja klaratarrak. Orain, Pagoetara bidali nahi gaituzte, baina guri, lehenago, Narros jauregia dagokigu. Hura izan zen klaratarren lehen egoitza Zarautzen».
Memoriak ez dio hutsik egiten Sor Gloriari. Horrela baitira kontuak: Maria Ana de Zarauz y Gamboak, Francisco Bouquer de Warthou-ren alargunak, eta bere bi alabek —Mariak eta Clarak— sortu zuten Santa Klara komentua. Felipe III.ak eman zien lizentzia, Madrilen, 1610eko urtarrilaren 4an. 1611n hasi ziren eraikuntza lanetan, eta 1625ean amaitu zuten. Eliza, berriz, geroago eraiki zuten, 1656an, gurutze itxurako egiturarekin. Agiri zaharretan irakur daitekeenez, «sortzaileek komentuari 14.000 dukat eman zizkioten, eta urtero 700 errealeko errenta ordaintzen zuten».
Sorrerako kontuak ez ezik, aurreko mendekoen berri ere badute mojek. Espainiako Gerra Zibilaren garaian, esaterako, komentuan bertan «emakumeak preso» egon zirela gogoan du Sor Gloriak: «Hori nik baino zaharragoek jakingo dute. Sor Begoña postulantea zen orduan hemen, sartu berria, eta gogoan izango ditu kontu horiek. Nik badakit hemen emakumeak preso egon zirela, baina zenbat egon ziren eta zer-nolako biziera izan zuten, hori ez dakit. Aurreko gerran, karlistaldian, larri ibili ginen, eta komentutik atera eta Bilbora joan behar izan genuen, kanpora. Oraingo gerran [1936koagatik ari da], ordea, larri samar ibili arren, ez ginen joan. Hemen geratu ginen».

SOR GLORIA, ZARAUZTARRA
Sor Gloria zarauztarra da. 80 urtetik gora ditu, eta 60 urtetik gora daramatza Santa Klara komentuan. Abizena zein duen eta zein baserritakoa den esan arren, nahiago du horiek ez argitaratzea, hainbat herritarrek ezagutuko dutelakoan.
Urte asko eman ditu komentuan sartuta, atera gabe. Azken urteotan, ordea, tarteka, kontu batera edo bestera kanpora atera behar izan du, eta erabat arrotza zaio gaur egungo herria. «Oraintxe urtebete hil zait ahizpa» dio, «eta hiruzpalau aldiz harekin egon nintzen ospitalean. Irtetzen nintzenean, gauza guztiak nireak ez balira bezala ikusten nituen. Eskaparateetan ikusten ditudan gauzak ezer ez balira bezala dira niretzat. Ezin dira hartu, erabili, konpartitu. Ez dira gureak. Hemen, berriz, dena denona da, eta hartu, erabili eta konpartitu egin dezakezu».
Zarautzek izan duen aldaketarekin ere erabat txundituta geratu da azken urteotan Sor Gloria. Izan ere, komentura sartu zenean baserriak, baratzeak eta lurrak besterik ez zeuden inguruetan. «Beste ezer ez
zegoen». Orain, herrian, «hasi kanposantutik eta beste alderaino, etxeak eta etxeak besterik ez daude.
Harrigarria da zenbat aldatu den Zarautz. Zoratuta daude hor kanpoan. Jendeak bere kalekoak ere ez ditu ezagutzen!».

Leiho irekia Komisioarentzat

2005-08-08T08:56:00.000+02:00

KOMISIOAREKIN lotutako kontuak, beste albisteetan komentatu beharrean, atal honetan komentatuko ditugu: egitaraua, publizitatea, bilerak, eta hurrengo egunotan sortzen joango zaizkigun gainerakoak.
Komisioko bati edo besteari zerbait esateko, beraz, komentarioen atala erabil daiteke.

Azken Portuko txapela San Pelaiora...

2005-08-07T15:43:00.000+02:00

[Giro ederra izan zen atzo Plaza Gorrian].

MUS Txapelketa Herrikoiaren txapela Abel Agües eta Pablo Mariñok irabazi zuten atzo. Azken Portuko festetako Mus Txapelketa Herrikoko txapela, bada, San Pelaioko bikote batek eraman zuen azkenean.
Arratsaldeko 16:30etik aurrera, giro ederra egon zen atzo Plaza Gorrian. 80 bat lagun elkartu zen musean aritzeko.
20:30ak aldera amaitu zen finala, eta ikusmin handia sortu zuen.
Lehen lau bikoteak honakoak izan ziren:

1. Abel Agües eta Pablo Mariño: txapelak, 5 kilo txuleta, langostino kaxa bat, eta bi ardo botila eraman zituzten.
2. Txulai eta Dan.
3. Axier Kortajarena eta Igor Iturralde.
4. Bernal eta Santos.

[Zahar, gazte, heldu, mutil, neska... ohi bezala, kolore guztiak bildu ziren atzo ere Azken Portun].
[Azken kanporaketetan, dagoeneko, ikusmina nabarmena zen].
[Txapela zuten zain irabazleek...].
[Bernal eta Santos, laugarren postuan geratu zen bikotea. Festetako kamisetak, herri bazkarirako txartelak, eta garagardo mordoa eraman zuten etxera].
[Finalak ikusmina sortu zuen Plaza Gorrian].
[Axi eta Butu, aurten hirugarren... baina gustura!].
[Txulai eta Dan... finaleraino iritsi eta txapela San Pelaiora joaten uztea ere!].
[Abel Agües eta Pablo Mariño, aurtengo txapeldunak, gustura...].
[Horrelako podiuma ez du edozeinek, e?! ZORIONAK!!!].

80 lagun inguru Mus Txapelketa Herrikoian

2005-08-06T18:21:00.000+02:00

40 bikotek eman dute izena gaur arratsaldean Plaza Gorrian jokatzen ari den Mus Txapelketa Herrikoirako,
eta arratsaldeko 17:00ak baino apur bat lehenago ekin diote guztiek txapelketari, giro ederrean.

Mus Txapelketa Herrikoia, 16:30ean Plaza Gorrian

2005-08-06T14:56:00.000+02:00

Mendizabal kinkiladendan txapel dotore askoak egin dituzte bikoite irabazleentzat.
16:30etik aurrera hasiko da txapelketa.
Irabazleen zain daude dagoeneko txapelak...

Auzokide, tabernari eta dendariei deia

2005-08-05T08:54:00.000+02:00

Komisioaren urteroko deia Santa Klara, Azken Portu eta Aritzbataldeko auzokide, dendari eta tabernariei.

AUZOKO BIZTANLE, TABERNARI ETA DENDARIOI:

"Urtero bezala, heldu da abuztua, eta honekin batera badatoz auzoko festak ere. Gauzak horrela, prestaketa lanetan aspalditik gabiltza Komisioko hainbat kide, aurten ere denen gustuko egitarau zabala osatzeko asmoarekin.
Izan ere, festak denok atsegin ditugu, beti izaten dira guztion gozamenerako. Baina denontzat den zerbait denon artean egin beharra dago. Denok jarri behar dugu gure hondar alea. Hori horrela izanik, festen antolakuntzak auzoko eragile ezberdinen parte hartzea eskatzen du. Eta arlo ekonomikoari dagokionez, urtero bezala, ezinbestekoa zaigu auzokide, dendari eta tabernarien diru laguntza.
Beraz, zinez eskertuko genizueke zuen aste honetan jaietako egitarauarekin batera postontzietan utzi dugun gutunazalean emango bazenigukete. Diru bilketa egunotan egingo dugu komisioko kideek.
Era berean, festen inguruan iradokizun edo kexarik baldin baduzue, jakinarazi iezaiguzue gutunazal honen bitartez. Denon artean urtez-urte festa hobeagoak antolatuko ditugulakoan, mila esker eta ondo pasatu jaiak!".

Komisiyua

Komisioko kideak bihar hasiko dira herria festetako banderatxoekin apaintzen

2005-08-05T08:44:00.000+02:00

Bost egun besterik ez dira geratzen herriko jaiak hasteko!
Horren harira, bihar goizean hasiko dira komisioko kideak Santa Klara, Azken Portu eta Aritzbataldeko bazterrak festetako banderatxoekin apaintzen.
Urtero bezala, etxeetara sartu eta balkoietan banderatxoak lotzeko herritarren laguntza beharrezkoa izango da.
Beraz, beldurrik gabe ireki ateak...

Egitaraua dagoeneko herritarren etxeetan dago

2005-08-04T10:50:00.000+02:00

Komisiko kideek atzo arratsaldean banatu zuten aurtengo festetako egitaraua Santa Klara, Azken Portu eta Aritzbataldetako postontzi ia guztietara. Hau da bertan ageri dena, kontu batzuk apur bat gehiago zehaztuta:

ABUZTUAK 6, LARUNBATA
16:30ean Mus Txapelketa Herrikoia. Azken Portuko Plaza Gorrian.
6€ bikoteko.
Sariak:
1. bikoteari: txapelak, 5 kilo txuleta, langostino kaxa bat eta bi botila ardo.
2. bikoteari: 5 kilo kostilla, langostino kaxa bat eta bi botila ardo.
3. bikoteari: 5 kilo kostilla, eta bi botila ardo.
4. bikoteari: herri bazkarirako bi txartel eta festetako bi kamiseta.

ABUZTUAK 9, ASTEARTEA
18:30 Triduoa Santa Klara komentuko elizan

ABUZTUAK 10, ASTEAZKENA: GAZTEEN EGUNA (2 urtetik 100 urtera!)
16:00 Suziriak auzoko jaiak iragarriz
16:30 Buruhandiak
17:00 Haurrentzat, ofizio zaharren inguruko jokoak Kulki taldearekin: baserriko lanen inguruko jolasak.
18:30 Triduoa Santa Klara komentuko elizan
22:00 Joxe Mari Artetxeren omenezko XVI. txirrindularitza kriteriuma. Mailak: kadeteak eta gazteak.
23:30 Kontzertua: Tuboskapi (Ondarru) + Banda Batxoki (Txantrea)

ABUZTUAK 11, OSTEGUNA: SANTA KLARA EGUNA
09:00 Txistulariak, trikitixa eta suziriak.
10:00 Buruhandiak
10:30 Marrazki lehiaketa auzoko haurrentzat
(bi maila izango dira: 7-10 eta 11-14 urte bitartekoak)
Etxetik, margoez gain, orripean jartzeko euskarriren bat ere ekarri beharko da.
11:00 Meza Nagusia
12:00 Auzoko jubilatuentzat hamaiketakoa.
16:00 Buruhandiak
16:30 Gorri, Xalto ta Brinko pailazoen ikuskizun berria: Olinpiadak.
18:30 Mollari dantza taldearen erakustaldia.
19:00 Txokolatada gozozale guztientzat,
19:00 Triduoa Santa Klara elizan
19:30 Herri kirol jaialdia:
Aizkolariak: Txapartegi eta Peñagarikano.
Harri jasotzaileak: Izeta II.aren erakustaldia harri ezberdinekin.
Gero, harri zulatzaileen erakustaldi ikusgarria: Bizkaia eta Gipuzkoa
nor baino nor gehiago. Meatzaldeko Harrizulatzaileak Elkartearen laguntzarekin.
22:30 V. Nazio Elkartasun Kontzertua:
Jauko Barik (Oiartzun) + Sexty Sexers (Bera) + Pirats Sound Sistema (Bartzelona).
Tartean Zarauzko Gazte Asanbladaren antzerkia (Gaur kalian bihar gaztetxian).

ABUZTUAK 12, OSTIRALA
10:30 Txistulariak, trikitixa eta suziriak.
Goizean zehar auzoko txaranga kaleak alaituz ibiliko da.
11:00 Umeentzako jokoak
11:45 Balkoi dotoreena (Artelan dendak emandako saria)
Tortilla txapelketa (Arantxa loradendak emandako saria)
12:00 Toka txapelketa (Aranburu kristaldegiak emandako garaikurra)
12:30 Triku poteoa, trikitixarekin eta batukadarekin alaiturik.
Tartean, Azken Portuko mendate berria inauguratuko da: Konkorra.
14:30 XIII. Auzoko bazkari herrikoia: txartelak abuztuaren 8a baino lehen hartu beharko dira.
Bazkalostean piropo eta argazki lehiaketaren sari banaketa.
Piropo lehiaketaren sariak, AEKren eskutik.
Argazki lehiaketaren saria: afaria bi lagunentzat Toki Ona tabernan.
22:00 Punta-puntako bertsolarien entrenamendu saioa Euskal Herriko Txapelketarako: Jon Maia, Aitor Mendiluze, Jokin Sorozabal, Amets Arzallus, Aritz Aranburu… Gai jartzailea: Felix Zubia.
Ondoren, dantzaldia Nekin taldearekin.

ONDO PASATU JAIAK, BAINA EZ PASATU!!!

Jaietako egitaraua gaur hasiko dira banatzen postontzietara

2005-08-03T10:47:00.000+02:00

GAUR arratsaldeko 19:00etan, Urpekoak elkartean, komisioaren bilera irekia izango da.
Izan ere, bada lanik egiteko: egitarauak gaur jasoko dituzte inprentatik, eta horiek hartu,
sobreak antolatu, eta taldeka banatuta, herriko postontzietara banatu behar dira.
Egitaraua Santa Klara, Azken Portu eta Aritzbataldeko ahalik eta etxe gehienetara gaur bertan
banatzea da antolatzaileen asmoa.
Estimatuta geratuko da denen laguntza. Badakizue: azaldu!
Astebete besterik ez da geratzen-eta festetarako!

Festetan ezagutuko ditugunak [2]: HARRIZULATZAILEAK

2005-08-02T11:10:00.000+02:00

Abuztuaren 11n, ostegunean, herri kirol jaialdiaren baitan, ikuskizun berezia izango dugu aurten Azken Portun: harrizulatzaileak. Bizkaia eta Gipuzkoako taldeak ariko dira nor baino nor, lehian. Zehazki, Galdames eta Jaizubiako taldeak.
Harrizulatzaileak ez dira hain ezagunak inguru hauetan, baina tradizio luzea duen herri kirola da, eta hori berreskuratzeko elkartea ere osatu dute hainbat lagunek. Honako artikuluan duzue informazio zabalagoa:

HARRIZULATZAILEAK: HERRI KIROL BAT BERRESKURATZEN

[Iturria: www.euskonews.com - Egilea: Jabier Santamaria, Meatzaldeko Harrizulatzaileak elkarteko kidea]

Azken urte hauetan, gero eta gehiago ari gara ikusten herri kirol bat, berria askorentzat: harrizulatzaileak. Berria ote, baina? Oker dabil horrela pentsatzen duena, herri kirol hau harrizulatzaileek edo barrenolariek egin baitzuten eta mende bat baino gehiagoko antzinatasuna baitu. Kirol praktika hau orain dela gutxi arte desagertuta zegoen, baina azken urte hauetan, eta hainbat pertsonaren ahaleginez, berreskuratu egin da, zorionez.

Saia gaitezen artikulu honetan atzera egiten historian, eta berreskurapen prozesu honi buruz hainbat datu plazaratzen, beti ere harrizulatzaileen herri kirol honen gainean gehiago jakiteko.

[Urtuellako proba zaharra. Udaletxearen plaza. 1917].

JOKOAREN JATORRIA

Euskal Herrian, beste edozein herri kirolek bezala, lanean du jatorria. Erronka eta apustua direla medio, plazara eraman zen eta kirol bihurtu. XIX. mendearen amaieran eta XX. mendearen hasieran, lanbide hau nahiko ohikoa zen harrobi eta meatzeen ustiapenean. Leku horietan haitzari zulo sakonak egin behar izaten zitzaizkion, bolbora edo dinamita kartutxoak sartu eta eztanda eginaraziz, interesatzen zen harri edo mineral mota ateratzeko. Bizkaiko Meatzaldean (Urtuella, Gallarta, Galdames, Trapagaran, Muskiz,...) burdin mea zen helburu. Euskal Herriko beste leku batzuetan, berriz, batez ere Gipuzkoa eta Bizkaia artean (Markina, Deba, Itziar, Eibar, Mendaro, Elgoibar,...), eraikuntzan erabiltzen zen kareharria lortzea zuten helburu.

Harrizulatzaileek altzairuzko barrena luzeak erabiltzen zituzten lanean, eta egin behar ziren zuloek askotan bi metro baino gehiagoko sakonera izaten zuten. Oso ogibide gogorra zen, egun osoan ibili behar baitziren gora eta behera hamar kilo baino gehiagoko barrena batekin. Agian, horregatik, eta euren egitekoa ezinbestekoa zelako, oso langile preziatuak ziren. Euren lana espezialista batena zen eta meatzeetan goi mailako langiletzat hartzen zituzten; alegia, beste edozein beharginek baino soldata hobea zeukaten.

Kirol legez, harrizulatzaileen probak oso ohikoak ziren gure herrietako plazetan. Lehen komentatu ditugun eskualdeetan: Meatzaldean, batetik, eta Bizkaia eta Gipuzkoaren arteko mugan, bestetik, herriko jaietan ekitaldi garrantzitsutzat jotzen ziren harria zulatzeko ekimen ikusgarri hauek. Horrez gain, sona handiko herri kirol jaialdiak egiten ziren herrietan ere, Tolosan eta Azpeitian esaterako. Garai haietan lehiak banan-banan izaten ziren, eta beraz, harrizulatzaileak laguntzaile batzuekin batera lehiatzen ziren: “Baietz nik zulo sakonagoa egin!” edo “baietz nik barreno gehiago bi minutuan” gisako erronkak botaz. Erronka batetik bestera, zuloen sakontasunetik probaren iraupenera aldatzen zen.

[Tolosako proba zaharra. Justizia Plaza. 1920].

Proba hauen erreferentzia bibliografiko asko daude erregistratuta. 1910eko “El Pueblo Vasco” egunkariak, adibidez, Moncalvillo harrizulatzailea goraipatzen du artikulu batean. Artikulu honetan ikusgai duzue argazki batean Urtuellan 1917an egindako txapelketa bat. Vicente Blasco Ibañez idazleak “El intruso” liburua idatzi zuen 1904an eta han harrizulatzaile proba baten deskribapen literarioa egiten du, azpimarratzea merezi duena. Lehiaren kontakizuna Azpeitian kokatuta dago, eta hango harrizulatzaile baten eta Gallarta aldeko beste baten artekoa kontatzen du.

Hala ere, 1930 urte inguruan, Gerra Zibila baino lehenago, harrizulatzaileen txapelketak desagertu egin ziren. Mailu hidraulikoak eta beste makina batzuk agertu ahala harrobietan eta meatzetan zuloak eskuz egitearen beharra desagertu zen. Horren ondorioz, harrizulatzaileen lana ere desagertu egin zen, eta badirudi izen bereko kirolariei ere gauza bera gertatu zitzaiela.

BERRESKURATZEA

Desagertu ostean, urte asko igaro ziren harik-eta herri honen ondare kultural eta historiko hau berreskuratu arte. Guk saiakera batzuen berri jaso izan dugu. Esaterako, 1978ko maiatzean, Mendaron, Trinidadeko erromerian, eta urte berean, irailean, Markina-Xemeingo Arretxinaga auzoan. Bi erakustaldi horietan gizon heldu batzuek - gaztetan lanbide honetan arituak- azalpenak eman zituzten lana eta kirola uztartzen zituen harrizulatzaileen jardueraren inguruan.

Hogei urte beranduago, 1998ko urriaren 3an, Urtuellako Euskal Jaietan, herriko Autrigoiak Euskara Elkarteak harrizulatzaile txapelketa bat antolatu zuen, gure ondasun historiko hau berreskuratzeko eta euskara suspertzeko asmoz. Gure eskualdeko bi ondasun hauek, euskara eta harrizulatzaileak, berreskuratu eta euren normalizazioaren bidean aurrerapausoak egitea nahi zuten. Euskarak bere urratsak emanak zituen bide honetan. Garaia zen harrizulatzaileek ere, euskararen eskutik, herriaren bizitzan zegokien protagonismoa berreskura zezaten.

[Urtuellako Euskal Jaiak 1998-10-3. Lehen proba 80 urte ostean. Partehartzaileak].

Egun esanguratsu hartan hiru talde lehiatu ziren. Harrizulatzaile gehienak urtuellarrak izan ziren, baina tartean Trapagarango eta Abantoko jendea ere izan zen. Zein taldek 30 minutuan 10 zentimetro sakoneko zulo gehien egiten zituen, harexek irabazi zuen. Garai berri hauetan harrizulatzaile txapeldunak Iñaki Arana, Jorge Mateo eta Jabier Santamaria izan ziren, 4 zulo edo 40 zentimetroko markarekin.

Markina-Xemeinen eta Mendaron gertatu zen bezala, Urtuellako herrian ere benetan pozgarria izan zen harrizulatzaileen proba bat berriz ikusi ahal izatea. Urtuella bezalako herri batentzat, ofizialki 1901ean sortua, oso garrantzitsua izan zen kirol hau berreskuratzea, berau ondare kultural-historikoa eta adinez herria bera baino zaharragoa. Gaur egun, nahiz eta meatzeak ustiapena ez mantendu, bere burdina eta harrizulatzaileak herriaren ikur bihurtu dira eta elementu honek kanpora begira identifikatzen gaitu. Harrizulatzaileek zerikusi handia izan zuten herriaren sorkuntzan, eta gaur egun, XXI. mendean, oraindik ere, protagonistak izaten jarraitzen dute.

LEHIAKETA MODERNOAK

Zegokion lekua emanez harrizulatzaileen kirolari, eta arestian aipatu legez, Urtuellako lehen proba hark bultzatua, 1999an proba ofizialak eta txapelketak hasi ziren.

Gaur egungo txapelketek 30 minutu irauten dute eta zuloak 10 zm. du sakonera. Denbora horretan zulo gehien egiten dituen taldeak irabazten du. Amaitu gabe geratzen bada azken zuloa, haren zentimetroak ere zenbatzen dira.

Harrizulatzaileak hirunaka, binaka edo banaka aritzen dira. Azken kasu honetan probak 20 minutu irauten du. Talde bakoitzarekin botilero bat egoten da. Honek funtzio bikoitza du. Alde batetik, ura botatzen du zuloetara, eurotan geratzen diren harri koskorrak ateratzeko eta ahal den heinean barrena asko ez berotzeko; beste batetik, harrizulatzaileen txandak antolatzen ditu. Botileroak pentsatzen duenean zuloa eginda dagoela, epaileari deitzen dio neur dezan. Honek zuloa ontzat ematen badu, ziurtatzen badu 10 zentimetro sakonera duela, taldeari zenbatzen zaio.

1999an formatu hori jarraitu zen Harrizulatzaileen I. Ligan. Lehen ekitaldi horretan Arboledako taldea atera zen garaile, batez-beste 6 zulo eta 4 zentimetroko marka eginda. Berarekin batera Gallarta, Urtuella eta Abantoko taldeak aritu ziren lehian.

Urte hartatik hasita, urtero egin da liga eta, pixkanaka-pixkanaka, proban talde ezberdinek hartu dute parte:
1998 Urtuella 7
1999 Abanto 2
1999 Arboleda 6
1999 Gallarta 7
2000 Galdames 5
2000 Kotorrio 1
2002 Trapagaran 4
2004 Aldai-alde 2
2004 Txorierri 2
2005 Sanfuentes 1
2005 Errekatxo 1
2005 Sondika 1

Ligaz gain, ezerezetik bidea osatuta, egun badira harrizulatzaile liga ofizial gehiago. Bata kopa moduko bat da, kanporaketak irabazi behar baitira finalera heltzeko. Kasu honetan probek formatu berdina dute: 30 minutu eta 10 zentimetroko zuloak. Bestea banakakoa da, harrizulatzaileak bakarka lehiatzen dira euren artean. Bere gogortasunagatik azken txapelketa mota hau azpimarratuko genuke. Banakako proba horiek antzinako txapelketekin antz handiagoa dute, eta sufrimendu handikoak dira. Kasu honetan 20 minutu irauten du probak eta zuloak 10 zentimetrokoak dira.

Txapelketekin batera, osagarri moduan eta herri kirola ezagutarazteko, erakustaldiak egiten dira. 1998tik gaur egun arte 100 erakustaldi baino gehiago egin dira Euskal Herriko hainbat lekutan. Askotan jendea harrituta geratzen da benetan gogorra eta ikusgarria den kirol hau ezagututa. Hainbat eta hainbat pertsona asko pozten dira, konturatuta kirol hau – etxeko zaharrek bakarrik ezagututa – berreskuratu dela. Luzeegia izango litzateke egin diren erakustaldien berri ematea. Adibide gisa hemen zerrendatzen dira zeintzuk erakustaldi egin diren lehen aldiz Bizkaiko Meatzaldetik kanpo:

* 1999: Ondarroa
* 2000: Aulesti, Getxo, Markina-Xemein, Güeñes, Sestao eta Bilbo
* 2001: Arrigorriaga, Mutriku, Portugalete, Balmaseda eta Tolosa
* 2002: Sondika, Erandio,Ugao eta Santurtzi
* 2003: Garai, Arrankudiaga, Zalla, Sopuerta eta Leioa
* 2004: Iruñea, Uharte-Arakil, Mungia, Aramaio, Barakaldo, Derio, Trutzios, Forua, Etxebarria, Gatika, Zeberio, Errespalditza, Arrasate eta Nabarniz

HARRIZULATZAILEEN PROBAK: IKUSKIZUNA ZIURTATUTA

Harrizulatzaile proba bat ikusten dugunean jaso dezakegu lehenengo inpresioa probak oso ikusgarriak direla eta zenbat eta talde gehiago aritu, orduan eta ikusgarriagoa direla da. Harrizulatzaileak ikustea taldeen barrenak etengabe joka harriaren kontra, harrizulatzaileak hasperenka, noizbehinka oihu txikiren batek ihes egiten duela eta kolpearen ondorioz irteten diren ur zipriztinak eta harri solte txikiak hara-honaka,... horiek guztiak zeharo erakargarriak suertatzen dira.

Harrizulatzaileek esfortzu eskerga egiten dute, eta eurentzat oso lagungarri izaten da ikusleen animuak jasotzea intentsitateari eusteko. Hori ziurtatzeko, eta probari emozio gehiago emateko, normalean apustu txiki batzuk egiten dira. Hiru galdera asmatu behar izaten dira: nork irabaziko duen proba, zenbat zulo osorik egingo dituen talde irabazleak eta, azken galdera, osatu gabeko azken zuloak zenbat zentimetro izango dituen. Galdera horiek asmatzen dituenak, edo pasa barik gehien hurbiltzen denak, batzen den diru guztia eramaten du sari. Apustuak beti egon dira lotuta herri kirolarekin, eta harrizulatzaileekin ere horrela gertatzen da, bai lehen eta baita orain. Hala ere, jokatzen den dirua ez da asko, apustu bakoitzak euro bat balio baitu eta, beraz, proba batean gehien batu den diru kopurua ez da oso altua izaten.

[Trapagarango proba. 2002].

Ez da gauza erraza harria zulatzea, are gutxiago hogeita hamar minutuan. Hasiera batean badirudi indarra besterik ez dela behar, baina ez da hori bakarrik, erresistentzia fisikoa eta teknika egokia ere ezinbestekoak dira.

Zuloak egiteko teknika behar da, eta hau lortzen da proba aurretiko entrenamenduetan. Kolpe bakoitzeko buelta txiki bat eman behar zaio barrenari. Horrela lortuko dugu zuloa borobila egitea, bestela ezin izango genuke sakontasunik lortu, barrena zuloan geratuko bailitzake ez atzera ez aurrera.

Barrena ahalik eta altuen altxatu behar da eta, zenbat eta distantzia gehiago egon barrena eta harriaren artean, orduan eta abiadura handiagoko kolpea ematen da. Beso luzeak izateak altuera hartzen laguntzen du. Batzuek oin puntetan ere jartzen dira edota jauzi txiki bat egiten dute. Bizkarra okertu gabe eutsi, barrena zuzen jaitsi eta horratx kolpea. Justu une hauxe da garrantzitsuena. Barrenak harria jotzen duenean, gogor eutsi behar zaio kolpeari. Harriari ahalik eta min gehien egin behar zaio, izan ere, azken momentu hori, biolentzia handikoa, ondo kontrolatzen badugu, etekin handia aterako diogu gure esfortzuari, eta kolpe gutxiagorekin zuloa arinago egingo dugu. Eta ez ahaztu, kolpea eta indarra mantendu behar direla probak irauten duen minutu guztietan.

Esfortzua dosifikatu behar da, erritmo azkarra eta intentsitatea proba osoan zehar mantentzeko. Horren erantzukizuna botileroak du. Berak antolatzen du taldea. Probaren hasieran harrizulatzaile bati gehiago eskatzen dio, bere txanda luzatuz eta besteak baino kolpe gehiago emanaraziz. Proba aurrera joan ahala, beste bati luzatuko dio txanda, baina beti ere amaieran fresko arituko den harrizulatzaile bat erreserbatuta. Askotan proba hasi aurretik taldeak adostuko du nola egin antolaketa hori.

ERRONKA BERRIAK

[Urtuellako harrizulatzaileak Arboledako proban. 1999].

Gaur egun harrizulatzaileen kirola berreskuratuta dagoela esan dezakegun arren, beste kontu asko ere falta dira hobetzeko edo indartzeko.

Lehena, zalantza barik, harrizulatzaileen jarduera leku gehiagotara zabaldu beharra. Egun ia talde guztiak Bizkaian daude (Gipuzkoan aurten hasiko da talde bat) eta egiten diren proba gehienak herrialde honetan izaten dira. Talde berriak agertzea seinale ona izango litzateke, eta are gehiago orain arte harrizulatzaileak aritu ez diren lekuetan izango balitz. Azken honek kirolaren hedapena ekarriko luke.

Bigarren erronka, kirola ofizialki normalizatzea eta arautzea izango da. Ardura hau batez ere, lurralde bakoitzeko Herri Kirol Federazioaren esku dago, eta batez ere Bizkaikoaren esku. Hauei dagokie, erakunde publikoak bezala, berreskuratutako herri kirol honen probak arautzea eta erregistratzea. Ardura hau epaile federatuek egin beharko lukete, beste herri kirol guztietan egiten den bezala, eta erreleboa hartu orain arte sakrifizio handiz laguntzaile anonimoek eta boluntarioek egindako lanari. Ez da hau Federazioek egin beharko luketen lan bakarra, horretaz gain jarduera sustatu eta hedatu egin beharko lukete. Orain arte Federazioek, erakustaldi batzuetan parte hartzeko gonbitea emateaz gain, ez dute beste apartekorik egin harrizulatzaileen herri kirola bultzatzeko.

Kirol honen etorkizuna bermatzeko eta gaur arte egindako bideari eusteko, hirugarren helburua izango litzateke harrizulatzaile berriak lortzea jende gaztearen artean. Kirol baten sendotasuna ez dago soilik dauden fitxen kopuruaren baitan, kontuan hartu behar da, halaber, aritzen diren kirolarien batezbesteko adina. Gure kasuan, gaurko egunez, aritzen diren harrizulatzaileak kirolari helduak dira, eta, agian, jende gazte gehiago erakartzea falta zaigu.

Artikulu honetan ikusi dugun bezala, bide luzea egin da galduta zegoen harrizulatzaileen herri kirola berreskuratzeko. Lorpen honetan zerikusia duten pertsonen zerrenda oso luzea da. Agian, harrizulatzaileak izan dira guzti honetan protagonistak, eta era berean gehien sufritu dutenak helburu hau lortzeko. Hala ere, edozein jardueratan bezala, badira anonimatuan egundoko lana egin duten beste hainbat eta hainbat pertsona, besteak beste: botileroak, epaileak, antolatzaileak, laguntzaileak, jarraitzaileak,... hauen guztien ekarpena premiazkoa izan da. Gure babesle eta gure erakunde lokalak ere ezin ditugu ahaztu, batez ere Abanto, Trapagarango eta Urtuellako Udalak. Euren laguntza barik ezinezkoa izango bailitzateke gaur artikulu honetan deskribatu dugun errealitatea egia izatea. Guztioi, bihotz bihotzez, eskerrik asko!

BIBLIOGRAFIA:

“Juegos y deportes vascos”. Rafael Aguirre Franco. Enciclopedia general ilustrada del País Vasco. Edit. Auñamendi

“El intruso”. Vicente Blasco Ibañéz. Ediciones de Librería San Antonio. Barakaldo, 1999.

“Valle de Trapaga. Apuntes de su historia hasta 1900”. Larrañeta Alpino Club, 1993

“Concejo de Ortuella. Crónicas de su evolución hasta 1937”. Luis Manuel Maqueda Mata, Juan Ignacio Rodriguéz Camarero, Jose Rodriguéz Andrés eta Maire Rodriguéz Quintana. Ed. Ayuntamiento de Ortuella y Departamento de Transportes de la Diputación Foral de Bizkaia. Bilbao, 1995

“El Pueblo Vasco” egunkaria. 1910.

Kartelak hormetan

2005-08-01T11:17:00.000+02:00

Manexek kartel dotore askoak egin ditu aurtengo ekitaldiak iragartzeko, eta dagoeneko ikus daitezke herriko hormetan, baita trenbidearen beste aldean ere.
Hauek dira, zehazki, mus txapelketari, kontzertuei, kamisetei eta herri bazkariari dagozkien kartelak.
Norbaitek tamaina handiagoan behar izanez gero, beste herri edo auzoren batean jartzeko, eska ditzala lasai.

"Barkatu, zer da SKAPA?"

2005-08-01T10:18:00.000+02:00

[Gero eta herritar gehiago ikusten da aurtengo festetako kamisetak jantzita. Atzo, haur hauek gustura ageri ziren, kamiseta berri-berriak soinean zituztela].

Asteburu honetan jarri dute lehen aldiz festetako elastikoak eta herri bazkarirako txartelak saltzeko mahaia. Larunbatean Azken Portuko bidegorrian, eta atzo, Getaria-Zarautz igeri zeharkaldia zela aprobetxatuz, Munoan. Bietan, hainbat jende inguratu zen mahaira, eta komisioko kideek behin eta berriro erantzun behar izan zuten galdera: "Barkatu, zer da SKAPA?".
Santa Klara, Azken Portu eta Aritzbatalde entzun orduko, zalantzak alde batera utzi eta kamiseta batekin edo gehiagorekin alde egiten zuen jendeak. Atzo, esaterako, izan zen haurrekin hurbildu eta familia osoarentzat hamar kamiseta eta abuztuaren 12ko herri bazkarirako hainbat txartel erosi zuenik ere.
Oraindik kamisetarik erosi ez duenak, hurrengo asteburuan izango du berriro ere horiek eskuratzeko aukera, Azken Portun bertan.

[Hori dek hori lan egitea!!!]

["Festei buruzko blogerako argazki bat?", eta emakumearen erantzuna: "Bai, bai, lasai... Gazteen ondoan ni beti gustura!"].

Festetan ezagutuko ditugunak [1]: BANDA BATXOKI

2005-07-29T09:00:00.000+02:00

"Zer gara gu? Nor gara gu? Banda Batxoki gara gu!"

[Iturria: www.gaztesarea.net. Egilea: Koldo Otamendi]

Lagunen artean, tabernetako gau beroetan egiten diren ezinezko proiektu horietariko bat izatetik, sei urte pasa eta gero, bost urtez saioetan luzatu eta gero, baldintza desberdinetan eta musika tresnaz ezer jakinetik, zer edo zer jakitera, eta, bira desberdinetan, berrogeita hamar ikuskizun eskaini eta gero, Euskal Herriko zenbait txoko eta plazetan zein atzerrian emandakoak ere, orain, bere lan berria aurkeztera datoz, Iruñeko Txantrea auzotik, zuzenean. Banda Batxoki: jan goikoa eta lege txarra

NORTZUK ZARETE?
Banda bat gara, lagun talde bat, oraindik lagunak izaten jarraitzen baitugu. Bere garaian, orain dela sei urte, mozkorkeriaren artean, musika talde bat sortzearen inguruan luze aritu eta gero, talde birtual bat osatu genuen eta guzti (Joe Kakor's and The Butiños Punk Band), igande arratsaldeak entseguetan hasi ginen, oso baldintza kaskarretan. Lagunen artean, poliki-poliki animatzen hasi ginen, bakoitzak bere arima eta ekarpenak gehitzen, gaur egun garena osatu arte. Batzuk jotzen, besteak dantzan, beste batzuk kartzeletako ziegetatik… momentu on pilo bat igaro ditugu, baita oso txarrak ere. Gaur egun, jendearekiko harremanak indartzen eta zaintzen arreta handia jartzen dugu bai beste musika taldeekiko bai herrietako jendearekiko. Gure helburua, interesa jartzen duen jendeari huts ez egitea da, eta gutxieneko zerbitzuetan joan behar baldin bagara, hola joango gara! Adibidez, aurrekoan, Judizmendin, Kloratitako bateria jolearekin jo genuen, gureak eskumuturrekoa hautsita zeukan eta. Hori gara gu, behintzat garenaren puskatxo bat.

ZUEN LETRA BATEAN ZERA DIOZUE: TALDEAK DUINTASUNEZ DESAFINATZEN DUELA. NOLA EGITEN DA HORI?
Bai, hala da, entseguetan izerdi asko bota arren, gure mugak ezagutzen ditugu. Horregatik erabiltzen ditugu mozorroak kontzertuetan, hainbesteko lotsa ez izateko (kar, kar). Esan beharra dago, geroz eta hobe jotzen dugula, denok aldi beren, alegia, baina garrantzitsuena, kontzertuetara etortzen den jendearekin disfrutatzea da. Eta hori benetan erraten dugu, hortik datoz mozorroak, jartzen ditugun kuñak, egiten dugun antzerkia… Azken finean, emanaldi bat bukatu ostean, balorazioa egiterako orduan, guk hola-hola jo arren, jendea parrez eta dantzan egoteak beti merezi du.

DISKOA KALERATZEAREN HARITIK, SORPRESAZ BETERIKO DISKOA DA, EZTA?
Espero genuen baino hobe geratu zaigu! Abesti nahiko grabatu genituen estudioan, eta diskoan keinu pilo bat sartu ditugu: ezkutuan dauden abestiak, auzoko trikitilariak, bertsoak, eta Huajaloteko Gavilanen, Eguzki Irratian egiten zuen saio batetik hartutako hitzak erabili ditugu abestien arteko itsaskin gisa.

Banda Batxokiren logoa

ZER MODUZKOA IZAN DA MAO TSE PUNK PRODUKTIONS DISKOETXEAREKIN HARREMANA?
Oso jatorrak dira (je, je). Ez, txantxa da, gu gara horren atzetik daudenak. Lehen, aldizkaritxo bat karrikatzen genuen Mao Tse Punk, abestien hitzak, olerkiak eta artikuluak nahasten genituen. Handik hasi ginen, Urria Gorria izeneko jardunaldien inguruan, CD bildumak gure kabuz argitaratzen, baita olerki-liburuxkak ere. Horregatik asmatu genituen Mao Tse Punk produktions eta Motti Minh Rekords, sortzen dugun guziak ez dezan gure eskuetatik ihes egin.

AURRERA BEGIRA, PROIEKTU BERRIAK AL DITUZUE?
Etorkizun hurbilean, abuztuan eta irailean kontzertu nahiko ditugu: Lizarran, Zarautzen, Goizuetan, Irunberrin, Garraldan… Aldi berean, CDaren banaketan buru-belarri arituko gara, gure kabuz eginen dugulako (norbait animatzen bada gu laguntzen, kontaktuan jartzeko faborez). Urrian, Iñakiren (Eguzki Bideoak) laguntzarekin, bideoklip bat aurkeztuko dugu. Urrunean, buf!, gauza asko ditugu buruan: Euskal Herriko musika taldeen sarea hurbiletik jarraitzen dugu, beste disko bat pentsatua dugu jada, gure material teknikoa hobetu nahi dugu (baina diru pixka bat behar dugu)…

ZUEN IBILBIDEAREN HEIN HORRETAN, NORI IGORRIKO ZENIEKETE AGURRA?
Agur bero bat, urte hauetan zehar, herri desberdinetan ezagutu ditugun neska-mutil konprometituei, musika talde guztiei eta gure auzoko zale amorratuei (baita kartzeletatik jarraitzen gaituztenei). Guzi horiei esker, disko hori kaleratzeko ausardia izan dugu. Eta Chavela Vargasek abesten duen bezala: Nahi duzuna emango dizut, baina muxuak ez dizkizut bueltatuko.

TALDEKIDEAK:
Kako: (ahotsa)
Saul: (ahotsa)
Buby: (ahotsa)
Gorka: (bateria)
Motillo: (gitarra)
Fertxu: (gitarra)
Albarito: (baxua)
Joseba: (filarmonika)

HARREMANETARAKO:
658 57 78 44
bandabatxoki@txantrea.net

Diskoa, tabernarik onenetan aurki daiteke salgai, 6 eurotan.
Diskoa aurkezteko birari oraintsu ekin dio taldeak. Hau da egutegia:

Uztailak 21, Arrigorriaga
Abuztuak 5, Lizarra
Abuztuak 10, AZKEN PORTU
Abuztuak 13, Goizueta
Irailak 2, Irunberri
Irailak 30, Garralda

Festetako kamisetak, asteburu honetan salgai

2005-07-28T14:24:00.000+02:00

Abuztuaren 12ko herri bazkarirako txartelak ere erosi ahal izango dira.

Santa Klara, Azken Portu eta Aritzbataldeko festen inguruko kamisetak eta abuztuaren 12an egingo den herri bazkarirako txartelak asteburu honetan jarriko dira salgai.
Beste urteetan ez bezala, aurten kamisetak ez dira tabernetan salgai jarriko, eta horretarako zehaztutako egun, ordu eta lekuetan soilik erosi ahal izango dira:

UZTAILAK 30, LARUNBATA:
-11:00etatik 14:00etara, Azken Portuko bidegorrian.

UZTAILAK 31, IGANDEA:
-12:00etatik 14:00etara, Munoan (Getaria-Zarautz igeri zeharkaldia baita igandean. Dena dela, udaltzainekin arazoren bat izanez gero elastikoak saltzeagatik, "postua" Azken Portuko bidegorrira aldatuko da).

ABUZTUAK 6, LARUNBATA:
-11:00etatik 14:00etara, Azken Portuko bidegorrian.
-16:30etatik aurrera, Plaza Gorrian, Mus Txapelketa Herrikoiak irauten duen bitartean.

ABUZTUAK 7, IGANDEA:
-12:00etatik 14:00etara, Azken Portuko bidegorrian.

Helduen kamisetek 12 euro balio dute aurten, eta haurrenek, berriz, 10 euro.
Kolore eta modelo ezberdinak daude, guztiak 'SKAPA. Jaiak. 2005. Euskal Herria' leloarekin.

Kamisetak salgai jarriko diren egun, leku eta orduetan, HERRI BAZKARIRAKO TXARTELAK ere erosi ahal izango dira.
Izan ere, beste urteetan ez bezala, aurten ezin izango dira txartelak azken egunean erosi, abuztuaren 12an. Zehazki, abuztuaren 8a baino lehen erosi beharko dira txartelak. Herri Bazkarirako txartelek 10 euro balio dute.

Kolore gehiago Plaza Gorrian

2005-07-28T13:51:00.000+02:00

Aurreko larunbatekoarekin nahikoa ez, eta auzoko gazteak gaur ere Plaza Gorriko beste zenbait horma margotzen ari dira. Gaur goizean hasi dira Azken Portuko festekin lotutako irudiak margotzen, eta arratsaldean amaitzea espero dute. Dagoeneko, dudarik gabe, inguruetako auzorik koloretsuena da gurea!

Belarrioren agurra, bertsotan

2005-07-27T13:53:00.000+02:00

Azken urteotan bezala, aurten ere Belarriok egin du festetako egitarauaren agurra, bertsotan.
Plaza Gorriko hormetan ere dagoeneko margotu dituztenez, hona hemen, egitaraua oraindik plazaratu ez den arren, Belarriok aurtengo festetarako egindako hiru bertsoak.

Aurtengo jaiak ere
zaizkigu iritsi
auzoak behar die
indarrean eutsi.
Hiru egun topera
ihesten ez utzi,
eta lagunartean
patrikak igurtzi.

Askatasuna degu
jaiaren oinarri
eta Txuri askatu
esan degu sarri
Oraindikan barruan
hau da lotsagarri
aurten ere oihua:
“etxera ekarri!”.

Antolatzaile onak
gazteak gehienak,
bidali nahi dizkiet
agur goxoenak.
Jaien egitaraua
prestatzen dutenak,
herri ontan egiten
diraden onenak

Bihar, uztailak 27, Komisioaren bilera irekia

2005-07-26T15:05:00.000+02:00

Bihar, asteazkena, uztailak 27, berriro ere, Komisioak bilera irekia deitu du.
20:00etan izango da, Urpekoak elkartean.
Egitarauaren azken kontuak zehaztuta daude, eta bihar sartuko da inprentara.

Ostegunean, berriz, auzoko zenbait lagunek azken ukituak emango dizkiote
Plaza Gorriko hormetan egindako irudiari. Izan ere, larunbatekoarekin nahikoa ez eta Mendik eta Epeldek
atzo ere Toki Onaren atzealdeko beste horma bat kolorez bete zuten.
Etzi, berriro ere elkartu eta azken ukituak emango dizkiote orain arte egindakoari.

Hori da hori festa giroa zabaltzea!

Kolore eztanda Plaza Gorrian

2005-07-26T08:23:00.000+02:00

Aurtengo jaiak gainean ditugula erakutsi nahian, hainbat lagunek kolorez bete zuten larunbatean Plaza Gorria.
Goizeko 08:00etarako elkartu, 09:00ak aldean lanean hasi, eta arratsaldeko 19:00etan oraindik ere hormetan margotutako irudiei azken ukituak ematen ari ziren. Mendi, Beatza, Trejo, Zumarragako lagunak, Piru, Alazne eta Epelde han aritu ziren, aurtengo festetako horma-irudia margotzen.
Horma batekin nahikoa ez, eta aurten bata bestearen ondoan dauden zenbait horma aukeratu dituzte lanerako. Gainera, "artista" bakoitza bere lanarekin hasi eta, nolabait, elkartu egin dituzte guztiak. Emaitza ederra, benetan. Larunbatean norbaitek esan zuen bezala, margotutako hormen gaineko pisuek gora egingo zuten prezioan...
Saiatuko gara aste honetan ordenadoreko programaren baten bidez irudi guztiak elkartu eta egindako lana argazki horizontal batean erakusten. Bitartean, ezkerretik eskuinera ikus dezakezue egindako lana.

Dagoeneko hasi da zabaltzen SKAPA sukarra

2005-07-24T19:11:00.000+02:00

Hamasei egun geratzen dira oraindik Azken Portuko jaiak hasteko, baina herrian dagoeneko hasi da giroa zabaltzen:
larunbat goizean, hainbat lagunek Plaza Gorriko zenbait horma kolorez bete zituzten [asteartean emango dugu horren berri, argazkiekin], eta dagoeneko iritsi dira festetako kamisetak! Aurtengoek ez dute marrazkirik, baina kolore eta modelo ezberdinak daude aukeran. Guztiek, SKAPA JAIAK 2005 EUSKAL HERRIA hitzak dituzte aurrealdean. SKAPA, Santa Klara, Azken Portu eta Aritzbatalde hitzen laburdura da.
Kamisetak oraindik ez dira salgai jarri, eta aurten, beste urteetan ez bezala, EZ DIRA AUZOKO TABERNETAN SALGAI JARRIKO.
Hemen bertan zehaztuko dugu non eta noiz izango den kamisetak erosteko aukera.
Prezioei dagokienez, helduen kamisetak 12 EUROtan jarriko dira salgai, eta haurrenak 10 EUROtan.
Dena dela, oraingoz, argazkiarekin konformatu beharko...
Hona hemen helduentzako hiru modeloak.

Sorgin Gaua antolatu du igande honetan ZAGAk Torreoian

2005-07-22T12:25:00.000+02:00

Zarauzko Gazte Asanbladak, “Zarauzko gau garesti eta monotonoari alternatiba eman nahian”, igande iluntzean Sorgin Gaua antolatu du Vista Alegre auzoko Torreoian.
“Ur-globo gerra, musika, sua, malabarak, literatura, ipuinak… eta beste hainbat sorpresa” iragarri ditu ZAGAk, eta lekuak duen magiari atzoko ilargi betearen eragina gehituz, gau bela ederra igarotzeko osagai guztiak ditu gazteek igande gauerako antolatu dutenak.

Vista Alegreko Torreoia bera, berriz, monumentu itxurakoa eta estilo klasizistako eraikin zirkularra da. Hormigoi armatuz egindako Zarauzko lehen eraikina da (1913), eta hareharrizko oinarria du.

Festetarako koloreak zabaltzen

2005-07-21T10:40:00.000+02:00

Hogei egun besterik ez dira geratzen abuztuaren 10erako. Hogei egun besterik ez Azken Portuko festak hasteko. Giroa berotze aldera, eta auzokideei jaiak gainean ditugula gogorarazteko, hainbat lagunek Plaza Gorriko hainbat horma margotuko dituzte, azken urteotan auzoko festen atarian egin ohi izan den bezala.
Orain arte, jaien bezperan margotu izan dute gazteek festetako murala, urte horretako jaien harira sortutako marrazkiarekin. Aurten, ordea, aldaketak izango ditu ekimen horrek. Mikel Mendizabalen arabera, “aurten, gonbidatuak ere izango ditugu”. Zehazki, diseinuan, arte grafikoetan eta margotzen aritzen diren herriko zenbait lagun gonbidatu dituzte, eta LARUNBAT honetan, UZTAILAREN 23an, 08:30ak aldera hasieta, goiz osoan, Plaza Gorriko hainbat horma kolorez beteko dituzte. Gero, elkarrekin bazkalduko dute denek.
Mendizabalen arabera, ez dute bazterrera uzten gero, azken urteotan egin ohi duten bezala, jaien bezperan beste horma-irudi bat margotzea ere. Hori, ordea, aurtengo jaiekin lotutako irudia izango da. Bestea, asteburu honetakoa, askoz libreagoa izango da. Bakoitzak, beti ere Azken Portuko festekin lotuta, nahi duena margotzeko aukera izango du. Larunbatean, beraz, festetarako koloreak zabaltzen hasiko dira dagoeneko auzoan.

Komisioaren bilera irekia, gaur 20:00etan

2005-07-20T09:18:00.000+02:00

Azken Portuko festetako komisioak beste bilera egingo du gaur, 20:00etan, Urpekoak elkartean.
Aurreko asteko bileran mahai gainean utzitako kontuak zehazteko bilera irekia da.
Iritziak, proposamenak, ideiak edota lanerako gogoa duenak, badaki nora jo.
Ateak zabalik daude auzokide guztientzat.

Azken Portuko kontzertuak, ia zehaztuta

2005-07-18T19:25:00.000+02:00

Azken uneko kontuak lotzeko baldin badaude ere, dagoeneko aurreratu daiteke, nolabait, zein izango diren aurtengo jaietan auzoan izango ditugun kontzertuak.

Honakoak dira egunak, eta taldeak:

ABUZTUAK 10, ASTEAZKENA:
—Tuboskapi (Ondarroa).
—Banda Batxoki (Txantrea).

ABUZTUAK 11, OSTEGUNA:
—Jauko Barik.
—Sexty Sexer's (Bera).
—Pirats Sound Sistema (Bartzelona).

ABUZTUAK 12, OSTIRALA:
—Nekin (Tolosaldea).

Hona hemen talde batzuei buruzko informazio apur bat eta argazkiak [gehiena Gaztesarearen Musikagidatik lapurtu dugu].
Informazio osatuagoa eta Sexty Sexer's) taldearena sartuko dugu egunotan. Pirats Sound Sistemarena, berriz, hemen bertan aurki dezakezue, egun batzuk beherago...

TUBOSKAPI:
Hasieran SKA bertsioak jotzen hasi ziren, gero abesti propioak sortu zituzten euskaraz eta Euskal Herriko edozein tokitan kaña emateko asmoz aurrera egin zuten. Talde jendetsua osatzen dute. Dudarik gabe euskaraz abesten duten Ondarrutarrak dira. Taldekideak: Igorrek, Gorkak, Ibanek, Aitorrek, Maikelek, Oierrek, Asierrek, Oierrek, Xabik.

BANDA BATXOKI:
1999an sortu zuten taldea "Joe Kakor´s and the Butiños punk band" izenpean. Geroztik dozenaka kontzertu eskaini dituzte Euskal Herrian barrna "kinki tour" izeneko biraren barnean. Talde aproposa gaztetxe eta txosnetako aholtza gainean ibiltzeko, jai herrikoien zale eta partaide. Taldearen ideia punk musika egitea da, gerora ateratzen dena zehazteko dago.
Taldekideak: Motxilo (kitarra), Fer (kitarra), Albarito (baxua), Gorka (bateria), Saul (ahotsa), Bubi (ahotsa), Beramendi (armonika) eta Kako (ahotsa). Lehenengo diskoaren aleak kopiak egitera bidali dituzte dagoeneko, eta uztailaren amaieran iritsiko zaizkie. Azken Portun lehen diskoa aurkezteko moduan izango dira, beraz! Lehenago, Zarautzen, Munoan ikusi genituen, iazko sanpelaioetan, txosna eremuan. Kaotikok beraien telonero moduan jo zuen, Banda Batxoki beharrean Banda Bassotiren aurretik jo behar zutela sinetsita...

NEKIN:
Bost gaztek osatutako taldea da, "hasiera batean trikiti munduan ibiltzen ginen (Nahikari eta Josune), eta talde bat sortzeko ilusioz iada ezagunak genituen Patxi (gitarra), Iñaki (bateria) eta Aloñarekin (baxua) elkartu ginen. Euskal Herriko taldeen bertsioak jotzen genituen eta 'Tolosaldea musikaz piztuz' diskan gure abesti bat grabatzeko aukera izan genuen. Ikasketak zirela Patxik utziriko hutsunea Iñigok bete zuen eta gaur egun gaztetxe nahiz herriko plazetan 1'30 edo 3 ordutako emanaldiak egiten ditugu".
Taldekideak: Josune (trikitixa eta ahotsa), Nahikari (panderoa ahotsa eta tinbala), Iñaki (bateria), Aloña (baxua), Patxi (gitarra), Iñigo (gitarra).

JAUKO BARIK:
Hirukote honek lotsagabeki galbahetzen ditu punk, metal, pop zein rock doinuak kantuak osatzeko, musika freskoa eta indartsua lortuz. Enarak (baxua), Haizeak (bateria) eta Itsasok (ahota, gitarra eta biolina), besterik gabe, rockaren munduan bidea eginez, Donostiatik haizea eta itsasoa dakartzate, eta baita beraien energia ere, emakumeena: Jauko Barik.

Kontzertuen orduak zehaztuko ditugu aurrerago, baina, ohi bezala, gauean izango dira.

BANDA BATXOKI eta JAUKO BARIK ere Azken Portuko festetan

2005-07-18T12:23:00.000+02:00

Asteazken honetan izango da Azken Portuko festetako komisioaren bilera berria, eta orduan zehaztuko dituzte egitarauko ia kontu guztiak. Hala ere, dagoeneko, hasi dira hainbat kontu lotzen. Aurreko astean aipatu genuen bezala, abuztuaren 11n, Bartzelonako Pirats Sound Sistema taldea izango da Nazioarteo Elkartasun Kontzertuan.
Egun horretan, bada, JAUKO BARIK taldea ere ariko da Azken Portun.
Lehen egunean, berriz, Txantreako BANDA BATXOKI taldeko lagunek dagoeneko baietsi dute Azken Portun izango direla.
Festetako lehen eguneko kontzertua, beraz, egundoko giroa izango da. Banda Batxoki iaz sanpelaioetan aritu zen, Munoan, txosna eremuan. Hilabete honetan aurkeztuko du lehengo diskoa.
Egunotan emango dugu bi taldeei buruzko informazio gehiago.

Altzolaneko olagarroa eta beste kontu batzuk

2005-07-18T09:46:00.000+02:00

Atzo Galiziaren Eguna ospatu zuten Zarautzen, eta horren harira, Azken Portuko Altzola taberna kudeatzen duen bikote galiziarrari buruzko kontuak argitaratu zituen atzoko Urola Kostako HITZAk. Trinidad Arias eta Enrique Afonso, duela hainbat urte Azken Portura iritsitako ehunka etorkin horietako bi besterik ez ziren izan. Beraien herriarekiko saudadea eta hango sukaldaritza, ordea, lanbide bihurtu zuten, eta aspaldian Altzola taberna Galizia ttipi bat bihurtu da Azken Porturen bihotzean: bertan jan daitezkeen lakoiak, olagarroak, enpanadek, gaztainek edota dasta daiteken ribeiroak eta albariñoak ez du Ourense, Vigo, Santiago edota Coruñako alde zaharretan goza daitekeenaren inbiria handirik: zuzenean sorlekutik ekartzen baititu bikoteak.
Altzola taberna, etorkin galiziarren artean ez ezik, estimatua da auzokideen artean ere. Iazko festetako piropo lehiaketan, "Altzolaneko olarrua ematek!" idatzi zuen norbaitek.
Hona, hitzez hitz, atzoko egunkarian irakurri ahal izan genuena.

GALIZIA BIHOTZEAN BARRENA
[Lore Agirrezabal]

"Feijoo, Ferreiro, Rivas, Rivero, Reixa, Afonso, Forcada, Novoneira, Fonte, Pereiro, Couso, Padron... asko dira. Milaka dira beren jaioterria utzi eta Euskal Herrira etorri ziren galiziarrak. Horietako askok Zarautzen aurkitu zuen bizibidea, eta urteen joanak zarauztartu egin ditu, baina saudadeak mendebaldera begira eduki ditu beti.
Herriminarekin bizitzen ikasi dute Zarauzko galiziarrek ere. Hemengo ohituretara eginda dauden arren, beraiekin ekarritako ohiturak ez dituzte ahaztu eta urtean behin orain herrikide dituzten galiziar eta euskaldunekin konpartitzen dituzte.
Gaur ehunka lagun bilduko da Iñurritza zelaian Galiziako musika entzun, hango eta hemengo dantzak ikusi, eta kulturen arteko elkartruke horretan Galiziako Eguna ospatzeko. Zarauzko Carballeira elkarteak urteak daramatza egun hau antolatzen, eta zarauztar askoren topagune bihurtu da. Urtero bezala, hango jakiak dastatzeko aukera izango da, eta La Morena olagarro prestatzaile ospetsua etorriko da Galiziatik.

Baina Iñurritzan ez ezik, Azken Portun ere izango da Galiziako produktuak dastatzeko aukerarik, Trinidad Ariasek egunero bezala bere herriko jakiak aterako baititu barrara.
Arias galiziarra da jaiotzez, Ourenseko Berin herrikoa. Hogeita bi urte zituela etorri zen Zarautzera ordurako hemen bizi zen bere senarrarekin, Enrike Afonsorekin, bizimodu berri bat hastera. Hamabost urte daramatza Azken Portun hartu zuen tabernan lanean, eta ogibideaz gain, bere herriarekin lotzen duen txokoa ere egin du bertan. Ireki zuenean, gainera,uste ez bezalako harrera izan zuela dio Ariasek berak: «Nik hasieran uste nuen Galiziako gauzek ez zutela funtzionatuko hemen. Nori gustatuko zaio olagarroa, nori lakoia? Pentsatzen nuen. Baina denei gustatu zaie, bai hemen bizi diren galiziarrei, bai zarauztarrei. Olagarroak arrakasta ikaragarria du. Pattarra, belar orujoa edo aguardientea ere etxean egindakoa edukitzen genuen lehen, Galiziatik nire gurasoek egindakoa ekartzen genuen. Orain edozein tabernatan dago, baina orduan jendeak ez zuen ezagutzen».
Dena galiziar erara egiten du Trinidadek, umetan ikasi bezala. Tabernan ere enpanadak eta olagarroa bere amak eta amonak egiten zituzten bezala egiten ditu. «Olagarroa hemen arrautza fijitua bezain gauza arrunta zen han; oso jaki herrikoia. Eguberrietan olagarroa jaten zen etxe guzti-guztietan eta azoketara ere jendea olagarroa jatera joaten zen». Neguan Gaztainen Eguna ere ospatzen dute Galizian bezala, eta handik, Berindik, ekartzen dituzte gaztainak, Ariasek dioenez, hangoak izan behar baitute «on-onak» izan daitezen.
Galiziarekiko lotura ez dute inoiz hautsi Ariasek eta Afonsok. Berinera (Ourense) urtero-urtero joaten dira, eta ohiturez gain, hizkuntza ere mantendu dute; etxean galizieraz egiten dute. «Niri hasieran kosta egin zitzaidan hona egokitzea, beti hara itzultzearekin amesten nuen. Gaur egun, berez, laster izango nuke horretarako aukera, erretiroa hartzeko gutxi falta baitzait. Hala ere, jubilatuta badakit joan joango naizela baina ez dela han geratzeko izango. Azken finean, denbora gehiago eman dut hemen han baino eta seme-alabak ere hemen ditut», esan digu Ariasek.
Gaur ere olagarroa prestatuko du Trinidadek, baina Santiago Egunean jai egingo du".

Galiziaren Eguna Zarautzen

2005-07-16T12:55:00.000+02:00

Galiziaren Eguna izango da bihar Zarautzen. Urtero bezala, Iñurritzako zelaia Galiziatik gurera lanera etorritakoen eta bertakoen arteko bilgune bihurtuko da bihar, bertako ohiturak, kultura eta sukaldaritza ezagutzeko aukera eskainiz beste behin ere. Urte osoan zehar, berriz, Azken Portun dagoen Altzola taberna bihurtzen da Zarauzko galiziarren bilgune. Bertan, Trinidad Ariasek eta Afonso senarrak, hamabost urte daramatzate Azken Porturen bihotzean Galizia zati bat eraikiz.
Biharko eguna gogoan, eta igaro berri diren sanferminak oroituz, duela hogei urte atzera egin, eta Nación Reixaren abesti hau dakarkigu gaurkoan…

ENCONTRO CON SARRI EN NACIÓN REIXA

Hai vinte anos que os panos, San Fermín,
cubriron o ceo de vermello, 7 de xullo
e hoxe encontro a Sarri en Nación Reixa, aí andamos
alá as cousas non eran moi fáciles
as rúas estaban cheas de xente razoable
dise dun home que é razoable
como as putas din que un cliente é serio
polo andar xa se ve que non somos
serios nin razoables
emitindo na mesma frecuencia
aquí estamos en Nación Reixa
aquí, as casas non teñen pararraios
nin nos afectan os cambios horarios
¿pódense ter os ollos esgotados
despois de ver tantas cosas?
alá falbamos por educación en castelán
e cantabamos en inglés pr mestizaxe
aquí saltamos de beira a beira
usando as nosas linguas minoritarias
existe o diccionario do portugués
uo do galego-brasileiro ó euskara
no que se traduce a palabra "saudade"
"saudade, bakardadea, oroimina, herrimina eta beste"
¿sabes ti o que é a felicidade?
é dicir chuvia e que chova
agora somos como unha canción perdida
e encontrámonos en Nación Reixa
polo andar xa se ve que non somos
serios nin razoables
pasan moitos trens todas as noites
pero ningún para en Nación Reixa
aquí non hai estación nin vías
lado máxico da fin do mundo
as despedidas son adeuses demasiado tristes
unha metralleta de beixos desde Nación Reixa...